2014/12/14

Plan C & D




Hello ! 


尋晚啱啱同Blog友 友季妹 (應該話 友季姐 至真)  ^_^ !!

講開 Plan C & D , 今日有時間 , 即刻寫番篇 , 唔好怪我多心 , 

所謂一日未結婚 , 都仲有得揀嘛 . haha ... 點解會有 Plan C & D 出現 ?

之唔係睇完 Blog友 Fung Mandy 既 根室一帶既網誌囉 . 果度有霧與冇霧 , 

簡直係兩個世界 , 果D 納沙布岬 ~ 根室車石 ~ 仲有 厚岸 食蠔篇 , 

地方 & 食物都正都冇朋友 , 心諗 : 如果要去既話 , 一擊就要即中 , 

即係話十月左右先至放心 , 之前講過 ~ 果段時間好難攞假 ,  >_< !!

所以不如黎個 移船就磡  , 將果幾日改為北上 稚內 . 

反正 2011年度雪駕遊果次 , 好多景點都因為積雪而封路 , 

另外仲想睇睇冇雪既 稚內 係點樣 , 就當係先攪掂呢度 , 遲下先諗 根室 . 

跟住講解呢幾日度既 Plan C .

第一日老規矩 香港 轉機往 札幌 , 都冇乜行程可言 , 到步食個拉麵就訓覺 .

之後果D講景點呢 , 主於都仲係好初步 , 度掂晒先黎個詳細版 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

攞車之後北上 , 今次唔會直接上 稚內 , 而係由 石狩 開始沿住海邊行 , 

中途有乜岬就睇乜岬 , 最小都有個 雄冬岬 , 再上就係 留萌市 , 

最後在 羽幌町 搵間旅館打躉 , 講開 羽幌町 , 隔離有兩個離島 , 

叫做 天売島 & 焼尻島 , 又係好鬼正 , 不過4至5月都係冇乜野睇 , 

所以唔在行程之列 , 只係參觀下佢個碼頭就算 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟手又係沿海邊北上 , 同上次雪駕遊接軌 , 直上到 稚內 , 

稚內 就有好幾個景點要參觀 , 好似公園與長堤 , 大沼 同埋 宗谷岬 .

宗谷岬 上面果度 , 上次俾冰面跣腳仆街流左第一滴血 , 好彩冇留疤痕 , 

今次一定要去番果度報仇 , 再黎就係北見神威岬 ~ 千疊岩 ~ 三笠山展望閣 , 

呢幾度唔係大雪就係封路 , 又係有仇必報 , 晚上諗住入住 ニュー幸林

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後又係沿海 , 向 網走市 方向進發 , 總之見乜睇乜 , 

好似 天都山 ~ 能取岬 之類 ... (應該仲有其他景點 , 不過仲搵緊)

夜晚唔駛諗 , 一定入住 網走湖莊 旅館 , 唔會有第二間 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢日就好簡單 , 淨係往 知床 解決未了心願 , 之前都好似講過 , 

以 五湖 為主題 , 同埋 知床峠 , 講開呢個 知床峠 , 

好幾位 Blog友都係敗去果度 , 希望可以順順利利咁幫大家報仇雪恨 .

晚上又係篤定入住 グランドホテル 北こぶし , 好多Blog友住過都話唔錯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就唔去 羅臼 ~ 根室 果頭咯 , 而係去番上次遊覽過既 道東三湖 .

分別係 : 摩周湖 ~ 屈斜路湖 ~ 阿寒湖 , 果度有Blog友返黎冇耐 , 

網誌裡面既景點相當之吸引 , 預算在果度住兩晚 , 旅館方面仲諗緊 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就係經 濕原 落 釧路 , 入夜既 釧路 正式係屍城 . haha ...

呢樣我都領教過 , 不過想一試 和商市場 既 勝手丼 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟手又去番沿海路行 , 會經過一間叫做 戀問 既 道の駅 , 

後面有個海岸 , 平時都已經好正 , 如果遇著大浪既話 , 

咁就更加正都唔捨得走 . 當日終極景點就係 襟裳岬 既 風之館 , 

希望遇到好天氣 , 影番輯靚相 , 以慰上次失相事件啦 , 

因為上次風和日麗 , D相好正 , 就咁唔見左 , 實在可惜 .  >_< !!

暫時諗住入住呢間叫做 優駿 既溫泉旅館 , 因為上次住過都唔錯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

玩到呢日都差唔多夠皮 , 呢日既行程主要都係返 札幌 還車 , 

當然都係沿住海邊行 , 有乜好景點都停低影餐飽 , 

返到 札幌 先至係精彩 , 即刻去番上次叫做 :  

天然温泉やすらぎの湯 北のたまゆら桑園 浸餐飽 , 浸完記得幫襯佢食晚餐 , 

正式係抵食夾大件 , 呢類街坊式浸餐飽錢湯 , 我就至鍾意 , 

熱熱鬧鬧咁 , 浸完在休息大廳食晚睇電視 , 感覺一流 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果冇數錯 , 呢日應該係第十一日 , 亦係回港之日 ,

基本上全日都係等機 ~ 轉機 ~ 乘機 , 最後回港 , 次次都係歸心似箭 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

以上11日就係 Plan C 既行程 , 簡單D講即係捨棄 根室 換入 三湖 .

呢個行程冇咁受時間限制 , 唔駛到9-10月 , 大約5-6月都可以出門 .

靈活好多 , 至於 Plan D , 今日都唔夠時間講 , 加上資料都未搜集好 , 

連雛形都未出 , 遲D先至補上啦 .  XD

Bye Bye !

26 則留言:

  1. 呢個plan c同我構思緊既plan差唔多,我諗住旭川入,去左旭岳報仇先,跟住好似你咁沿海上稚內,跟住去知床,如果有時間去埋根室,喺釧路走。不過個plan唔知要排到幾時-_-#

    回覆刪除
    回覆
    1. 真係差唔多喎 , 不過 根室 果頭千祈唔好4-5月份去呀 . XD
      同埋去 厚岸 記得食蠔呀 , Yeah !!

      刪除
    2. 初時諗住3月尾,但驚稚內仲有雪,唔敢搏。都係會揀返10月中左右。

      刪除
    3. 3月尾稚內應該仲有雪 , 5月就穩陣D .
      咁4月尾度掂去邊度未 ? 聽講係青森 ?

      刪除
    4. 主打盛岡、秋田、青森同玩條五能線

      刪除
    5. 五能線 ? 會唔會住 不老不死黃金泉 旅館 ?

      刪除
    6. 因為訂唔椿山,而家訂左不老不死,差唔多貴成兩倍呀:-(

      刪除
    7. 羽幌出名甜蝦呀, 去羽幌 我推介"おろろん食堂 羽幌店" 既甘エビ丼, 超正呀~
      Tel: 0164-62-4815 MC: 508 700 614*27
      http://gourmet.livedoor.com/restaurant/307131/photos/detail/21231/

      刪除
    8. man wai, 北上稚內, 會不會去埋禮文島 同 利尻島呀?!

      刪除
    9. Maggie, Kaykie : 依家都訂唔到椿山 ? 都咪話唔誇張 , 駛唔駛咁爆呀 ? =_= !!

      刪除
    10. Fung Mandy : 羽幌甘蝦 ? 乜野月份當造先 ? 我預算5月中出發 ,
      最遲6月中 , 唔知乜野環境呢 ? (如果採用Plan C路線的話)

      刪除
    11. Fung Mandy : 我諗呢程都唔會去離島 , 上次試過 奧尻島 , 都係月份唔係太好 , 所以冇乜特色 . >_< !!

      刪除
    12. 我去羽幌果時係5月中, 甘蝦都好OK架~
      禮文島 同 利尻島 盛產海膽, 馬糞海膽6-8月當造, 紫海膽當造期是5-9月
      禮文島6月是花祭期

      刪除
    13. Fung Mandy : 咁又唔錯喎 , 若然決定用呢個Plan , 一於試試佢既甘蝦 . Thx !!
      唔去離島既其中一個原因係租車價貴 , 想日日都用車 , 所以唔去咯 . XD

      刪除
    14. 不用客氣,好野梗係要分享啦~ ^^
      如果我再去稚內果頭,都應該會去埋果兩個島,
      但都係車既問題,唔知揸埋過去好 or 在島果邊再租好@_@

      刪除
    15. Fung Mandy : 如果運埋部車過去 , 成本價高好多 , 一係參加巴士團 , 一係過到去再租好D .

      刪除
    16. 我都想去埋兩個島,咁計起嚟10月又唔啱時間喎-_-#

      刪除
    17. Maggie, Kaykie : 好難兩全其美既 , 始終都要有D取捨 . =_= !!

      刪除
    18. 咁可能要split開兩個plan,5-6月去稚內,10月中去知床根室。不過都唔知要排到幾時,都係睇住你地啲遊記,攞住料先^_^

      刪除
    19. Maggie, Kaykie : 唯有係咁啦 , 互相向大家攞料 . ^^

      刪除
    20. 雖然話訂o左不老不死要差唔多貴成兩倍,不過而家 yen 平,住貴價溫泉旅館先抵呀 ! 可以 65 折住以前唔捨得住的旅館

      刪除
    21. CK鼠:如果唔係yen平咗,真係唔捨得住><

      刪除
  2. 嘩一入黎比manwai姐嚇親,乜將友季搬上頭一行咁高調 ⊙﹏☉
    友季緊係妹喇,manwai姐26/12生日足足大友季9個月啊。
    呢個plan C 幾好,可能明年友季的五人團都可以跟,不過可能要減景點,覺得太趕。
    講開禮文島同利尻島,友季當年是先還車再上船去利尻島同禮文島,再在島上租車,咁樣比較正路。

    回覆刪除
    回覆
    1. 啊姐唔係講年紀既 , 你既係車主又係業主 , 唔係啊姐係咩野喎 ? haha ...
      其實Plan C只係折衷既辦法 , 鬼叫 根室 果邊5月大霧咩 , 唯有Cut左佢啦 . >_< !!
      呢個Plan 有部份的確幾趕 , 不過我一個人冇乜所謂 , 而且仲可以稍為執一執 .
      去到島上再租車確實比較精明 , 果度係孖島 , 連車過成本太高 . ^^

      刪除
  3. Man Wai,
    Merry Christmas. 同埋預祝你聽日牛一快樂呀! 祝你繼續旅遊玩不停, 一於行晒成個日本為止。最緊要身體健康, 開開心心, 工作順利, 咁先有彈藥去玩嘛!

    回覆刪除
    回覆
    1. 聖誕快樂 & 新年進步 !!
      好 ~ 大家都生日快樂 . (同你同月份生日 , 零舍易記) ^^
      大家都身體健康, 開開心心, 工作順利 !!

      刪除

歡迎光臨 , 如果時間許可 , 請留番個言丫 ~