2015/01/01

新年快樂 之 自駕履歷討論篇




Hello ! 


今日係2015年1月1日 , 首先祝大家新年快樂 , 身體健康 , 

萬事勝意 , 花開富貴 , 如意吉祥 , 恭喜發財 ... ( 變左農歷年 ?? )

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今日假期 , 都冇乜既定主題 , 求其乜野都講D , 不過都係離唔開旅行一事 .

踏入2015 , 正常情況之下 , 即係仲有5個多月後先至出門 .

搵料方面暫時都未駛太過積極 , 始終都未落實用邊個 Plan 嘛 .

講開又講 ~ 本來好大程度使用既Plan D , 呢刻有點回軟跡象 , 

升得較快既係Plan C , 點解會咁呢 ? 

之唔係因為重溫Blog 友既 稚內 景點囉 .  ^_^ !!

呢排既情緒相當之唔穩定 , 意向隨時逆轉 , 今日諗到乜 , 

聽日又唔同晒 , 打後呢幾個月相信都會係咁上下 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外近排又同Blog 友討論開自駕履歷表 , 我份履歷主要都係在日本 .

唔講都唔知原來都幾豐富下 , 主要包括有 : 初次自駕 . 

即係首次自駕遊 , 由於係雪藏牌 , 所以乜都戰戰競競 , 經常質疑識唔識用GPS , 

點樣入油 , 夜晚泊邊度 , 泊位又唔記得幾時扭軑 , 總之乜都驚餐死 , 

都攪出唔小 蝦碌事件 , 好彩有驚無險 , 依家諗番起都得啖笑 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住下一年 , 膽粗粗學人地雪駕 , 第一日攞車就由 札幌 直踩上 稚內 , 

車程約莫6粒鐘(正常天氣) , 加埋玩左幾個景點 , 正式係由朝楂到晚 , 

好彩趕及在天黑前駛回酒店 , 仲有係頭幾日都冇乜車在前面 , 

所以與前車保持距離呢Part唔係咁上心 , 試過差D同前面車尾Kiss

好彩都係有驚無險 , 否則份履歷就花晒咯 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住下一年 , 今次體驗既就係 霧駕 , 其實都係逼於無奈 , 

呢種經驗唔要就罷 .  >_< !!  果次係2012年4月尾 , 戇居居唔知 根室 果頭勁大霧 , 

去到乜野景點都係迷離境界咁款 , 連我最鍾意既海邊景點 , 

都只係聽到海浪聲 , 失望到想跳埋落涯邊算數 . haha ...

最近睇番 Blog 友網誌 , 見到同一個景點 , 唔同月份可以咁差天共地 , 

更加後悔難返 , 要報仇又要 9-10月出門 , 唯有擱置住佢先啦 . 

不過霧駕呢家野 , 都幾唔知點講 , 一般都有十零廿尺位走棧 , 

試過有一次大霧到離晒大譜 , 再向前行好有可能會有危險 , 

唯有拿淋掉頭 , 就算掉緊頭都驚有對頭車黎緊 , 可想而知有幾離譜 .

而在同一次行程 , 前段仲有通宵駕駛 & 車內露宿 , 

呢種經驗都幾過癮 , 不過試一次就夠晒皮咯 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而2013年果次船駕 , (即係連人帶車過大海) 亦係一次相當唔錯既經驗 .

跟住D大型貨櫃車深夜過海 , 雖然船費貴左D , 不過勝在好玩 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後係啱啱呢次蚊駕遊 , 唔知稱唔稱得上經驗 ? 

平時多數沿海邊行 , 今次主要行內陸 , 成個車頭部份黐滿晒昆蟲屍體 , 

正式係生平僅見 , 一劈劈咁 ~ 都咪話唔核突 , 洗完車好快又黎過 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而點解Plan C 突然會意向回升 ? 其實同佢都有莫大既關係 .


早排上 Toyota 租車網上搵車 , 見到呢款86 MT版 於2月就會推出 .

我最想在我自駕遊履歷上面 , 寫有MT(棍波) , 咁先至夠圓滿 .

所以Plan C 既取向 , 忽然上升好幾個百份點 .  ^_^ !!

最後係最唔想有既履歷就係 醉駕 & 藥駕 , 大吉利是千祈唔好制呀 .

今日講住咁多先 . 

Bye Bye !

20 則留言:

  1. 都話你個履歷勁啦XD
    正所謂"不可一,不可再",同醉駕 & 藥駕說不^_^

    回覆刪除
    回覆
    1. 咁又唔係勁得咁勁 , 相信勁過我既大有人在 , 話唔定你同埋Fung Mandy都係其中之一 .
      醉駕就梗係唔好啦 , 之但係藥駕 , 萬一真係病左 , 冇理由頂硬上唔食藥 ,
      咁應該點呢 ? 千祈唔好遇到咁既情況 , 大吉利是 . XD

      刪除
    2. 我地果D小兒科啦,稱唔上入流添 :p
      man wai 都好杯中物,但就一定唔會醉駕嘅 ^^
      不過一個人在外,事事小心就是了 :)

      刪除
    3. 失望到想跳埋落涯邊算數, 哈哈, 睇到呢度笑咗, 咁搞笑 XD

      刪除
    4. Fung Mandy : 其實只要曾經試過自駕遊 , 已經相當之唔簡單 , 冇乜級數可分 . ^_^ !!
      至於醉駕 , 我就一定唔會試 , 小小都唔得 , 呢樣一直係我底線 .

      刪除
    5. Fung Mandy : 你報左仇都應該知道有霧與冇霧既差別 .
      矇查查 ~ 好失望既呢 . haha ...

      刪除
    6. 哈哈,果種既失望又失落既心情,我當然明白啦!
      但我依然仲有個深仇大恨“知床峠”未能報, 要靠你啦 ^^

      刪除
    7. 本來都唔知去唔去埋 知床峠 ? 不過既然你咁講 , 好啦 ~ 盡量將佢加埋入行程裡面 . ^^

      刪除
  2. 新年快樂。
    平時你都無開棍波,在自駕時才玩,有點辛苦及危險架。
    旅遊應以小心為上,平安去玩,平安回家嘛。所以個人唔支持你既選擇。

    回覆刪除
    回覆
    1. Hello ! 新年快樂 .
      辛苦就預左架喇 , 危險就應該唔怕掛 ?
      只要萬事小心 , 應該冇乜問題既 ... ^_< !!

      刪除
    2. 小姐, 自己衡量下風險.
      2000cc, 後驅, 2百隻馬, 棍波六速, 瞓喺度楂, 視野有限, 起步快, 地板油更快, 入油都一樣快, 行 ic 走 2百無問題, 行國道 50 唔超速四波到玩哂, 行縣道 2,3 波上落, 踩極力子都腳軟, 舞得佢惦就無問題.

      刪除
    3. IC 200 都冇問題 ? 咁辣 ? 估佢唔到喎 , Prius 到150 都有小小飄 .
      我相信國道都冇乜人會行 50 掛 ? 真係會黐線架 . XD
      睇下點啦 . ^^

      刪除
    4. 係咪呢架? 259km
      https://www.youtube.com/watch?v=SDJX6Tbo00I

      刪除
    5. 6700轉 , 258km , 辣到啊媽都唔認得 , 唔知佢係用機黎測試還是在街道跑呢 ?
      好難搵到條咁大既直路 . ^^

      刪除
    6. t先生 : 我鍾意呢段多D . ^0^ !!
      https://www.youtube.com/watch?v=oC7t6UtiJ40

      刪除
    7. 我開左20幾年棍波車,我可以講可以做到人車合一。最近十年改左用自動波車既原因係手提電話既出現,尤其是係最初無乜耳筒既選擇。但在外地開車,我都係選擇自動波車。原因是人生唔不熟,要顧既行車狀況,要特別留意交通標誌,要顧既野多左。又一路行會一路睇風景,開自動波車會舒服及安全好多。

      刪除
    8. 我在德國開架Golf仔,自動波車。開到170Km都仲可以有大把力去,而且一D都唔飄,但我已經覺得夠皮收油。
      在香港東區走廊,97年既時候,我開住架Benz S320開到180KM,都一D都無問題。
      我而家架Camry閒閒地都去到140Km架。
      其實開快車會好緊張,好用神。一不小心就會好容易出事,小心、小心。

      刪除
    9. 1733 : 前輩即係前輩 , 你果份履歷比我勁得多 , 佩服 . ^^
      今次之所以想試棍波 , 都係因為次次都自動波 , 想轉一轉 , 知就知冇自動波咁舒服 ,
      不過人一世 , 物一世 , 點都要試一試佢 . XD
      另外如果係大直路 , 開快小小都唔會覺得快 , 不過你講得好正確 , 好用神架 .

      刪除
  3. 我6月尾想去沖繩自駕﹐但我好多年冇渣過車﹐我驚到時自動波都唔識渣

    回覆刪除
    回覆
    1. 咁又唔駛咁驚 , 沖繩一向都係自駕天堂 , (雖然我未試過) 應該冇問題既 .
      係咁咦楂一陣就可以熟習番晒 . ^^

      刪除

歡迎光臨 , 如果時間許可 , 請留番個言丫 ~