Hello !
話都冇咁快又到星期日 , 本周對於我黎講有兩單大事 .
第一單係車仔提前攞英超冠軍 , 只要今晚果場能夠擊敗水晶宮 ,
就算次席既阿仙奴餘下賽事全勝都冇用 , 希望今晚能夠攪掂佢 .
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
另一單就比較切身 , 就係日前發現浴缸水龍頭有漏水跡象 ,
起初以為只係水尾 , 點知即使扭到幾緊 , 都不停咁滴水 ,
雖然唔算好嚴重 , 不過始終都困擾 , 試過搵個膠盆裝住D水 ,
一晚過後都滿到瀉 , 咁就非解決不可咯 . =_= !!
漏水呢樣野 , 有兩種可能 , 一係就水喉皮蝕左 , 一係就真係壞左 .
再睇下個水龍頭 , 都用左相當時日 , 費時換水喉皮 , 換個個新款好過 .
所謂長痛不如短痛 , 反正一個正常既水龍頭 , 應該用到好多年 .
睇呢個就知啦 , 起碼用左十年以上呀 .
之但係若然搵人黎換 , 連工包料都幾係野 , 早排依稀記得睇過
Blog友 Maggie & Kaykie 既 DIY維修水龍頭 網誌 , 應該都唔係太難 ,
相信自己黎都攪得掂 , 咁就無謂俾錢人賺 , 慳得就慳嘛 . ^_^ !!
於是乎出去買料 , 市面上都有好多款式 , 求其揀一款算數 ,
反正是但一款都會新款過依家用緊果隻 . XD
就呢款啦 , 四四正正咁 , OK啦 . (連同所有配件)
順便換埋條花灑喉 , 長D好用D .
準備好未 ? OK就開始 , 第一件事係關水掣 , 電視劇都睇唔小啦 ,
好多主角就係忘記關水掣 , 攪到間屋一鑊粥 . haha ...
首先用士巴拿鬆開兩邊螺絲 , 拆走舊水龍頭 .
裝上新配件 , 基本上呢兩塊野可有可無 , 不過橫掂俾埋 , 順手裝埋佢啦 .
入番兩個膠圈落去 , 再對番兩個窿裝上去 , 上緊就OK .
拆走舊果個就冇所謂 , 安裝新水龍頭果陣 , 記得用毛巾包住粒螺絲黎擰 ,
否則刮花晒粒螺絲就唔係幾好啦 , 切記 !!
出去開番個水掣 , 試過D水 , 掂呀 !!
就係咁樣 , 非常之簡單 , 如果俾人換 , 要約時間之餘又要俾錢 ,
費時失事 , 最重要係DIY , 好玩好多 , Yeah !
Bye Bye !
P.S. : 今晚P.M.8:30 nowtv 621台 , 車仔封王戰 , 約定你地呀 . ^^
man wai,勁呀!1733比一百個like你呀。
回覆刪除一百個like ? 咁多 , 呢D只係普通料 , 俾咁多會囂架 . haha ...
刪除你應得既,囂得好吖。
刪除既然咁講 , 咁就收住先啦 . XD
刪除有時會覺得 man wai 你係咪真係女仔,定係只係個網名咋 XD
回覆刪除我都有咁諗過。
刪除Nerissa : haha ... 乜咁睇我呀 , 依家呢個時勢 , DIY都係大勢所趨唶 . ^^
刪除工具同士黏膠布都有, 咁唔駛做IT啦, 做水喉匠都搵到食
回覆刪除唔好玩我啦 , 呢D只係手板眼見 , 太深入果D好似要考牌喎 . XD
刪除莫講話你係女仔,好多男仔都唔識做,佩服!
回覆刪除又唔係講到咁高難度 , 對號擰螺絲唶 .
刪除男仔唔係唔識 , 只係懶得做 . ^^
DIY 也是我的嗜好,屋企的廁所、廚房星盤、來去水喉、水龍頭,我也是DIY:-)
回覆刪除Wow ~ 前輩呀 , 勁 !!
刪除不過DIY的確係幾過癮 , 尤其係攪得掂 , 唔駛搵人執手尾 , 好有滿足感 , 又慳錢 .
真係要俾個Like你 XDD
回覆刪除都係在你果度學野唶 . ^^
刪除亞老爺有電牌,家中電器有壞,鍾意自己研究修理^^
刪除咦 ~ 有電牌 , 勁喎 , 又一位前輩 , 今次真係班門弄斧喇 . haha ...
刪除man wai, 你好勁呀! 我好佩服你呀!
回覆刪除其實係想慳錢 , 焗住頂硬上 , 好彩攪得掂 . ^^
刪除