2016/02/29

3日兩夜大阪行 領回G10篇B




Hello !


上回講到到達關西空港 , 在裡面磨爛蓆 ...

好唔容易磨到06:00 , 同上次一樣 , Jetstar 開始有人做野 ,

不過案內所就未有人 , 唯有食個早餐再多等一陣啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

終於等到07:00 , 案內所有人喇 , 第一時間衝入去問 .

佢查左一陣話 : 冇喎 ? 等我同你向警察局問下 , 如是者又打左個電話 ,

不過都係話冇喎 , 佢話 : 如果唔介意 , 可以在呢度等消息 .

我話約好左今日黎攞過喎 , 連Code no.都有 , 於是佢再打多個電話 , 

之後話 : 唔係在呢度領取 , 而係在南海鐵路果邊 , 

係喎 ~ 果陣在電話同佢講 , 依稀聽到南海呢兩個字 , 

只係當時認定左係機場 , 所以先搵機場案內問餐飽 .  XD

佢好好人呀 , 仲指引埋我點樣去南海鐵路果邊 , 

真係要講聲唔好意思兼唔該晒 , 只怪自己唔醒目 , 

不過過程唔重要 , 結果先至係重點 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住過去南海鐵路果邊 , 就在 T1 & T2 之間連接點果頭 , 

去到問一問個職員 , 佢即刻就知道乜野一回事 , 引領我入去佢既駅務室 .

就係由呢度入去 .


駅務室 , 特別警戒實施中 ...

好似好勁咁 , 唔知唔知既人仲以為乜野事 ?


入到佢 , 佢俾張Form我填 , 大致上係姓名 ~ 地址 ~ 電話 , 

最後係簽署 , 攪掂之後佢拎部相機出黎 , 好 ~ 果然係我既G10 , 

仲要電池 ~ 記憶咭 ~ 操作性能完全OK , 實在太好喇 .

(果陣應該係由個篋跌落地下 , 個套又唔係好硬淨 , 幾驚會崩咁一忽)

完成整個移交程序之後 , 第一時間過番機場果邊 , 

用佢個wifi黎寫番篇網誌報平安 , 即係呢一篇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

果陣只不過係07:30 , 仲有一日時間作市內觀光 , 

本來想去 海遊館 ~ 摩天輪等地方 , 不過臨急臨忙冇準備路線圖 ,

雖然可以即刻問旅遊案內 , 之但係諗過 , 果日係星期六 , 

果D地方可能會勁多人 , 不如轉一轉場 , 去番D熟路既地方 , 

就係出難波 , 先去黑門市場幫襯佢既壽司早餐 , 

食完再去行 BIC Camera ビックカメラなんば店 , 果度有成七層樓 , 

逐層睇都有排睇 . 最後就仲精彩 , 就係去果個世界之大溫泉 .

http://www.spaworld.co.jp/ 上次去果陣趕頭趕命 , 

今次由13:00 玩到 19:00 , 足足6粒鐘 , 真係浸到甩皮都仲得呀 , haha ...

但係又唔覺得好耐喎 , 正式係快活不知時日過 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就返回酒店 , 翌日晨咁早出機場 , 返到黎香港只不過係中午時份 .

就係咁 ~ 結束整個G10移交之旅 , 雖然辛苦 , 不過都幾好玩 .

Bye Bye !

後記 : 今次能夠領回G10 , Blog友 Johnson young 既功勞最大 , 

我可以好肯定咁講句 , 如果冇佢咁積極咁指引 , 

單憑我係絕對冇辦法可以搵呢D資料 , 因為我個心已經死左 .

今次之旅除左領回G10之外 , 仲係見証人間有情 .

如果在香港等地遺失相機 , 肯定唔知去左邊 , 正式係屍沉大海 . 

而今次能夠寫埋第6日半打後既網誌 , 

真係要再一次多謝 Johnson young , 多謝晒 !!



8 則留言:

  1. 搵番咖相機 可以有番D相 真系超級高興,雖然可以話買個新相機 但有時D野錢真系買吾番來,
    好似D美好回憶既旅行相 有時真系無價咖~~比我都會飛番去擰番咖相機呢~

    回覆刪除
    回覆
    1. 係呀 ~ 錢冇左可以再搵 , 雖然話旅行可以再去 , 但係唔見左果輯相 , 始終都有D遺憾 .
      依家可以填補呢個遺憾 , 洗小小錢 , 唔緊要啦 . ^^

      刪除
  2. 喺香港唔好話相機,留低把靚遮喺快餐店咋,個頭都無咗 >_<
    失而復得,真係飲得杯落,恭喜哂~

    回覆刪除
    回覆
    1. 係呀 ~ 全因為咁樣 , 所以我先至冇晒信心囉 ,
      日本真係一個充滿奇蹟既地方呀 . ^^

      刪除
  3. 恭喜師姐可以拎番部相機,令到之後北海道之旅遊記可以寫得更完整比我地參考呢!
    上網睇過果個世界之大溫泉好似幾正下,玩足全日唔出奇,有D興趣去果度玩

    回覆刪除
    回覆
    1. 多謝晒 , 全靠Blog友既積極態度 , 我先至可以失而復得 , 真係要多謝咁多位支持呀 .
      果個世界之大溫泉真係大到得人驚 , 其他果D無法比擬 , 而且收費又唔貴 , 絕對值得去架 .

      刪除
  4. 其實関西空港有airport lounge,裏面有獨立按摩椅間隔,可一邊按摩,一邊睇私人电視及聽音樂,亦有保管箱,仲包熱毛巾,雜誌,飲品,亦可冲涼。3,4仟Yen 可用上6-9小時。在機場案內所申請kix 卡可享5折優惠,真係非常超值,最適合等轉機休息使用。在機場食野,購物亦可享折扣。下次不防申請返張。
    此外,見妳回港後第一篇blog.....所以.....
    深夜了,明晚再講。

    回覆刪除
    回覆
    1. 果間 KIX lounge J少都有介紹過 , 當日佢門口寫住個滿字 , 所以都唔敢入去問 , 其實係咪要預約架 ?
      另外見我回港後第一篇blog... ? 究竟有乜問題呢 ? 願聞其詳 . ^^

      刪除

歡迎光臨 , 如果時間許可 , 請留番個言丫 ~