2016/02/02

高清翡翠台 神鵰俠侶




Hello !


尋晚講開電視 , 今晚一於繼續 , 唔好俾佢停 .

今次講既係內地版 神鵰俠侶 , 呢套劇在開拍時已經新聞多多 , 

最主要都係話小龍女一角由 陳妍希 飾演好有問題之類 , 

更有網民以 小籠包 之名相贈 , 認真刻薄 .   >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

幾經波折之下 , 最終拍畢及被 TVB 收購 , 在收費台播放 , 

(要收費當然唔會幫襯啦) 而就在上個月開始 , 安排在翡翠高清台重播 , 

雖然中港台拍過無數版本 , 不過只要係神鵰俠侶 , 始終都有市場 , 

我都當然唔會例外啦 , 睇左幾個星期 , 覺得都唔係咁差丫 , 

相反仲幾好睇添 , 尤其係飾演 李莫愁 果位 , 更加係索到離譜 ,

一直睇到尋晚到達戲肉 , 由霍都率領金輪法王等人 , 直踩上英雄大會挑戰中原群雄 , 

睇完之後意猶未盡 , 再上Youtube度翻睇一次內地普通話版本 , 

正式係唔睇就尤自可 , 一睇就出事 , 當場怒從心中起 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

想講既係 , 原來TVB版本既裡面劇集 , 刪剪了好多精彩片段 , 

其他既唔知 , 淨係講番尋晚果集 , 正反兩派各出三人 , 以三盤兩勝對戰 , 

首先由 朱子柳 vs 霍都 , 果Part已經剪左好多對戰鏡頭 , 

下一Part 武三通 vs 達爾巴 , 更加係成段冇左 , 鏡頭一轉就應聲跌入屋內 ,

再黎係 楊過 vs 霍都 , 衰到連 霍都 中毒針都冇埋 , 

好快就跳到去擊倒 達爾巴 , 咁中間果D 九陰真經 移魂大法 去左邊度 ?

跟住 小龍女 vs 金輪法王 , 又係草草交代 , 一兩個回合就轉為 郭靖 出手 , 

正式係剪到九彩 , 駛唔駛呀 ? 乜好趕時間咩 ? 係就不如唔好播 .

難道驚暴力得滯 , 電檢署唔過關 ? 香港既電視尺度 , 幾時連內地都不如架 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

我都明白有時D婆媽文場戲 , 的確係悶到抽筋 , 不過到左武打場面 , 

正式係全套劇既高潮位 , 咁樣剪到支離破碎 , 正式係唔知就好地地 , 

知道就火都黎 , 一集裡面都剪咁多戲肉 , 之前果D都唔知剪左幾多 , 

唔通要上Youtube翻兜 , 重新睇一次 , 之但係要捱字幕 , 

睇TVB粵語就唔完整 , 正式係針冇兩頭利 .

Bye Bye !

發洩完一輪 , 舒服晒 ~ 

以下有D電視劇照 , 好精彩架 .  ^^

小龍女   =_= !!


金輪法王


郭靖 & 郭芙


一眾群雄






16 則留言:

  1. 一眾群雄咁似收工feel @_@

    回覆刪除
    回覆
    1. Mandy姐果然眼利 , 張相係擊退群奸 , 對方落荒而退時影既 . ^^

      刪除
  2. 煲冬瓜都要睇字幕@o@?唔係呀化=_=|||唔通你以前喺學校上普通話堂嗰陣走咗去發白日夢?xD"

    回覆刪除
    回覆
    1. haha ... 呢樣講起黎真係見笑 , 可能我係上一代人 ? 普通話並未編排在校內課程 .
      之後工作亦唔需要用 , 所以冇乜點接觸 , 實不相瞞 , 如果睇一套普通話劇集 ,
      完全唔睇字幕既話 , 只係明白四成左右 . >_< !!

      刪除
    2. haha...算起上黎我都係上代人, 校內課程都無煲冬瓜呢科 :P
      我果四成左右功力都係睇台劇學番黎

      刪除
    3. 用上一代人黎形容又好似誇左D , 不過唔知邊一年學校要學埋普通話既呢 ?
      咦 ~ 你都係四成 , 唔好咁謙喎 . XD

      刪除
    4. 友季都係上一代,工作同事雖然都有大陸人,不過都以英文溝通,佢地知我唔識煲冬瓜,就講曬英文,其實佢地都覺得講英文好似威啲。

      刪除
    5. 學校要學埋普通話呢科, 係未董伯伯果年開始架, 好似話乜兩文三語咁上下掛!?
      真係四成咋 :P

      刪除
    6. 友季 : 如果能操流利英語 , 又確實係幾有型 . ^^
      咦 ~ 呢度都好多上一代人喎 . haha ...

      刪除
    7. Fung Mandy : 原來係董伯伯做既好事 , 咁就認左做上一代人啦 . haha ...
      除左語言唔同之外 , 佢地仲有好多專有名詞 , 所以正宗香港人都幾難百份百聽得明 . =_= !!

      刪除
    8. 都係架, 報章果D專有名詞, 真係睇到呢...都唔知話佢地水平高咗, 還是我d學力差 =_=

      刪除
    9. Fung Mandy : 叫做互相感染啦 , 依家既香港 , 都多左好多內地詞彙 .

      刪除
    10. manwai姐:友季公司好似聯合國有黑人有孟買人,今年仲請咗個尹朗人,唔識英文係一定無得撈㗎。內地用語最憎啲人用一次性,乜鬼野都一次性,好似一次性收費,一次過收費係咪清楚好多呢=_=!!

      刪除
    11. 友季 : 聯合國咁激 ? 唔通係國際學校 ? ^^
      一次性又的確係怪左D , 通常我都會講 : 一鋪過 或者 一招了 . haha ...

      刪除
    12. 施主真係有慧根,友季確實在越來越國際化的學校工作,聽其中一個professor講,話個尹朗人響尹朗係造導彈㗎,所以我哋啲學生唔知佢講乜。一次性係我最常聽到的大陸用語,一鋪過都好地道.好清楚。

      刪除
    13. 慧乜鬼野根丫 , 求其亂估咋 . 咁都撞得中 , 真係烏蠅都會撞紙鳶 . haha ...
      P.S. : 唔好意思 , 係 伊朗 , 並不是 尹朗 . XD

      刪除

歡迎光臨 , 如果時間許可 , 請留番個言丫 ~