2016/09/18

2016砌機專輯(一)




Hello !


今次呢輯網誌叫做 2016砌機專輯 , 

係記錄低新買電腦點樣砌 , 俾自己一個參考 , 

如果寫教學就未免班門弄斧左D , 皆因外面高手如雲 , 

淨係 t先生 既電腦知識已經遠在我之上 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 言歸正傳 , 上篇再上篇網誌講到買齊所有配件 , 

2016年度砌機 , 立即開始 , 首先打開底板果盒 , 挖晒D野出黎 .


拆開膠袋 , 拎塊底板出黎放在檯面 , 下面最好有野墊住 .


跟住拆開CPU個盒 , 拎粒CPU出黎 .


掀開CPU蓋 , 見唔見左下角有粒小圓點 .


用果個位黎對番CPU個三角標誌 .

放下之後係咁咦郁下佢 , 睇下D針對唔對位 , 不過基本上都好難插得錯 , 

但係插錯就好大劑 , 所以都係小心D好 .


攪掂就Cup番埋個蓋 , 保護膠蓋會自動彈出 .


完成呢Part就係咁樣 .


跟住輪到CPU風扇 , 之前講過呢款CPU唔連風扇 , 

又嫌水冷太貴 , 最後揀左呢款 212X , 個樣好鬼勁 .


又係拆開包裝盒 , 挖晒D配件出黎 .


鐵片安裝在底部 .


上面多左四粒螺絲位 .


打開個叉試下D螺絲位置 , 唔同型號CPU有唔同既位置 .


試完位置拎番開個叉 , 加小小散熱膏在CPU上面 .

有人鍾意查牛油咁掃勻佢 , 我就就咁算 , 反正都會熱溶佢架啦 .


跟住將風扇拆開先 , 方便安裝 , 

仲有 ~ 記得掀開包裝膠紙 , 否則傳唔到熱 , 就冇左散熱既意思 .


將個叉仔放中間 , 逐粒螺絲慢慢擰 , 千祈唔好一次過鎖死一粒 .

即係每粒擰小小 , 直至每一粒都擰實為止 .


完成大至上係咁款 , 同原廠CPU風扇比較 , 呢款誇張好多 .


確定穩陣之後 , 插番把風扇上去就OK .


跟住就係裝Ram , 依家D Ram 靚仔左好多 ,

還記得以前只係兩條綠綠地色既電路條咁 , 真係時代進步 .


兩條Ram應該點插法 ? 睇番底板說明書就有講 .


又係有晒坑位 , 想插錯都唔係咁易 .


CPU ~ 風扇 ~ Ram , 三樣都OK .


擺住呢度備用 , 下一Part就到拆機箱 .


呢篇講住咁多先 , 依家要出去捉精靈 .

下Part再見 .

Bye Bye !



2 則留言:

  1. 嘻嘻散熱膏唔會似牛油遇熱會溶 ^^ 正常都係掃平佢至平均散熱到 heatsink

    回覆刪除
    回覆
    1. 我就咁壓舊野落去咋 , 冇掃平佢呀 , 應該唔怕掛 ? XD

      刪除

歡迎光臨 , 如果時間許可 , 請留番個言丫 ~