2014/02/26

未食先影涉侵權




Hello !


自從由Yahoo搬過黎呢度後 , 好似好耐冇寫過呢類小道消息 , 

襯今晚得閒 , 一於整番篇戥腳都好 .  ^^

今日頭條 : 未吃美食先影相 , 或侵大廚知識產權 ...


依家社交網絡盛行 , 經常見人未開餐先影低 , 

再放上 Facebook 同人分享 , 不過原來咁樣做 , 會引起大廚不滿 , 

認為冷落了食物之餘 , 甚至侵犯左大廚既知識產權喎 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~

報導話法國南部一間米芝蓮三星餐廳 "古戎" 認為 , 

食客為食物影相不但失儀 , 更重要係將相上載社交網站 , 

令其他人對佢既精心傑作失去驚喜 , 侵犯左佢既知識產權 , 

其他名廚亦認同佢既說法 , 所以在餐牌上面寫明 : 

"不准拍照 , 否則後果自負" (後面果句我加既 haha ... )

佢地又話 , 以前D人影相都係影D一家大細用膳景象 , 

家陣D人係又影唔係又影 , 影完再上載 , 仲要等到有 like 先捨得食 . 

D野都攤到凍晒 , 好唔尊重廚師一番心血 , 所以先至咁扯火 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果係名廚 , 有呢種諗法 , 都可以理解既 , 

因為佢地已經將料理創作 , 成為一門藝術 , 見到自己既心血

俾人咁樣糟蹋 , 唔慶就有鬼 , D人又係衰既 , 

影相既野 , 求其咪算囉 , 駛唔駛好似影 "沙龍" 咁呀 , 

就好似我頭先食個鐵板餐 , 一張起二張止 , 

影完再食都仲係熱辣辣 , 咁咪免傷和氣囉 .  ^_^ !!


開餐喇喂 , 正呀 ~

Bye Bye ! 

2014/02/23

唔講都唔知




Hello !


今個星期比較忙碌 , 所以更新都小左 , 不過下周都唔好得幾多 , 

冇辦法啦 , 收工後得幾粒鐘 , 梗係重要野優先啦 . XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

在 "廣島縣" , 即係境港市下面有個貓島 .

其實 "日本" 仲有好多貓島" , 係咁咦都搵到兩個 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第一個叫做 "田代島" , 位於 "仙台" 隔離 , 即係沿海既 "石卷市" .

果度貓隻既數量 , 比居民還要多 , 真係正到爆 .  ^_^ !!

另一個 "貓島" 叫做 "青島" , 呢個就在 "愛媛縣" , 

即係 "廣島縣" 下面 , 其實同 "兔島" 差唔多左近 , 

如果遊覽 "兔島" (大久野島) , 順便可以參觀埋呢個 "貓島" (青島)

當然係 "貓島" 比較主打D啦 , 上到去肯定唔捨得走 .

搵日去參觀下都好喎 .  ^^  (次次都係咁講 , 攪掂今年行程先啦)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講開今年行程 , 雖然仲有相當時日 , 不過我已經晨咁早地申領左個國際牌 , 

橫掂每年只係用一次 , 閒來領取急時用 , 總好過臨急臨忙先申請 .

就係佢喇 , 早幾日寄掛號信 , 不過冇人收 , 要去郵局領取 . 


今次相裡主角係 古川いおり


計埋未用既呢個 , 總共申請過五本 .


至於搵到乜野行程 , 下周先講解 . 

Bye Bye !

2014/02/19

來自星星的你套餐




Hello !


今日頭條 : "星星" 對白打救雞農 ...


韓劇 "來自星星的你" 果然魅力沒法擋 .  ^_^ !!

好一句 : 下雪了 , 怎能沒炸雞啤酒 , 攪到我雞癮大發 , 

襯今晚天寒地凍 , 整番餐炸雞&啤酒都唔錯喎 .

雖然唔係正宗韓式炸雞 , 啤酒亦唔係韓國牌子 , 不過取其意景 , 

再配埋個 "葡撻" , 好耐都未試過咁暢快 , Yeah !!


不過凡事都要適可而止 , 就好似上圖報紙單新聞 , 

話有位 "湖南長沙" 姓楊女子 , 煲劇期間連續食8餐炸雞 , 

攪到滿面生暗瘡 , 要搵醫生求助 , 又有其他人都係食呢味 "煲劇套餐" , 

體重直線上升 , 更甚者狂食炸雞導至患上胰腺炎 , 都咪話唔誇張 .

就算好似我咁 Fit 到漏油 , haha ... 都唔敢經常食呢味野 ,

總之煲劇還煲劇 , 萬事都要自己執生啦 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~

講開呢套劇 , 今晚 "韓國" 果邊播完 , 正常情況下 , 

聽日就有更新 , 而劇情進入白熱化階段 , 究竟會點樣結局呢 ?

令到一眾 "星星迷" (包括我) 極之期待 , 希望快D到聽日啦 . ^^

今晚講住咁多先 , 要做運動減番剛才果餐 , 請呀 !

Bye Bye !

2014/02/17

相金先惠 , 格外留神




Hello !


今日頭條 : 現金入油 , 先收五舊 ...


今晚本來想講果單 "廣東道唱蝗事件" , 不過類似既話題 , 

以前在 yahoo Blog 都講過 , 不外乎都係 "冤有頭 , 債有主" , 

"城門失火 , 殃及池魚" , 與及 "禍不及遊客" 等等 ... 無乜新意 .

不如轉講今日 "太陽報" 頭版果單 , 呢單比較有意思 .  ^^

話說近日有不法之徙往油站入油 , 聲稱以現金付款 , 

待入滿油及關上油蓋後 , 立即踩油 , 逃走無蹤 .

由於 "騙徙" 以假車牌掩飾 , 所以即使報警亦奈佢唔何 , 

部份油公司為免再有損失 , 今後但凡聲稱以現金入油者 , 

一律先收 $500 按金 , 攪掂後再多除小補 .

~~~~~~~~~~~~~~~~~~~~~~~~~~~~~~~~~~~~~~~~~~~~~

依家D人真係衰到冇朋友 , 雖然D油價都幾貴下 , 

都唔駛咁樣黎出蠱惑呀嘛 , 人地油公司都要成本 , 

個個係咁走數 , 搵呀水開油站咩 ?

所以中午食飯時間 , 我反覆咁諗有乜野對策提供俾油公司 .

(我始終認為先收 $500 按金並非治本之法)

~~~~~~~~~~~~~~~~~~~~~~~~~~~~~~~~~~~~~~~~~~~~~~

在食飯時諗起好耐之前玩過一款賽車 Game , 叫做 :

NEED FOR SPEED HOT PURSUIT 2

內容除一般賽車外 , 仲加插埋警車追捕 , 一方面要鬥快 , 

另一方面要逃避警車 , D警車會用車頭勾你車尾 , 

攪到你甩尾而被捕 , 另外有一招係用直升機放炸彈 , 

炸到你反車被捕 , 最後一招亦係最陰濕既一招 , 

就係在轉灣位放置類似 "狼牙棒" 既鐵釘鍊 , 只要一駛過鐵鍊 , 

即時爆軑 , 乖乖就擒 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~

油公司用呢招都唔錯 , 只要有車駛入入油 , 即時在出口擺 "狼牙棒"

鐵釘陣 , 如果有車想走數硬闖 , 肯定四軑齊爆 , 插翅難飛 .  ^_^ !!

待銀油兩訖後 , 再收鍊放人 , 好過次次收按金 , 攪到好似好Cheap咁 .

好 ~ 一於將呢個辦法提供俾油公司先 . 

最多唔收佢顧問費 . haha ...

Bye Bye ! 

2014/02/12

地鐵奇案




Hello !


今次呢單料本來唔應該拎出黎討論 , 

皆因人地已經咁慘 , 仲要踩多兩腳 , 有D在傷口灑鹽Feel ,

不過叫做有小小反面教材作用 , 所以姑且講下啦 .

淨係睇個標題都知道幾咁慘烈 . XD


首先我一向叫開 "地鐵" , 忽然叫做 "港鐵" , 真係有D唔慣 .

講番案情 : X小姐去年中早上搭地鐵 , 由 "石峽尾" 往 "迪士尼" ,

由於正值繁忙時間 , 車廂內迫滿晒人 , 上車後只能站在門邊 , 

車門關上時突然被後面乘客推前 , 令其左邊胸被車門夾住 , 登時痛得大叫一聲 , 

豈料車門並未有打開 , 列車更連隨開動 , 當時身邊有男士問需要幫忙嗎 ? 

但礙於夾正敏感部位 , 唯有尷尷尬尬地婉拒其好意 , 自己再諗辦法攪掂 , 

攪左足足成分鐘先至令其鬆綁 , 去到太子站轉車時 , 試過問職員可否借

洗手間檢視傷勢但被拒絕 , 焗住去到迪士尼站先至慢慢Check真佢 .

之後既事就係追究責任問題 , 但係個個都話 : 唔關我事 !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

案情就講到呢度 , 由於一切仍然在追究中 , 不便評論責任誰屬 .

今次想講既係 , 發生呢D事 , 固之然不幸 , 但難度亦都頗高 , 

首先等閒既級數 , 都難以做到胸部被車門夾中 , 起碼都要有 JULIA

或者 新山らん ~ 佐山愛 ~ 西條るり ~ 吉川あいみ ~ 宇都宮しをん ~

春菜はな ~ 保坂えり ~ 橘優花 ~ 仁科百華 ~ めぐり ~ さとう遥希 ~ 

椎名まりな ~ 尾上若葉 ~ 沖田杏梨 ~ 乃々果花 (仲有好多 , 未能盡錄) 

要有以上是但一位既可怕級數 , 先至有機會被夾得到 , 

香港地普遍都係 iPad胸 , 即使想特登被夾中都難 , 

所以今次既事 , 可以話係不幸中既不幸 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後想帶出一個訊息 , 就係如果部車真係太多人 , 

只有等下一班車 , 夾硬質上車既話 , 隨時有意想不到既意外 , 

仲記得以前未有月台幕門 , 只係得條黃線 , 排頭位等車被迫落路軌 , 

絕對唔係天荒夜談 , 所以寧願等耐D , 遲到好過冇到 . 

Bye Bye !

2014/02/11

你敢唔敢坐 ?




Hello !


上篇既 "成田機場" 暴風雪開始減退 , 

滯留既旅客亦陸續返港 , 咁咪幾好 ~ 

班團友返到香港記得嘉許旅行社及領隊呀 , 

做人千祈唔好忘本 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~

今次呢篇想講 , 雖然冬季既 "北海道" 有佢既不便 ,

不過凡事都兩面睇 , 有佢唔好 , 自然會有佢既好處 , 

唔係都唔會有咁多旅客滯留啦 .  XD

今日睇 "頭條日報" 既介紹 , 話 "北海道" 有熱氣球坐 , 

仲係冬季限定 , 手快有手慢冇 .


地點就在 "北海道" 既斜里果頭 , 如果好有興趣 , 

可以上佢提供既網頁度睇睇 . http://mashuukisen.com/

好耐之前睇過Blog友 小zoo 既網誌 , 介紹過有直升機坐 , 

可以在直升機裡觀看流冰 , 一定好過癮 , Yeah !!

估唔到家陣連熱氣球都有得坐 , 坐熱氣球觀賞流冰 , 

我個人認為更勝坐直升機 , 40分鐘旅程24000Yen , 

貴就貴左D , 不過都可以接受既 .  =_= !

~~~~~~~~~~~~~~~~~~~~~~~~~~~~~~~~~~~~~~~~~~~~~~~

只可惜發生過 "埃及" 果單野 , 對熱氣球可以話係敬而遠之 ,

雖然 "日本" 俾到既信心 , 點都大過 "埃及" 多多聲 ,

弊就弊在當日實在太過深刻 , 就算唔係親歷其境 ,

都可以感受到幾咁慘烈 , 所以都係唔好預我 ,

今次純粹介紹節目 , 如果有興趣 , 自己幫襯啦 . 

Bye Bye !

2014/02/10

冬天出門唔多盞(3)




Hello !


"冬天出門唔多盞" 呢個系列 , 正式係長做長有 , 

就今日 "蘋果" 頭版都係講呢味 .  =_= !!

不過今次主角唔係 "新千歲機場" 而係東京既 "成田機場" .


受到急速低氣壓所影響 , 日本週六多處落大雪 , 

東京積雪高達22厘米 , 因積雪關係 . 子彈火車停駛 , 

高速公路又封閉 , 多家航空公司停飛 , 做成種種不便 ,

更甚者係因為今次暴雪而受傷人數 , 起碼500人 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~  

日前有團經東京返港既 "北海道七天團" , 滯留東京成田機場,

當中有團友扶老攜幼,嬰兒奶粉耗盡 , 長者藥物亦冇預鬆 ,

攪到兩頭唔到岸 , 有家長表示想買支水都難 .

~~~~~~~~~~~~~~~~~~~~~~~~~~~~~~~~~~~~~~~~~~~~~~

去旅行攪到好似走難咁 , 認真唔老黎 , 

希望今次暴風雪盡快攪掂啦 .

Bye Bye !



2014/02/08

英超快樂 ^^




Hello !


今日係年初九 , 農曆年氣氛漸漸地減退 , 

而今晚就係開工後首次既 "英超" 聯賽事日 ,

為左隆重其事 , 收工特登去入定D蝦條 , 薯片 , 粟一燒 , 

當然唔小得 Asahi 啦 .  ^_^ !!


早場正係一場大戰 , 利物浦 vs 阿仙奴 , 只要客隊失分 , 

車仔 & 曼城就有機會上位 , 雖說是 : 若要生活好 , 咪買利物浦 , 

不過今次點都要扒逆水 , 支持利物浦 , Yeah !!

就黎開場喇 , 第日再講過 .

Bye Bye !

2014/02/07

開工大吉之非常唔慣




Hello !


話長唔長既農曆年假 , 尋日經已圓滿結束 . 

今日(年初八)正式開工大吉 , 第一日返工總結係 ...

非常之唔習慣 .  >_< !!

今朝一踏入公司已經心感不妙 , 有種周身唔聚財既感覺 ,

雖然工作量唔多 , 基本上可以話只係行行企企 ,

但係心情同早幾日就差天共地 .

唉 ~ 俾多小小時間啦 , 假以時日 , 一定可以平復番D放假情緒 .

~~~~~~~~~~~~~~~~~~~~~~~~~~~~~~~~~~~~~~~~~~~

之但係收工過後就大把節目 , 首先係食晚飯 . 

返到主場睇 "愛回家" , 攪掂即刻轉台睇 "來自星星的你" 第15集 ,

呢套就犀利喇 , 開始進入高潮位 , 非睇不可 .  ^^

最後就係 "我是歌手2" , GEM繼續發威 , 勁 !!

OK ~ 今晚講住咁多先 , 第日再玩過 .

Bye Bye !

2014/02/05

一生旅遊債 , 計都計唔晒




Hello !


今日係年初六 , 計埋今日只係剩番兩日假期 , 

皆因做野果度初八就啟市 , 認真無癮 , 本來公司預算在初十一 , 

即係下個星期一啟市 , 不過果日話唔好日喎 , 

結果改為星期五 , 白白咁小左兩日 , 真係迷信 , 激氣 !!

~~~~~~~~~~~~~~~~~~~~~~~~~~~~~~~~~~~~~~~~~~~~~

算啦 , 一切既成定局 , 唯有好好咁享受埋呢兩日假期 ,

其實所謂既享受 , 只不過係在家裡煲劇同埋搵旅遊景點 .

首先講煲劇 , 繼早前煲完日劇 Doctor X I & II 之後 , 

再煲埋呢套 : 35歲の高校生

 

講開呢一套劇 , 話說當日在 "奧尻島" 時 , 都曾經睇過佢一集 , 

http://1226manwai.blogspot.hk/2013/08/2013_6639.html

不過全日文冇字幕 , (只能靠估) 當然唔知佢講乜啦 ?

尋日終於睇埋個結局 , 套劇既內容即係學生版既 GTO , 

又係每集解決一個迷途學生既問題 , 詳細劇情就唔講喇 .

最想講既係佢(米倉涼子) , 最尾果幾集要黎避世既漁港 , 

果度好正架 , 一見到果D食堂 , 就想叫番個 "雜錦海鮮丼" .  ^^

於是上網搜尋 , 睇下係乜野地方 ? 

原來係神奈川県三浦市三崎町城ケ島 , 一間叫做 "相模亭" 既食堂 .

位於 "橫濱市" 下面既 "橫須賀市" 最落既一個小島上 .

如果自駕遊既話 , 我有把握可以搵到果度黎幫襯 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~

其實呢種諗法都唔係第一次 , 記得好耐之前睇過日本電影 "惡人" ,

當時又係即時想去果個 "大瀬崎灯台" 參觀 .

之後睇完 "竹野內豐 & 上戶彩" 果套 流れ星 , 又想去 新江ノ島水族館 .

結果呢兩度都未曾一遊 , 相信今次都係得個諗字居多 .

如果每睇一套劇或一套電影就想去拍攝場景度參觀 , 咁咪好唔掂 ?

唯有將佢記錄在案 , 等待適當時機先解決佢啦 . XD

Bye Bye !

2014/02/03

初四啟市




Hello !


今日係年初四 , 整番篇網誌黎同大家拜年 .

首先祝大家馬年大吉 , 事事如意 !!


每年既農曆新年都大把節目 , 到今日先至稍為喘定 ,

不過節目年年都一樣 , 正式係倒模過年 .  ^^

首先係年初一 , 過另一頭家拜年 , 之後打牌打到食晚飯 , 

食完過番自己屋企睇花車巡遊 , 咁就一日 .

年初二就去食自助餐 , 食完磨到食晚飯 , 之後番屋企睇煙花 .

初三跑馬 , 跑到夜晚食飯 , 之後番屋企 , 又攪掂一日 .

(星期六 & 日仲有 "英超" 賽事 , 谷盡睇埋先訓覺)

直至到今日年初四 , 先至有番D私人時間 , 既然有時間 , 

不如就度下個 "北海道" 行程 , 之前唔知有冇講過 , 

今次度行程 , 比以往既難度高好多 , 之前既絕大部份都係沿海 ,

只要沿住海邊搵景點就OK , 不過今次屬於內陸行程 , 

暫時搵到既料只係好初步 , 幸好還有 3.5個月時間可以慢慢黎 .

家陣手頭上搵到幾個必遊景點 , 拎黎大家參詳一下 , 俾D意見丫 .

首先係 "旭山動物園" , 呢度睇人地既網誌就睇得多 , 今次一於解決佢 .

跟手係美瑛 "青い池" & 層雲峽 "黑岳" , 呢兩度Blog友 t 介紹過 , 好正架 .

之後係 BEAR Mt. 果度 Blog友 1733兄 介紹過 , 一流 !

最後係 "富良野" & "美瑛" 果D大路景點 , 求其搵本天書都有介紹果D .

暫時係咁上下啦 , 有咩野新消息再介紹過 .

最後再一次祝大家今年搵多D , 去多幾轉旅行 , 玩得開開心心 . 

Yeah !!

Bye Bye !