2014/03/30

花多眼亂




Hello !


今日係三月最後一個星期日 , 即係話好快就到四月 , 

不過距離5月尾仲有相當日子 , 唯有繼續搵料啦 .

~~~~~~~~~~~~~~~~~~~~~~~~~~~~~~~~~~~~~~~~~~

自從上次俾 http://home.hokkaidotour.net/ 拒絕之後 . (因為唔識日文)

暫時對搵車都係投閒置散 , 主要都係搵景點 , 

得到Blog友提供 , 都有唔小好提議架 , 好似 : 俱多樂湖咁 .

呢度都聽過下 , 不過就唔多起眼 , 即使經過 "登別" 都冇諗過一遊 .

今次時間比較充裕 , 可以順路解決埋佢 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~

之後又去番搵車呢Part , 除了 hokkaidotour 之外 , (價錢比較平)

仲有好幾間可以揀 , 包括 http://car.orix.co.jp/

不過唔知會唔會需要識日文先至租 , 滿心歡喜揀好車被拒絕呢種刺激 , 

我受得起一次 , 受唔起第二次 , 所以都係睇定D先 .

另外有一間叫做 http://www2.tocoo.jp/cn 有中文版網頁 , 

呢間成功指數比較高D , 價錢唔太貴之餘 , 車款亦都好多選擇 .

好似下圖呢3款 , 係我一直心儀既車款 .


Note ~ 唔駛多介紹啦 , 以往好似講過 , 有D似 AQUA. (不過唔係混能車)

Cube ~ 上次去 "北海道" 都有諗過 , 最後揀左 AQUA , 外型好似 bB .

Forester ~ 租價就最貴 , 之但係就最有型 , 似足當年租過既 Rav4 .

(Blog友 nono姐都好似係租 Forester 呢款車 .)

~~~~~~~~~~~~~~~~~~~~~~~~~~~~~~~~~~~~~~~~~~~~~~~

聽講 Tocoo 會焗外國人買多一份保險 , 七除八拆之下 ,

可能同 Toyota 差唔多價錢 , 其實依家都未決定到架 .

話唔定谷鬼氣繼續幫襯番 Toyota , 所謂做生不如做熟 , 

幫襯左好幾年 , 唔多唔小都有份感情  .

今次睇下感情分與新鮮感 , 邊一樣會取勝 .  ^^

Bye Bye !

P.S. : 估唔到租部車都咁多學問 , 呢一點亦係好玩之處 , 

由一開始決定出門 , 無論景點 ~ 旅館 ~ 租車 , 

每一樣野都係抉擇 , 日日都腦交戰 , 務求做到最好 .

呢種感覺我鍾意呀 . Yeah !!

2014/03/29

PHILIPS AC4074 空氣清新機




Hello !


今晚本來睇波休息 , 不過呢單料新鮮滾熱辣 , 

攤凍左未必會拎黎寫 , 襯住仲有Heart , 攪掂埋佢先至睇波 .

~~~~~~~~~~~~~~~~~~~~~~~~~~~~~~~~~~~~~~~~~

早排咪話好忙既 , 除左搜集旅遊資料外 , 仲搵緊 "空氣清新機" 既資料 .

內地受到霧霾天氣既影響 , 天色變得一片陰霾 , 所謂冷空氣南下 , 

霧霾空氣亦都會南下 , "香港" 難以獨善其身 , 有見及此 ,

買番部 "空氣清新機" 在房裡 , 隔一隔都好丫 .

~~~~~~~~~~~~~~~~~~~~~~~~~~~~~~~~~~~~~~~~~~

市面上有成90幾種機款 , 經過詳細篩選之後 , 剩番呢兩個選擇 .

Sharp FU-D40A


另一款 Philips AC4074


經過詳細考慮之後 , 決定揀後者 .

因為寧願揀部貴D有料到 , 好過平小小不過冇料到 .  XD

由於屋企冇人收貨 , 谷盡自取 , 好重既呢 .  =_= !!


拆開包裝後 , 部機就係咁款 , 幾型仔喎 .  ^^


千祈唔好即刻插電開機 , 皆因裡面有四重過濾網用膠袋包住 , 

要逐一拆開再裝番上去 . (使用前先睇說明書穩陣D)

拆開膠袋裝好之後就係咁樣 , 裝番個蓋上去就可以正式開機 .


起初以為個大窿係要黎出風 , 好似無葉風扇咁 , 其實唔係架 , 

基本上只係裝飾 , 圈內有四級指示燈號 , 空氣最差果陣 , 會變紅色 .


後記 : 其實呢類 "空氣清新機" , 只不過屬於安慰劑 , 

因為唔通呢世都在房裡唔出街咩 , 出到街咪又係四圍都污染 .

叫做好過冇咁啦 .  >_< !!

Bye Bye !

2014/03/28

2014預算景點(二)八雲町育成牧場




Hello !


上回講到第二日遊覽完各景點之後往旅館 , 

而旅館亦經已落實住果間 "北湯沢温泉郷" 湯元 名水亭 (本店)

點解揀本店呢 ? 皆因佢比分店平2000Yen , 個溫泉亦唔差 .

以慳得一蚊得一蚊既大前題之下 , 唯有揀佢啦 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~

話咁快就進入第三日 , 跟住呢個景點就睇心情而決定 , 

即係可能去 , 亦可能唔去 , 就係隔離 "登別" 既忍者村 .

上次再上次既行程已經去過 , 不過係四月尾臨近 "黃金假期" , 

果度變得人山人海 , 只係睇左一個忍者打鬥既攪笑節目 , 

認真唔過癮 , 但係果度入場費連停車場要成3000Yen咁滯 , 

都咪話唔貴 , 所以真係好睇臨場決定 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~

即使去唔去 "忍者村" , 之後都係去呢個景點 , 就係 "八雲町育成牧場" .

老規矩 ~ 相片網上借住先 , 返黎先至還 .

好多牛牛呀 . haha ...

牧場呢類地方 , 我都好鍾意架 .

今晚睇 "我是歌手2" 攪晏左 , 講住咁多先 .

Bye Bye !

2014/03/27

北海道自駕遊 ~ 薪火相傳




Hello !


今次呢篇網誌 , 本來應該繼續講行程 , 

點解改為講心路歷程 ? 一切就要從午飯時說起 .

話說放午飯時在 "大X樂" 裡面 , 拎部手機出黎 Check 網誌 , 

見到一段來自Blog友 Paul Lui 既留言 , 內容係 : 

我去年九月去北海道,看左您的blog非常有幫助. Thank you !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後食飯期間 , 突然思潮起伏 , 種種前塵往事 , 湧上心頭 ...

早在 2009年果次 "北海道自由行" (非自駕) 之後 , 開始計劃明年 , 

即係2010年既 "北海道之旅" , 當時不斷查找旅遊天書 , 

搵下由 "札幌" 去 "登別" 應該點去 ? 搭 JR 去到 "登別駅" , 

再轉巴士上 "登別溫泉駅" 落車 ? 定抑或係Book旅館房間時 , 

預約埋接送服務呢 ? 但係我D日文咁水皮 , 點樣同佢溝通呢 ?

其他既景點又應該點樣行 ? 旅館又點接駁呢 ? 呢個問題都困擾左幾耐下 .

直至到在 Yahoo Blog度見到Blog友 Piggybread姐 以自駕遊方式黎遊覽 . 

覺得都唔錯喎 , 不過果陣確實有D淆底 , 皆因一直都認定左自駕遊

要對 "北海道" 非常了解與及日文能力有番咁上下 , 

再加埋資深既駕駛技術方可成事 , 所以果陣經常向其請教 , 

包括問夜晚泊部車在邊度 ? 入油入邊種 ? 多唔多抄牌 ? (正式係問題少女)

搜集到充足資料後 , 先至夠薑膽粗粗地自駕遊 , 所以Blog友

Piggybread姐 可以話係我自駕遊既啟蒙老師 , 又要特別嗚謝一番 .  ^^

就係咁 ~ 由2010年開始 , 我既自駕之路正式展開 , 

第一次自駕時所駕駛既車輛亦係 PiggyBread姐租既 Axio , 

呢部車係一部好好既練習車 , 我都係靠佢先至重拾番學車時既感覺 . 

雖然係搜集充足 , 不過都發生左唔小蝦碌事件 , 

包括唔識得點樣拎番條車匙出黎 , (原來要質入去再扭) 

同埋未鬆手掣就開車等等 ... 好彩只屬小問題 , 叫做得啖笑咁啦 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

時至今日 , 經過四次自駕遊既歷煉 , 已經成為左高手 . (自己認為)  XD

如果大家有乜野自駕遊既問題 (我知既話) , 都樂意為大家解答 .

因為自駕遊實在太好玩 , 自我既感覺太過良好 . haha ...

若然仲係要搭 JR加接駁巴士既話 , 相信即使會去 "北海道" , 

都係三幾年先去一次 , 亦未必會寫落網誌度記錄行程 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而今年既行程 , 將會在兩個月後開始 , (賣定廣告先)

期待今年既行程各方面 , 會比以往更加精彩 . 

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

P.S. : 行程景點聽晚再講過啦 . 再 Bye Bye !

2014/03/25

2014預算景點(一)支笏湖




Hello !


上回講到參觀完 ノースサファリサッポロ 之後 , 

跟住既景點就係 "支笏湖" , 講開呢個湖 , 我都係第一次參觀 .

(相片在 3J家庭 網誌裡暫借 , 返黎再十倍奉還)  ^^


以前在Yahoo網誌果陣都見過好多Blog友遊覽 , 果度好正架 , 

同隔離 "洞爺湖" 一樣有觀光遊覽船搭 , 如果時間許可 , 

我都想一坐 , 大家有興趣既話 , 可以Click入下面網頁 .


~~~~~~~~~~~~~~~~~~~~~~~~~~~~~~~~~~~~~~~~~~~~~

攪掂完個湖之後 , 下一站係往旅館 , 話時話 ~

今次行程我想試一試hea住黎玩 , 即係唔似得以往行程扯到行晒 , 

度度都想去 , 影相影到手軟果隻 .  XD

而旅館方面 , 本來想在湖邊搵間旅館入住 , 

不過果度一係就唔做單身客 , 一係就太貴 , 谷鬼氣住遠小小好過 , 

反正有車 , 稍為偏遠都冇乜太大所謂 , 目標有兩間 , 唔係A就係B .



其實兩間都係同一集團 , 不過係本店與分店既分別 .

暫時以A餐成數高D , 因為晚餐有蟹腳 .  ^^ 

而B餐果間個溫泉就靚D , 但係就貴2000Yen一晚 , 真係好難揀呀 .

第二日既行程就係咁上下 . 

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~

P.S. : 聽晚有 "英超" 錄影睇 , 休息 ...

支持 "曼聯" !!

2014/03/24

ノースサファリサッポロ




Hello !


上篇話仲有兩個月左右就出門 , 即係大約60日 ,

假設每日寫一篇關於旅遊景點既網誌 , 唔知60篇寫唔寫得晒呢 ? 

(不過未必日日都寫 , 起碼逢星期六休息) 

而今次介紹呢個景點 , 係屬於第二日既行程 , 當日取車後 , 

首先去 "定山溪" 二見公園搵貓 , 之後就係去呢度 .



呢度叫做 ノースサファリサッポロ , 位處於 "定山溪" 附近 , 

主要以睇動物為主 , 4月26日開始營業 , 我5月尾先至到場 , 掂呀 .

至於果度有D乜野動物 ? 暫時我都仲睇緊 , 玩完返黎再詳細介紹過 .

下篇再介紹另一個景點 .

Bye Bye !

2014/03/23

行程 Plan B




Hello ! 


今日係3月23日 , 代表乜野呢 ? 代表住兩個月後既今日 , 

如果一切順利 (一定要順利呀) , 我應該會身處於 "北海道" . 

 皆因經過一番努力 , 終於的起心肝去報名 , 仲落實埋添 .

上兩篇咪話 "藍天假期" 酒店方面有D唔同 , 要在同一間酒店分兩晚住 .

(除非4月18日前出發 , 就可以用番以往唔同地區酒店既方式)

咁行程方面 , 又要執一執 , 上次個 "行程初盤" 改得面目全非 .

呢篇就講解一下呢個 Plan B , 究竟點樣行法 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次既日數總共係11日 , 如果全部投放在 "富良野" 果邊 ,

除非去埋 "知床" , 否則好似多得滯 , 況且5月尾都唔係鮮花盛放既日子 ,

因此打算分幾日去番D老地方 , 所以今次行程應該叫做 "新曲 + 精選" . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講多無謂 , 首先第一日冇行程 , 札幌酒店 Check in 休息 .

第二日取車後去 "定山溪" 行番趟 , 最後去 "登別" 入住 . 

第三日落 "大沼" , 呢個地方經過好幾次 , 今次點都要停一停 .

第四日上番 "二世古" , 果度我好鍾意架 , 今次一於翻兜佢 .

第五日經 "小樽" 返回 "札幌" , 住埋另一晚酒店 .

第六日經 "旭川" , 晚上住 "層雲峽" .

第七日落 Tamamu , 呢度可能住兩晚 , 暫時未諗得通 .

第八晚同上 ...

第九晚唔係住 "富良野" 就係 "白金溫泉" 果頭 .

第十晚就係 "夕張" .

最後第十一日食完早餐冇耐就要駕車出機場還 , 順便搭飛機回港 .

唔講唔知 , 我係第一次在機場還車 , 之前次次都係 "札幌" 度還 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

十一日既行程就咁上下 , 景點方面就繼續搵 .

不過老規矩 , 如果搵到更好既行程 , 可能又黎個大執 .  ^^

Bye Bye !

2014/03/21

租車有難度




Hello !


上個星期日網誌 "租車新目標" 咪話睇中部 N-WGN 想租既 , 

跟手又睇到 Fit 既混能車有平 Plan , 不過好快就租晒 , 

再之後退而求其次轉租Blog友 t先生曾經租過既 Honda Freed .

輸入一切所需資料後 , 叫做攪掂租車手續 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

豈料翌日收到佢既電郵通知 , 部份內容如下 :


ご予約ありがとうございます . ホンダレンタリース北海道です .

レンタカーのご予約完了の前に1点確認したいことがあり . ご連絡いたしました .

man wai 様は日本語でのコミュニケーションが可能でしょうか ?

誠に恐れ入りますが , 弊社では外国語に対応できる環境が整っておりません .

そのため , 万が一の事故の場合など日本語でのやりとりが必須になりますので ,

日本語でのコミュニケーションが難しいお客様はレンタルをお断りさせていただいております .

2014年3月28日9時までにご返信を頂けない場合 , 

こちらのご予約はキャンセルとさせて頂きます .

誠に勝手ではございますが , 以上の点をご確認いただきご返信いただきますよう , 

お願いいたします .

何かご不明な点などございましたら , お手数ですがご連絡ください .

よろしくお願いいたします .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由於係第一次幫襯   http://car.hokkaidotour.net/

所以估唔到佢有呢一著 . 在 "香港" 有翻譯網站 ,

加上封信有英日對照 , 當然知道佢講乜啦 , 至於講到我既日文咯喎 ...

三幾個單字還可以 , 要直接面對面溝通對答既話 , 真係有D難度 .

無奈之下唯有取消預訂 , 幫襯過另一間啦 .

我諗多數都係翻兜幫襯開既 Toyota 新札幌 .

不過暫時仲未諗到乜野車款 , 俾佢咁樣攪一攪 , 乜野都還原基本步 . 

諗住幫襯下另一間公司既車款都唔得 , 激氣 .  >_< !!

Bye Bye ! 

2014/03/18

ANA藍天假期套票




Hello ! 


頭先去睇 ANA 藍天假期旅遊套票網頁 .


今年好似有D唔同喎 , 以往係由 A至L 組裡面 , 

揀選唔同區域既酒店 , (唔駛連續入住) 就好似當年第一晚住 "札幌" , 

第二晚住 "稚內" , 跨區咁樣黎住 , 靈活好多 .  ^^

而睇番今年既網頁 , 得一至廿八間酒店 , 分佈 "北海道" 各地區 .

好似唔可以分區咁黎揀喎 , 若然幫襯佢既話 , 

第一晚多數都係揀 "札幌" 既 Century Royal Hotel , (上次住過有口碑)

咁另一晚又要住番 "札幌" 同一間 , 本來我諗住 "札幌" & "旭川" 各位一晚 ,

最尾果晚自己Book "夕張" 既旅館 , 翌日駛埋部車往機場還再上機 .

依家咁樣攪一攪 , 行程又要再執過 , 真係有排攪 .  >_< !!

Bye Bye !

2014/03/16

租車新目標




Hello !


今日 (都唔係今日咯 , 應該話近排) 好鬼忙 , 

不過星期日 , 點都要寫番篇同大家溝通一下 .  ^^

咁就一於長話短說 , 話說幫襯左 Toyota 咁多次 , 

都想轉一轉會 , 睇中左一部車仔 , 叫做 : N-WGN

係 HONDA 既車款 , 依家不斷咁搵佢既資料 , 

唔知有冇 Blog友曾經租過呢 ? 有就請不吝賜教 . 


OK ~ 係咁先 , 長話短說就係咁解 . 

Bye Bye !

P.S. : 參考過各界意見之後 , 覺得呢款都唔錯喎 .

2014/03/13

過江租霸




Hello ! 


今晚講兩單新聞 , 首先第一單係香港電視 ...

呢兩日新聞經常講 , 話乜乜制式 , 物物制式 , 

如果係明眼人 , 一睇就知有人發功攪野啦 .

之前好似講過 , 回歸後政府各部門 , 一向以懶見稱 , 

今次無端端出黎 "溫馨提示" , 話超過五千個住戶收睇就即刻做野 .

未易手之前 , 又唔見佢地對 "中移動" 做野 ? 你敢 !

所謂 : 打狗都要睇主人 , 佢地敢郁 "中移動" , 我就唔係幾信呀 .

計我話 , 只要係 "王維基" 既話 , 唔理乜野制式 , 佢地都有位入 , 

再簡單D講 , 就係對人唔對事 . 唉 ... 呢單野睇下點收科 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住呢單就堅喇 , 兩港女變租霸 , 台灣攪破壞 ...


右手邊果個都算飲得杯落丫 , 點會攪成咁架 , 

家陣D人都唔知食乜野大 ?


呢單料如果唔係另有內情既話 , 基本上只能用三個字黎形容 . 

就係 : 黐X線 . (雖然粗鄙左D , 不過好貼切)  XD

一般正常既人 , 縱然貪小便宜唔交租 , 甚至偷走部電視 , 都可以理解 .

但係攪到人間屋雞毛鴨血 , 呢樣真係R爆頭 ?

唔通個屋主上世殺左佢全家 ? 今世有仇報仇 ?

好啦 ~ 依家俾人周左 , 最好就坐番佢十碌八碌 , 

相信 "台灣" 坐監點都冇 "香港" 坐監咁歎 , 如果有命出番黎 , 

希望佢地可以重新做人 , 搵番屋主叩頭認錯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外希望今次事件 , 唔好令到 "台灣人" 以為 "香港人" 個個都係咁賤格 ,

起碼我就一定唔會咁做 .

Bye Bye !

2014/03/11

3.11日本地震3周年




Hello ! 


今日係日本 3.11 大地震3周年 , 好多報章都有專題報導 .

我都拎番當日錄影新聞黎重溫 , 叫做憑弔一番 ... 


可怕 ...


明珠台既紀錄片都有 .


睇完之後 , 依然震撼 , 感覺記憶猶新 , 記得當日曾經諗過 :

唉 ~ 慘 , 恐怕以後都唔駛再去 "日本" , 點知一年之後經已重新出發 .

佢地既復原速度 , 比想像中快 , 值得慶幸 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢幾日睇報紙 , 新聞話 "日本" 出現唔尋常既大八爪魚 , 

與及捕獲多條深海地震魚 , D專家驚又有大地震發生 , 

總之就言之鑿鑿咁啦 . 又黎 ? 唔好喇掛 .

頭先新聞先至話個核電廠相信要幾十年先至完全攪掂 , 

再黎既話真係唔得你死 !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而今年正式係多事之秋 , 失蹤客機又未搵番 , 究竟去左邊度 ?

呢單野認真邪門 , 平時唔見手機 , 都可以憑 GPS 搵番 , 

咁大架飛機 , 點會咁多日都音訊全無 ? 

如果係劫機 , 點解無求救訊號 ?

若然係突然大爆炸 , 理應遍海都係碎片 ? 

唔通入左神秘百慕達 ?

呢單料我非常之關心 , 雖然同班機乘客素昧生平 , 

不過大家都係飛機友 , 希望佢地吉人天相 .  =_= !!

Bye Bye !

2014/03/09

一田熊本熊




Hello !


今日主題講早餐 ? 當然唔係啦 , 不過想發一發牢騷唶 ...


我住果頭附近既食肆 , 基本上唔係咁多 , 比較大眾化既 , 

更加只得一間 "大X樂" , 果度已經係我既食堂咁滯 , 

每個星期日 , 如果晨早起身落去買早餐就冇乜問題 , 

若然攪晏左 , 咁就大鑊 . 但係禮拜又點會早起身丫 , 

十點起身都係好正常 , 去到果度 . Wow ~ 排隊買飛有十多人 , 

買完飛再排拎野食 , 又排廿個人 , 食個早餐唶 , 駛唔駛呀 ?

(聽聞 "俄羅斯" 果度 , 買個麵包都要排兩個鐘 , 唔通 "香港" 都跟風 ?)

結果轉戰 "麥記" , 都要排餐飽架 , 不過冇佢咁離譜 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講完私事講公事 , 今日星期日 , 講番D輕鬆野啦 .

一田東九開店 , 莊偉忠 : 有新野玩 !!


呢隻熊本熊 , 早排在 "長腳蟹" 呂慧儀既旅遊節目都有介紹過 .

好鬼死過癮架 , 佢係 "熊本縣" 既代言人 , 有晒主題網頁 .

http://kumamon-official.jp/  認真架勢 .  ^_^ !!

如果係佢既 Fans 既話 , 咁就有好消息喇 , 因為一田百貨同

熊本縣政府簽約 , 成為熊本熊首個官方授權既海外發售點 , 

沙田一田百貨由依家至到16號 , 設定限定攤位 , 銷售多款精品 .

一田百貨CEO "莊偉忠" 話 : 第四季將會在西九龍開設第七間分店 .

仲話會加入好玩既新概念 . 究竟點好玩法 , 真係值得期待 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

"熊本縣" 與 "北海道" 一南一北 , 果度我都好嚮往 , 

不過即使解決晒 "北海道" 行程 , 暫時都未排期到佢 , 

(因為其他地方都好精彩) 而果度既名勝包括有 : 熊本城 , 阿蘇火山 , 

通潤橋 , 靈嚴洞 , 水前寺公園等等 ... (仲有好多 , 我所知亦有限)

聽聞 Blog友 Nerissa 上年尾曾經一遊 , 有時間都要上去參觀一番 , 

睇完網誌當自己去過 , 相信一定好精彩 .  ^^

至於我既行程 , 暫時都仲搵緊料 . (次次都係咁話) 

有時間再向大家報料啦 . 

Bye Bye !

2014/03/02

行程初盤




Hello ! 


唔覺唔覺 , 今日已經3月2日 , 距離球季結束仲有兩個多月 .

而早排 Blog友 Ng 問我個行程攪成點 ? 希望透露番些小喎 .

其實我都仲未好積極咁搵料 , 唔記得之前有冇講過 , 

今次度行程比以往更加困難 , 以前絕大部份都係沿海邊行 , 

只要搵齊沿線景點就Ok , 今次全部都係內陸 , 所以有一定難度 .

經過多日黎既努力 , 終於度出一條叫做滿意既行程 .

詳細景點仲搵緊 , 今次講解完點樣行先 .  ^^

(如果搵到更好既路線 , 隨時黎個大執都唔出奇)
~~~~~~~~~~~~~~~~~~~~~~~~~~~~~~~~~~~~~~~~~~~~~

第一日 : 幫襯得 ANA 轉機上 "新千歲機場" , 第一日都唔慌有行程 .

到達 "札幌" 時都夜晚 , 求其食個拉麵就 Check in 算數 .

第二日 : 取車後直接駛往 "襟裳岬" , 始終沿海路線先至係我杯茶 , 

點都要行番一段至舒服 , 晚上就在 "襟裳岬" 附近旅館攪掂 .

第三日 : 今日又係沿海行 , 目的地係 "釧路市" .

第四日 : 途經 "屈斜路湖" 上去 "東藻琴芝櫻公園" , 晚上在 "網走" 落腳 .

第五日 : 直上 "紋別" 瀧上町公園 , 晚上在 "層雲峽" 落腳 .

第六日 : 途經 "然別湖" 落去 "帶廣市" , 晚上諗住在 Tamamu 落腳 , 

不過D房好貴 , 可能住周邊酒店 , 到時先睇下點 .

第七日 : 直上 "富良野" 等地 , 見到乜就參觀乜 , 晚上就住 "富良野" .

第八日 : 上 "美瑛" 參觀 , 晚上在 "旭川" 落腳 .

第九日 : 睇下附近有乜野參觀 , 晚上住 "夕張" 果頭 .

第十日 : 直接在 "新千歲機場" 還車 , 再轉機回港 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

10日既路線行程就係咁 , 如果搵唔到更好既就用佢 .

至於車款方便 , 更加比行程 R 爆頭 , 一時鍾意呢樣 , 一時果樣 .

不斷在腦交戰 , 不過距離真係揀車仲有好多時間 , 

話時話 ~ 尋晚經過某停車場 , 見到一部 "日產" NOTE , 

都幾型仔喎 , 雖然我鍾情於 Toyota , 不過幫襯左咁多次 , 

都想轉一轉會 , 唔 ... 睇下點啦 !!


Bye Bye !