2014/11/30

Blog友們 , 多謝您 ! + Plan A




Hello !


完成了整個行程網誌 , 今日冇得寫 , 反而有D唔慣 ,

充滿失落感 , 不過唔緊要 , 因為仲有其他野寫嘛 , 就係謝票 .

今次既遊記 , 都算係破紀錄 , 有次錄得有12人在線 , 就算減番自己 , 

都有11位Blog友一同觀看 , 在呢度黎計 , 已經相當唔簡單 .

真係要好好咁多謝大家既支持 .  ^_^ !!


另外要多謝既 , 就係Blog友們既好介紹 .

話說寫網誌之餘 , 我都有瀏覽各位既網誌 , 當中 Shirley姐 既網誌 , 

可以話堪稱一絕 , 絕就絕在令我見識到 , 乜野叫做 Hea 玩 , 

簡單D講即係遊覽景點唔多 , 不過就慢慢咁黎欣賞 , 

呢樣同我一貫作風可謂南轅北轍 , 我就乜都要多 , 都幾趕頭趕命  ,

見到原來可以咁玩法 , 對呢種玩法極之嚮往 . 

而佢今次既遊點 , 就係 大阪 ~ 和歌山 ~ 白濱 呢一帶景點 , 為左隆重其事 , 

早日我買左本旅遊天書黎研究 , 皆因我對 大阪 果邊可謂一無所知 .

京阪神達人天書 , 三聯書店購買 , $99.00 冇折扣 . (都幾貴)

平時放午飯閱覽 , 每日睇小小 , 都幾過癮架 , Yeah !!


另外上篇咪話有兩個Plan , 唔知開邊瓣既 ? 今次寫晒兩組行程 , 

等大家參詳一下 , 俾D意見丫 , 我就黎俾呢兩個行程攪到精神分裂咁滯 , 

因為今日鍾意呢個 , 聽日又鍾意果個 , 各有優點及缺點 , 不知如何取捨 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先講Plan A , 就係翻兜2012年霧駕遊既景點 , 見到Blog友 : Maggie & Kaykie 

與及 Fung Mandy 既大成功 , 令我又羨慕又妒忌 . haha ...

都想為自己報仇雪恨 , 經過多次行程 , 積落唔小血債 , 報起上黎真係有排報 .

而行程就係 (主要講大方向 , 即係每晚既落腳地 , 細節慢慢再執)

札幌 ~ (幫襯 天然温泉やすらぎの湯 北のたまゆら桑園 係主要任務)

襟裳岬 ~ (風之館 , 一句講晒 , 正 !! )

釧路 ~ (釧路幣舞の湯 , 好想再入住)

霧多布上次間民宿 ~ (厚岸 既 BBQ , 食到唔捨得走咁滯)

 根室 ~ (今次唔試 根室花 , 試試旅館既食宿)

 野付半島 ~ (半邊毛蟹 , 依家都忘記唔到) 

知床 ~ (由 羅臼 經 知床峠 往 知床 , 一直係我未了既心願)

網走 ~ (未結冰既網走湖 , 會係點樣既呢 ? )

旭岳 ~ (姿見の池 , 簡直係鬼斧神工)

留萌市 ~ (考慮緊去唔去埋 ? )

札幌 ~ (套餐另一晚酒店 , 兼還車)

返回香港 ~ (轉機都磨足一日)

Plan A 主要就係呢12日行程 , 期間可能有D修改 , 相信都係小執 .

而呢程既重中之重就係部車 , 記唔記得今次租車本來係想租86 ?

今次如果佢再推出棍波車 , 幾大都租佢 , 絕對不惜工本 .

儘管Blog友 t先生 話棍波係過時產品 , 在學車情意結之下 , 

始終都想試試 , 更加想練成點樣可以在大斜路唔用手掣黎開車 ?

(通常學車時 , 佢會教先踩大油門 , 再鬆極力子 , 直至部車有小許推動之勢 , 

隨即放下手掣 , 再俾D油就行得)

如果有Blog友知道點樣可以唔用手掣在斜路開車 , 敬請不吝賜教 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再講番今次之旅既優點 , 就係絕大部份景點資料都有齊 , 

唔駛再慢慢搵料 , 極之方便 .

而缺點就係月份方面 , 上次4月尾出門撞正大霧 , 5月問過人都係唔得 , 

就算係9月尾10月頭 , 都唔係實食冇黐牙 ? 偶然都會遇到大霧 .

依家係12月頭 , 如果要等到明年10月先出發 , 又好似耐左D , 

心急既我實在好難忍到果日先出發 , 所以不知如何是好 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

依家要去食晚飯 , 和歌山果頭遲D再寫埋佢 .

Bye Bye !

40 則留言:

  1. 在大斜路唔用手掣黎開車咪要釣極力子囉!

    回覆刪除
    回覆
    1. 釣極力子係在行駛中 , 如果停定部車又點呢 ?

      刪除
    2. t先生一定比友季熟,不過好似要先break,然後拖低波,再釣極力子,友季第一駕車是棍波萬事得323,不過都好耐喇,好似323都絕跡。

      刪除
    3. 基本上只要係有車階級 , 都唔會有難度 , 係我呢類有日都唔楂一次車 , 先覺得好玩唶 .

      刪除
    4. 有車階級對友季來講都係住事喇,唉! 住事只能回味,友季依家個牌同man姐一樣都係日本牌,只敢在日本楂。

      刪除
    5. 只要有番實戰經驗 , 好容易上番手既唶 . ^^
      日本牌 ~ 好名詞 , 我鍾意 . haha ...

      刪除
    6. 小姐你對棍波車咁有心? 建議你先挑戰自己行下縣道, 你就覺得自動波好

      刪除
    7. t : 其實都知道既 , 話晒都楂過好幾次(自動波車) , 不過論娛樂性 & 挑戰性 , 棍波車就優勝好多 . ^^

      刪除
  2. 我只算小成功咋,有啲地方都要摘日翻兜架:-D

    回覆刪除
    回覆
    1. 仲有我已經唔再買旅遊書,上網巡blog仲多料XD

      刪除
    2. Maggie, Kaykie : 對我黎講已經好勁架喇 , 好羨慕既呢 . ^^

      刪除
    3. Maggie, Kaykie : 哦 ~ 買黎慢慢睇唶 , 每日睇小小 , 始終天書會詳細小小 .

      刪除
  3. 依家D旅遊書真係超貴呀~
    我都係拉車邊, 都唔算大成功, 依然逃不過知床峠, 羅臼既宿命

    回覆刪除
    回覆
    1. Fung Mandy : 比較黎既唶 , 可能我果次實在太過唔掂 , 所以咪覺得你地好掂囉 . XD
      天書有折咪平D , 不過心急買黎睇 , 貴D都算 .

      刪除
    2. 講到比較喎,友季比較仲意放在天書上面的銀紙 Ö‿Ö
      點解manwai姐姐仲有咁多??? 留來下次血拼 ^_^!!

      刪除
    3. Yen 我都好鍾意架 , 多多都唔拘 . haha ...
      呢排比較抵買 , 咪入番些小囉 , 大吉利是再跌既話 , 又再入番D溝淡佢 .

      刪除
  4. 寫完遊記,有時間可以來睇我的遊記(sorry賣下廣告先^^;)

    回覆刪除
    回覆
    1. 咦, 白川香喎, 我又可以參考參考 ^^

      刪除
    2. 好呀 , 反正大把時間 , 得閒上去參觀一下 . ^^

      刪除
    3. Gio L : Wow ~ D相靚到暈 , 乜野相機影架 ?
      還是因為天氣太好 , 地方太靚 ? 總之就佩服 . ^^

      刪除
    4. 直情係高手中既高手 , 勁 !

      刪除
    5. 多謝讚賞,其實我都係學影相冇耐﹐乜mode物mode都未識用, 好多相都影到又朦又黑,最後要用PS執相先見得人^^;

      刪除
    6. 咁多人讚 , 絕非僥倖 , 就算係執相 , 都要執相高手先至可以執得咁靚 . ^^

      刪除
  5. hi....打個招呼先, 我係近期先加入妳個blog, 每次妳update都入來八下, 因為我打算朝住你個方向(自駕遊).....

    回覆刪除
    回覆
    1. Hello ! 歡迎光臨 , 朝住自駕遊 ? 係咪北海道呀 ?
      唔錯架 , 自駕好玩好多 . ^^

      刪除
  6. 真係咁大疊¥,幾多錢?

    回覆刪除
    回覆
    1. 一疊一百萬Yen , 乘點零6幾咁啦 . ^^

      刪除
    2. 小姐諗住去日本買撈石屎呀?

      刪除
    3. 咁又唔係 , 見抵買咪入定D囉 , 始終都用得著 , 再跌就再買 . ^^

      刪除
    4. 嘻嘻, 你呢一球駛唔駛攞返去差館呀 :D

      刪除
    5. t : haha ... 梗係唔駛啦 , 果D係港幣 , 呢D係Yen嘛 . XD
      講開又講 , 好彩撞唔正果單野發生 , 見到有錢唔執又好笨 ,
      執左又要驚餐飽 , 又唔夠食過世 , 唯有死死地氣拎番出黎 .
      真陰公 . >_< !!

      刪除
  7. 哈哈~~ man wai, 財不可以露眼呀 :P

    回覆刪除
    回覆
    1. 哦 ~ 咁又唔係要一次過用晒既 , 況且依家同真正出發日 , 仲有一大段時間 . =_= !!

      刪除
    2. 唔掂檔 , 剛睇過其他Blog既網誌 , 6月尾都係大霧 ,
      到時恐怕報仇不成再添新仇 , 慘 ~
      http://wmpi.pixnet.net/blog/post/32295545-day-4-%28%ef%bc%96%e6%9c%88%ef%bc%92%ef%bc%94%e6%97%a5%29---%e9%9c%a7-%e7%9f%a5%e5%ba%8a

      刪除
    3. 唉, 跟我5月時情況一樣, 比我好少少的是可以睇到一湖的邊皮

      刪除
    4. Fung Mandy : 仲以為6月展會正正常常 , 點知道係咁 , 真係要從詳計議 .
      好彩時間多的是 . =_= !!

      刪除
  8. 嘩! Man Wai, 得你咁講真係有啲受寵若驚呀! 我啲hea住玩係有少少焗住咖咋! 同幾位退休人士同行, 想唔hea都唔得啊! 不過行程密有行程密好玩, hea亦有hea好玩啊! 我都plan緊三月中去東京(河口湖+輕井澤)呀! 十月再戰立山黑部+上高地呀! 而家諗吓都開心呀!

    回覆刪除
    回覆
    1. 唔駛受寵若驚喎 , 你值得擁有 . haha ...
      Hea住咁玩輕輕鬆鬆 , 又另一種體會嘛 . XD
      Plan 行程都幾好玩架 , 一有新靈感就推倒舊構思 , 個人即刻醒晒 , 好似叉足電咁 . ^^
      3 & 10 月都出門 ? 果然驛馬星動呀 , 佩服 !

      刪除

歡迎光臨 , 如果時間許可 , 請留番個言丫 ~