2015/12/30

2016 行程初盤 (第八日行程)




Hello !


上篇開完生日會 , 今晚解決埋個行程初盤佢 .

輪到第八日行程 , 今日車程比較短 , 即係由 然別湖 果度開始 , 

去到總站 旭岳 , 如果唔停站 , 大約需時3個半鐘左右 .

而呢日既景點 , 幾近係上次2014年既翻版 .

最先由旅館出發 , 一直去到 道の駅 南ふらの (南富良野)

跟住一直踩上去 , 上次既 富良野 就未開花 , 所以冇乜野睇 , 

今次係由Blog友介紹 , 話 富良野 & 美瑛 雪景好靚 , 

所以特登編排呢日既行程 , 至於有乜野景點 ? 

又係去到見乜睇乜啦 , 不過有幾個景點就一定會到 , 

就好似 : 四季彩之丘 ~ 哲學之木 ~ 四季之塔 ~ 親子之木 ~ 

Ken & Mary之木 ~ 北西之丘展望公園 ~ Mild Seven之木 ~ 

亞斗夢之丘 ... 大約係咁上下啦 , 以上景點好似全部都係 美瑛  , 

係呀 ~ 由於實在太過濕碎 , 所以寫住部份先 , 

唔駛驚喎 , 返到黎必定會寫番晒去過既每個景點 .

而旅館方面 , 亦都已經搵到 , 仲Book埋添 , 


呢間旅館係Blog友 Mandy 介紹 , 相信都會幾好 .  ^^

外型相當唔錯 , 讚呀 !!


~ 第八日完 ~ 




2015/12/25

生日快樂2015




Hello !


今日係12月25日 "聖誕節" , 首先祝大家 聖誕快樂 !!

今次係第三次在 Google Blog 呢度攪生日會 , 

簡簡單單咁圍內人食番餐 , 都可以好高興架 .  ^_^ !!


介紹一下有乜野食物啦 , 先黎個主菜炸醬炒麵 .


跟住係泡菜幼薯粉 .


再黎燒雞串 .


壽司更加唔小得 .


三文魚刺身 , 我的最愛 .


仲有帶子刺身 , 凍冰冰 , 好爽口架 .


食到咁上下 , 再黎個雜果沙律 .


最後就係主菜中既主菜 , 生日蛋糕 .


等我黎切第一刀 .


呢件勁大 , 我既 . haha ...


之後果D大家自便 .


年年都講生日願望 , 今年都冇乜野願望咯 .

所謂平淡是福 , 求其有啖清茶淡飯已經係一種福氣 .

出年生日會再見 , 約定你 .  XD

Bye Bye ! 



2015/12/21

2016 行程初盤 (第七日行程)




Hello !


呢篇行程初盤 , 本來應該尋日出街 , 

不過尋日好忙 , 所以順延至今晚出街見各位 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~

呢一日要去既地方頗多 , 不過只屬舊地重遊 , 

基本上今次全程既景點大部份都係舊地重遊 , 重溫番當日既意境 .

其實都唔知去唔去得晒 , 唯有睇餸食飯啦 , 

而當中有D地方屬重點行程 , 即係幾趕都要去埋佢 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

當日離開旅館 , 第一個景點就係必去既 摩周湖展望台 , 

果度聽講有三個展望台 , 唔知會唔會封路呢 ? 見過其他Blog友

都在落雪時參觀果度 , 應該唔怕掛 , 陣間再搵多D資料 .

之後過隔離 屈斜路湖 , 又係沿住湖邊行 , 途中見到乜就停乜 , 

好似 : 砂湯 呢度 , 又係非去不可 , 上次冬天去滿湖都係天鵝 , 

今次應該都唔會例外 , 帶定D餅乾去餵天鵝 , 有排玩既呢 .

再黎就係 : 池の湯 ~ 古丹溫泉 ~ 和琴半島 ~ 等等 ...

跟住輪到重頭戲 美幌峠 , 講起呢個 美幌峠 就犀利喇 , 

上次俾D風吹到對耳差D甩左出黎 , 今次一於有仇報仇 , 影多幾張相 .

攪掂完呢Part 就過隔離 阿寒湖 , 首先要經過 雙岳 ~ 雙湖呢兩個觀景台 .

去到 阿寒湖 , 除左參觀呢個冰湖之外 , 重點就係入油 .  ^^ 

果度有個油站 , 本來就冇乜大不了 , 

重點就係油站旁邊有噴水洗車玩 , 200Yen有分零鐘任洗 , 

勁好玩呀 . (千祈唔好整濕塊擋風玻璃) 否則後果自負 . haha ...

玩完呢度都差唔多 , 今晚既旅館亦都搵到 , 仲Book埋添 .


~ 就係佢喇 ~ 


講起呢間旅館 , 同佢都有DD淵緣 , 

就係上次去 然別湖 , 借過佢門口黎泊車 .


第七日完 !



2015/12/16

有冇人幫襯過 たびらい ?




Hello !


距離出門仲有個多月 , 依家開始著手搵車都差唔多 , 

一直以黎都係幫襯開 "新札幌" 租車 , 貪佢一條龍服務 . 

(即係一個價錢包埋 : 保險 ~ 雪軑 ~ ETC咭) 

於是乎上佢個網頁睇睇 , 咦 ~ 冇左30%折扣喎 , 唔通新春唔休做 ?

淨係得番 QUOカード500円をプレゼント&スタッドレスタイヤ無料 咋 .

經過多番思量 , 最大可能係平時淡季出門 , 所以做特價 , 

家陣旺季 , 所以得果 500Yen QUOカード , 感覺都幾貴 .

跟住上其他租車公司睇下點 , 搵到間叫做 : たびらい 既租車公司 .

又唔係好貴喎 , 就以我心儀既 AQUA 為例 , 同一個日數 .


新札幌 果邊要 79380Yen , たびらい 只需 65900Yen .

足足平佢 13480Yen , 仲要大家都係包保險 & 雪軑 .

所以想問下各位 , 唔知大家有冇幫襯過呢間租車公司 ?

當中又有冇蠱惑野呢 ? 點解仲會平過由 Tovota 直接租呢 ?

真係R爆頭都諗唔明 ? 希望有前輩解答一下啦 .

Bye Bye !



2015/12/13

2016 行程初盤 (第六日行程)




Hello !


今日星期日 , 又到寫旅遊網誌既好日子 ,

接回上次既第五日行程 , 輪到第六日 ...

呢日既行程有部份景點須要考慮去唔去 , 就好似 網走破冰船 , 

又想去 ~ 又唔想去 , 如果去既話 , 其他景點都要Cut咁D .

就由開始講先啦 , 離開旅館之後 , 沿住離開 知床 果條路 , 

第一個景點就係 知床斜里道の駅 , 其實至在休息鬆下對腳 , 

跟住就係 濤沸湖 ~ 北浜駅 ~ 藻琴湖 之類咁啦 .

參觀完晒之後 , 一直去到 網走市 範圍 , 有個地方好想再去多次 , 

就係 能取岬 , 上次在黃昏到達 , 天陰陰咁睇得唔多清楚 , 

今次早小小到場 , 希望影多幾張相啦 .  ^^

另外想睇既就係曾經住過果間 活魚料理 ~ 渚亭 , 唔知點解 ?

今次冇出現在 樂天 網站既選擇之中 ? 莫非執左笠 ?

橫掂會經過果頭 , 兜一兜入去睇睇 , 果度仲好似有個景點叫做 : 二ツ岩 .

之後去到 網走監獄 附近 , 監獄就唔參觀咯 , 淨係參觀隔離既 天都山 .

裡面有個流冰館 , 又係可以體驗零下20度既氣溫 , 

即係搵條濕毛巾轉 ~ 轉 ~ 轉 , 好快就變魷魚骨果隻 .  XD

最後就係去番開頭所講既 破冰船 , 暫時都未知上唔上船 , 

隨機應變啦 , 行程大至上係咁 , 旅館方面亦都揀好 , 


張相只係參考 , 去到果陣相信湖面都結晒冰 .


第六日完 !




2015/12/09

早買機票有著數




Hello !


今日星期三 , 襯有D時間 , 整番篇網誌先 .

講D乜野呢 ? 先講下周一 (12月14日)  P.M.10:30 

TVB 做旅遊節目 , 叫做 : 進撃昇龍道 .

乜野叫做 昇龍道 呢 ? 以我所知 , 應該係中部北陸 , 上至 能登半島 , 

下至 熊野古道 , 不過 ~ 雖然講得出名 , 但係對果度既地方資料完全係零 , 

所以就要留意節目 , 睇下究竟係咩野一回事 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 再講下一單 , 今日係 12月9日 , 仲有兩個月就到農曆年 , 

平時淡季出門 , 所以臨出發前個半至兩個月先至埋首訂位之類 , 

今次旺季出門 , 再加上 3J家庭 & J少 極力游說 , 

所以晨咁早就訂好機票 , 詳細可以Click入呢度

今日試下用番我出發與回程既時間黎Check下 , 

Wow ~ 比我訂票果陣貴左足足 $3000.00 , 

仲貴過幫襯開既ANA藍天假期套餐 , 都咪話唔簡單 .

真係要請兩位飲茶呀 , 任叫野食 , 我既 ! haha ...

Bye Bye !



2015/12/06

紀州梅酒系列




Hello !


今日本來講旅遊初盤 , 不過臨時有野攪唔得閒 , 

求其搵D野黎頂檔 , 搵乜野 ? 就講紀州梅酒啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

上次果樽紀州梅酒早幾日飲晒 , 頭先去左阿信屋入貨 .

見佢有幾種梅酒 , 一次過入晒幾種款式 .  ^_^ !!

最右邊果樽係傳統口味 , 會員折實價 : 57.60

中間果樽係藍莓味 , 會員折實價 : 64.60

而左邊果樽係士多啤梨味 , 會員折實價 : 64.60

本來仲可以平D , 收銀員話在電話裝D唔知乜野 , 

折扣會多D , 不過我呢類電腦科技盲 , 都唔知點攪 , 

所以都係算喇 , 呢個價位都接受得到 , OK啦 .


另外買多兩罐加長版可樂 . 每罐 $7.90 (正價冇折)


有酒豈可無餚 , 執番幾包豬肉乾等等 ...


唔客氣喇 , 先食為快 , 旅遊過幾日先講啦 .

Bye Bye !


2015/12/03

2016 行程初盤 (小修小改篇)




Hello !


呢幾日收到Blog友留言 , 講解北海道即場天氣 .

話有部份景點大風 , 超凍 , 前路滿布雜草 , 水氹 , 完全無法前進 ...

(落石岬 當年冇落雪都尚且立入禁止 , 依家都唔會例外)


Wow ~ 聽落都幾得人驚 , 另外又聽過Blog友 J少講 , 

話我今次呢條路線 , 夏天去就好正 , 冬天就唔多盞咁話 .

唉 ~ 都係既 , 就講第一日 , 一到步就落 苫小牧 , 

之後沿住海邊行 , 又雪又海邊 , 可能勁大風 , 正式係前路未明 .

經過思前想後 , 終於決定係咁咦修改第一日既行程 , 

當然要取消原先Book落既旅館啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第一日攞車之後 , 即刻向 帶廣 方向行 , 唔經海邊行 .

夜晚入住 十勝川 溫泉附近 , 其實 帶廣 果頭除左 愛國&幸福 兩個站之外 , 

仲有乜野景點呢 ? 呢樣還在發掘中 , 如果大家有好介紹 , 不妨通知聲 .

而旅館方面 , 本來想住番上次既 十勝川第一 , 不過冇房 .


出面呢類停車場 , 我就至鍾意 , 夠簡單直接 .  ^^


另外個Plan包 QUOカード2000円付 , 乜野叫做 QUOカード ?

真係要上網搵下料至得 . 

好 ~ 今晚講住咁多先 . 

Bye Bye !



2015/11/29

2016 行程初盤 (第五日行程)




Hello !


今日係星期日 , 係寫行程既好日子 ...

早兩日報紙話 北海道富良野 果頭 , 氣溫跌至零下20度 , 

由於事出突然 , 天文台都報唔切 , 所以俾民眾鬧爆咁話喎 .

Wow ~ 高速公路收費亭都攪成咁 , 點行呀大哥 ?  XD


零下20度 , 令我諗起當年參觀 紋別 果個 オホーツク流氷科学センター

果度有個寒流體驗室 , 裡面正正就係零下20度 , 

等閒既裝備根本就頂佢唔順 , 正式係凍都啊媽都唔認得 .

好彩仲有兩個多月先至出發 , 希望到時唔好咁激啦 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番個行程 , 上回講到住在 ホテルねむろ海陽亭 , 

而呢日既目的地係 知床 , 離開旅館第一站就係 : 春国岱

果度上次已經參觀過 , (其實都冇乜野睇) 不過係必經之路 , 

就當係停低影張相咁啦 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就係 : 道の駅スワン44ねむろ , 唔知佢日劇 南極大陸

既宣傳海報拆晒未呢 ? 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住就係 : 新酪展望台 , 即係果個鐵架展望台 , 好似唔多穩陣咁 .  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後繼續上 , 去到 白鳥台 , 果度又叫做 :別海北方展望塔 , 

有好多北方四島既資料 , 希望到時視野會好D啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再上就會見到 野付半島 , 兜唔兜入去呢 ? 呢D地方夏天黎先至有野睇 .

如果唔入去 , 繼續行有兩個景點 , 不過都曾經參觀過 , 

分別係 : 北方領土館 & 標津三文魚科學館 , 又係睇心情啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由於唔可以經 知床峠 去 知床 , 所以要兜下路入去 , 

即係由 知床斜里 果頭再經 龜島 入 知床 , 浪費晒D時間 , 

再加上雪地行車唔敢太快 , 所以今日景點唔係咁多 , 

去到 知床 如果有時間 , 希望可以去 フレペの滝 重溫當日既意境 , 

否則就要隔日先至上去 , 當晚既酒店已經搵到 , 仲Book埋添 .


不過俾 ウトロ温泉知床第一ホテル 截左糊 .

~ 就係佢喇 ~


個溫泉正到殺死人 . haha ...


第五日完 !!



2015/11/23

OTS 北海道唔租車




Hello !


今日頭條 : 冬季自駕遊危險 , 北海道暫停旅客租車 ...


今日對於我黎講 , 至爆既新聞並非選舉結果 , 

而係呢單OTS北海道租車公司 , 暫停租車俾外國旅客 .

OTS網頁既通告 . (中文版)


報導話外國人雪地駕駛經驗淺薄 , 暫時都係唔租俾你地 ,

 費時你地炒大鑊 , 等雪季過左先至再玩過啦 . (大至上係咁啦)

其實呢單OTS冬季拒租車俾外國客 , 早已從Blog友中略有所聞 .

而講開冬季自駕遊 , 近排亦有Blog友問我有冇雪地駕駛的經驗 ?

我介紹佢睇我2011年既 : 雪地自駕遊經驗之談篇


不過該篇所謂經驗之談 , 只屬取巧性質 , 皆因我既雪駕經驗 , 

只限於天清氣朗既雪地 , 真正漫天風雪能見度低既情況 , 我都未試過 .

我諗如果在高速就冇得好講 , 若然普通馬路遇到大風雪 , 

都係唔行好過行 , 頂多買定D乾糧在車上等 , 平定先至開車 .

講番OTS今次決定 , 對我影響不大 , 因為我係Toyota忠實Fans .

大吉利是講句 , 萬一Toyota又玩呢招 , 咁就真係杰撻撻咯 .

訂好既酒店都要取消 , 只能改為在 札幌 市內觀光 , 

希望唔好啦 , 最多我小心D駕駛 , 盡量唔整臭港人個朵 .

Bye Bye !


2015/11/22

2016 行程初盤 (第四日行程)




Hello !


隔左兩個星期 , 今日又輪到寫行程初盤 ,

上回講到在霧多布果頭落腳 , 而今次落腳地 , 將會係根室 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由果度去根室 , 車程只需個再零鐘 , 不過當然唔會咁簡單 , 

仲有景點要遊覽嘛 , 第一個景點係 : なぎさのドライブウェイ

果度係一個長長既沙灘海岸 , 可以望下海 , 我就至鍾意架啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住下一站係 : 羨古丹駐車公園 , 又係一個睇海既地方 , 

呢度上次曾經一遊 , 不過又係受大霧影響景觀 , 希望今次好D啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就係 : 北太平洋シーサイドライン , 網頁話呢度係100選入圍地方 , 

就算行過都要落去望一望佢 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就係 : 落石岬 , 果度有個燈塔 , 燈塔又係我的最愛 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住呢個犀利喇 , 叫做 : 根室車石 , 不久前睇過Blog友 Fung Mandy 

既大作 , 真係羨慕死人 , 今次又要睇天做人 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後呢個 : 納沙布岬 , 絕對係呢日既重中之重 , 

如果好天氣既話 , 呢度可以磨佢好耐 , 好多野睇架 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

玩到呢度都差唔多 , 當日既旅館亦都揀好 , 仲Book埋添 , 

叫做 : ホテルねむろ海陽亭 , 呢度上次曾經入住 , 

晚餐去左正宗 根室花 食迴轉壽司 , 今次會一試旅館內既晚餐 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~ 第四日完 ~

Bye Bye !


由酒店往根室花 , 步行大約15分鐘 . 







2015/11/20

突發事件 ~ 深水埗間歇泉篇




Hello !


自從由Yahoo搬過黎呢度之後 , 好耐冇寫過突發事件 , 

需知呢D野 , 可遇不可求 , 有時就算遇到 , 身上未必有相機 , 

好似呢篇咁 , 就係用手機黎影 , 質素當然差小小 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次事發地點係深水埗 , 南昌街 與 基隆街 交界公園 , 

時間係 2015年11月20日 , 下午3:30左右 .

當時啱啱經過上址 , 發現有野睇 , 當然唔好錯過啦 , 

原來就係爆地下水管產生間歇泉 , 與其話間歇泉 , 

不如話小型湧泉貼切D , 不過我鍾意間歇泉個名唶 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講左咁耐 , 一齊黎欣賞下呢個間歇泉啦 , Yeah !!

~ 就係呢度喇 ~ 


幾勁喎 .  ^^


黎多張添 .


有警員在場駐守 , 以防萬一 .


D水夾雜沙泥 , 湧向對面馬路 .


不過唔算好勁 .


車輛駛過都冇收油 , 照剷過D水 .


唔知係鹹水定係食水 ?


聽日報紙會唔會登呢 ?


繞場半周再返黎 , 現場睇加埋D聲勁好多 .


Zoom近小小睇 .


最後一擊 , 影完鬆人 , 我都驚佢突然大爆發 . haha ...


今日係咁先 , 第日再有突發事件再報導過 .

Bye Bye !



2015/11/15

トマム 星野リゾート 水の教会




Hello !


今日本來應該講行程初盤篇 , 可惜又係果句啦 : 未攪掂 .

唯有求其搵D野黎頂檔 , 講乜野好呢 ? 就講日前與Blog友談及既 : 水之教會 .

就星期五果日 , 友季姐 留言 , 話 : Oh! No! 可以不去了sosad ...

當時我R晒頭 , 心諗 ~ 可以不去 ,Why ? 再上佢留低既網址度睇 , 

原來係講 北海道TOMAMU度假村 俾中國某財團100%收購 .

咁大單新聞 , 點解唔多覺既 ? 因為星期五既報紙 , 成本字典咁厚 , 

淨係逐頁揭都揭到手軟 , 有D兩頁當一頁 , 所以Miss左都唔知 .

跟住翻查一輪 , 終於搵到佢喇 , 星期五 AM730 報導 .

北海道水之教堂 , 中國財團擲11.5億收購 .


講起呢個 トマム 星野リゾート 度假村 , 我有幸去過一次 , 

詳細可以Click入呢度 , 果度俾到我既感覺係正到爆之餘 , 

仲節目多多 , 去一次絕對玩唔晒 , 印象最深刻既 , 莫過於佢既房間 , 

似一個家居單位多過一間酒店房 , 黎緊呢次北海道之旅 , 

都有諗過佢 , 只可惜農曆年期間唔止貴之餘 , 仲好難有單人房 ,

所以打消左個念頭 , 經過呢一別 , 恐怕後會無期 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

唉 ~ 冇辦法啦 , 所謂商業決定 , 冇乜邊個敵得過銀彈政策 ,

一堆堆銀紙咁掟過黎 , 唔通企硬唔賣俾佢咩 ?

在於(我呢個)旅客立場 , 對果度興趣大減就在所難免 , 

皆因咁難得先至出門去日本 , 都唔多想見到日本以外既人 , 

而佢整個度假村被收購 , 難免一車車強國人進注遊覽 , 

碰口碰面都係佢既人 , 氣氛好似返左內地 , 咁就蛇都死啦 .

如果有Blog友去開果頭 , 唔該報一報料 , 

睇下災情如何 , 仲可唔可以一遊 . 

Bye Bye ! 


2015/11/13

換廁紙架 DIY




Hello !


屋企廁所個廁紙架爛左都好多個年頭 , 

一直都拖得就拖 , 忍得就忍 , 今晚終於的起心肝解決佢 .

就係佢喇 , 本來面上有個蓋 , 不過爛左 , 暫時都係用住先 .


買左個新既 , $18.00 是但一間家品店有售 .


先將舊架拆除 , 再係咁咦清潔牆身 .


照番D螺絲位上個新架 .


最後一Part就係裝番廁紙 .


其實換廁紙架呢樣野 , 可以話係手板眼見功夫 , 

根本不值一晒 , 呢篇最想帶出既訊息係 : 

有時有D野明明就在眼前 , 不過就硬係抽唔出時間解決 .

日日都話遲D先 , 依家攪掂晒 , 係咪好正呢 ? haha ...

Bye Bye ! 



2015/11/11

白浜温泉 崎の湯




Hello !


今日頭條 :  中國遊客男扮女裝 , 闖日溫泉女湯自拍 ...


呢一單料係尋日報紙新聞 , 話說有一名中國籍遊客 , 

竟然男扮女裝 , 潛入女湯溫泉 . 並在眾目睽睽之下用手機自拍 , 

被捕獲後辯稱 : 女湯呢邊風景特別正 , 所以才犯案 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次呢篇新聞 , 想講兩樣野 , 

第一就係 : 日本開放內地旅客賺人仔 , 唔多唔小都要負出代價 , 

呢方面可以向香港借鏡 , 呢單案確實係疑點重重 , 

疑犯話佢欣賞女湯風景 , 所以喬裝女性打扮進場及自拍 , 

雖然手機相片只係得佢自己 , 見唔到其他人 , 不過呢個理由都幾牽強 , 

報導話佢有同行女性朋友 , 如果想睇風景 , 可以叫女性朋友內進影相丫 , 

另外去旅行竟然帶同假髮 , 好難唔令人想到係組織咁樣犯案 ,

溫泉女湯俾男人進場 , (唔係混浴果隻) 仲唔虎入羊群咩 , 

肯定連渣都唔得剩 , 即使係欣賞風景 , 亦屬嚴重罪行 , 

希望日本警方嚴刑逼供來查証 , 黎個重懲不貸 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第二樣想講既係 : 案發地點 , 白浜温泉 崎の湯

我就暫時未有幸一遊 , 第一次認識該地方 , 全靠Blog友 Shirley姐 .

佢2014年9月19日有篇遊記 , 對果度有詳細報導 .

如果有時間 , 可以上去睇睇 , 好正架 .  ^^


講開和歌山呢頭 , 本來今年都想轉場會一會佢 , 可惜 ...

不過唔緊要啦 , 明年解決埋北海道 , 再下次就可以考慮呢度 , 

呢個 白浜温泉 崎の湯 , 就算冇呢單新聞 , 都可以話係必到之地 , 

更何況想發生呢單野 , 更加係非去不可 , 到時可以睇睇個女湯 , 

係咪真係堅得咁堅 ? haha ...

Bye Bye !

2015/11/08

2016 行程初盤 (第三日行程)




Hello !


隔左兩個星期 , 再黎行程初盤 , 

今日用左一個下午黎搵料 , 終於攪掂第三日既行程 ,

一齊睇下搵到咩野料 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第三日訂左個冇早餐Plan , 第一個景點就係 和商市場 , 

一嘗佢既 勝手丼 , (之前講過好多次) 雖然有Blog友覺得果度只屬普通料 , 

不過黎到 釧路市 都唔會一會佢 , 似乎有點兒那過 , 

就算唔計佢D食物 , 當佢做景點都係一個唔錯既地方 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住 ... 如果上日未攪掂 幣舞橋 果四個像 , 咁就解決埋佢 .

 之後就去近近地既 米町展望台 居高臨下 , 一睹釧路市既風景 .

睇完就過附近既 太平洋炭礦炭鉱展示館 , 其實果度有D乜野睇既呢 ?

好似係煤炭果類野 , 去到先睇下點 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

打後沿住海邊行 , (唔知有冇封路 , 希望冇啦) 目的地係 尻羽岬 .

下一站係 あっけし望洋台 , 講起呢個台 , 2012年黎果次大霧到爆 , 

乜野都睇唔到 , 天氣既野好難預計 , 唯有盡人事 , 聽天命 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就係重頭戲 , 道の駅厚岸グルメパーク ...

呢個道の駅 , 黎過既人都知道 , 係一個食蠔既好地方 , 

上次試過BBQ , 今次N歌還是試其他食法 ? 去到先至決定啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食完個蠔餐 , 過隔離 海事記念館 , 又係唔知有乜睇 , 去到至算 .

之後本來係 國泰寺 , 不過上次已經去過 , 今次最想去既係 : 愛冠岬 .

上次又係大霧啦 , 攪到雞毛鴨血 .  =_= !!

跟住黎呢個 涙岬 , 又係重中之重 , 希望今次睇得佢清清楚楚啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再之後去多兩個岬 , 就要往旅館 , 

首先第一個岬係 : アゼチ岬 , 第二個就係 : 霧多布岬

黎到霧多布呢度 , 呢兩個岬可謂非睇不可 . 

而旅館方面 , 亦都已經揀好 , 仲Book埋添 , 叫做 : 霧多布 旅館くりもと



停車場就在旅館後面 , 夠晒方便 .  ^^

Bye Bye !



2015/11/03

110V 日本電器




Hello ! 


今朝Blog友 Shirley姐 有關於日本電器既提問 , 

如果在留言度回答 , 恐防唔夠詳細 , 倒不如開篇網誌黎講下 .

都係果句啦 , 只係將我所知既攞黎分享 , 

如有錯漏 , 祈為指正 . ( 好有免責條款 Feel )  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

平時在日本旅遊時 , 有機會都會買番D小型電器 , 

就算同一款電器 , 感覺會比在香港買既正D , 話晒都係 Buy in Japan .

不過電壓方面就要注意 , 日本係用110V電壓 , 香港就用220V ,

若然買既電器係旅行裝火牛 110V-240V  (見圖)

咁只需要用轉換插頭就可以直接插落電掣使用 .


之但係若然係正宗日本電器 110V 的話 , 

咁就要小心 , 直接插落電掣既話 , 好大機會會燒機 , 

呢個火牛就係齋 100V , 千祈唔好就咁插落電掣 .


用得上述火牛 , 必然係小型電器 , 

只需買個輕型變壓器即可 , 呢個 60 WATT MAX , 

一般小電器用就綽綽有餘 .


好似好多年前好流行既日本電話 , 耗電量甚低 , 

只係 10V , 用佢就啱晒 Key 喇 .  ^^


如果係中型電器 , 好似呢部 Victor 微型HiFi , 

若然用上面果味變壓器 , 未必頂得順佢既耗電量 .


呢個時候就要用勁小小既變壓器 , 280W MAX


萬一係較大型既電器 , 好似日本版牛龜電視 , 

(呢部應該係絕版 , 想再買都難 , 依家出晒 LED TV )

或者係雪櫃之類耗電量甚巨既電器 .


就要用更大型既變壓器 , 1000W MAXIMUM , 

大大既電器都殺得起 , 冇有怕 . haha ...


至於乜野電器用乜野變壓器 , 部電器有寫幾大耗電量 , 

用之前睇清楚 , 買個合適既變壓器就OK , 

變壓器在鴨寮街既電器舖有售 , 唔好用錯呀 .

Bye Bye !