2015/08/30

旺季旅遊




Hello !


之前曾向各界透露 , 話農曆年假想出門 , 

目的地係 : 北海道 . 其實我就至唔鍾意大時大節或長假期出門 , 

不過世事往往就係咁弄人 , 在種種原因之下 , 

只能夠在長假出發與唔出發之間作選擇 , 咁就焗住揀長假期出發啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

根據一眾Blog友既報料 , 話黎緊呢個農曆年假 , 

無論機票與酒店都會好搶手 , 正式係手快有 ~ 手慢冇 .

話時話 ~ 旺季出門呢方面經驗真係唔多 , 平時5月尾出門 , 

頂多都係一個月前左右做野 , 所以真係唔知幾時先係入市良機 ?

另外我仲有小小野要確認 , 攪掂好先至可以做野 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於地點方面 , 雖然話就話去北海道 , 不過條路點行真係未諗到 , 

因為冬天行車同夏天有好大分別 , 夏天正式係條條大路通羅馬 .

一到冬天好多地方都會封路 , 記得以前有個網頁提供北海道交通 , 

邊度有封路都可以Check到 , 不過搵唔番個網頁 .

如果大家知道既話 , 還請不吝賜教 .  ^_^ !!


呢排我會四出搜尋 , 睇下有乜好網誌 , 可以抄考一番 .

相信有排都唔得閒 . Yeah !!

首先有 3J家庭 提供雪地既 富良野 & 美瑛 等地方 . (特別嗚謝)

Bye Bye !

2015/08/21

國泰真係咁唔掂 ?




Hello !


今日頭條 : 335客滯札幌25小時 , 國泰服務太糟糕 ...


報導話日前一班原定由北海道札幌來港既CX581號航機 , 

因技術故障而跪低 , 連累335名乘客滯留札幌飽受折磨 , 

被逼入住酒店宿一宵 , 諗住翌日攪掂 , 點不知航空公司話機件故障未解決 ,

就算攪掂該班機都唔會載客 , 為疏導旅客 , 航空公司決定兵分三路 , 

有D搭直航 , 有D轉機 , 更甚至轉搭其他航空公司客機回港 , 

經25小時後終於攪掂 , 不過有乘客批評國泰服務太糟糕 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實呢篇網誌最主要係想談論國泰航空係咪真係咁唔掂 ?

剛上討論區度睇 , 真係好唔掂喎 , 簡單D講就係劣評如潮 ,

部份話服務態度差 , 航班經常延誤 , 個個都有自己既不快經歷 , 

再加上早排啊蘇 "兩條茂利" 事件 , 所以俾我既感覺真係好唔掂 .

但係呢D只不過係片面之詞 , 唔親身試下都唔可以咁快下判斷 .

只可惜國泰既自由行只做二人成行 , 因此近年都係幫襯ANA .

而對上果次幫襯國泰 , 係2009年果次北海道自由行 . (唔係自駕遊)

Gate24 CX580 09:40 ~ 札幌 ~ 


 有水有花生 , 服務OK丫 .


由於事隔多年 , 故此資料未能作準 .  =_= !!

唔知道各位Blog友近年有冇幫襯過國泰航空呢 ?

服務態度及各方面又係唔係傳聞中差得咁差呢 ?

真係要各位幫幫手 , 俾D意見 .

(無論結果好與壞 , 都改變唔到我幫襯ANA既決定)  XD

Bye Bye !

2015/08/16

駛唔駛慳皮成咁呀 ?




Hello !


今個禮拜明珠台有兩套劇既新一季上畫 , 

分別係 心計The Mentalist 同埋 欲骨查Bones , 

睇完之後真係失望到絕呀 ...

並唔係劇情失望 , 而係冇粵語配音果度失望 .  >_< !!

之前深夜播既行屍 ~ 靈感探案 ~ 箭神 , 因為深夜播 , 

所以冇粵語配音都唔係太緊要 .

跟住既 葛咸城 同埋 異種 , 由於係新劇 , 都算喇 , 

點知佢連最後一季既心計都唔配埋佢 , 正式係衰收尾呀 .

心計男主角 , 好有型呀 !!


其他角色都唔差 .


先講心計 , 由第一季追到依家 , 故事內容講男主角係呃錢靈媒 , 

因某次上電視談論案情而得罪連環殺手Red John , 

妻女被殺後加入警方做顧問兼順便查案 ... (劇情大家都熟過我啦)

每個星期我都坐定定咁收睇 , 睇佢點樣蠱蠱惑惑地查案 .  ^_^ !!

點知早日一收睇 , 竟然冇粵語配音 , 果D 真柏齊 ~ 利千穎 ~ 曹金寶 ~ 

榮威(啊wing) ~  王佳倩(Grace) 聽到熟晒既配音完全冇晒 , 

失望之情可想而知 , 跟手上討論區度搵料 , 見到其他Ching都有呢類提問 , 

有D話佢(TVB)為左節省資源配日韓劇集 , 所以唔再為美劇配音 , 

又有陰謀論人士認為TVB本土劇集不濟 , 唔配美劇音係為左減低其可觀性 , 

令觀眾轉睇番佢兩線劇集咁話喎 , 駛唔駛咁Cheap呀 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

襯記得跟手順便講埋 欲骨查 , 呢套唔記得係咪首季開始睇 , 不過都睇左好多季 .

~ 欲骨查劇照 ~ 


~ 黎多張添 ~


呢套又係啦 , 主角 白節德(啊骨) ~ 布思理(布Sir) ~ 

金美 ~ 唐唐 ~ 賀正 ~ Angela ~ 仲有好多實習生 , 

依家雖然講英文 , 但我仲好記得佢地廣東話把聲 .  =_= !!

劇情幾乎集集一樣 , 開頭講有人發現人骨 (過程勁攪笑)  XD

之後派人將遺體運往 Jeffersonian 學會研究 , 經過一輪搜證最後成功追兇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後 ~ 其實佢地想節省資源而用呢招真係好錯 , 

當年 Nicam 麗音廣播既意義 , 就係將外語劇配上廣東話令觀眾有共鳴 , 

點知家陣俾佢攪一攪 , 攪到套劇神髓盡失 , 正式係食之無味 , 棄之可惜 .

雖然係咁 , 我都會繼續追睇落去 , 不過始終若有所失咁囉 .

Bye Bye ! 

2015/08/12

3單日本料




Hello !


話咁快又一個星期三 , 襯今晚得閒寫番篇網誌 .

不過食左晚餐先 , 爭鮮壽司買既雜錦丼 , 係就係普通料架喇 , 

叫做頂住檔先啦 , 有機會先去北海道食餐勁既 .  ^_^ !!

海鮮大丼飯 , 盛惠 $38.00 啤酒另計 .


今晚有3單料要講 , 全部都在呢頁裡面 .


首先第一單 , 呢單頭先食飯睇新聞都有報導 , 

就係和歌山新貓站長 .


和歌山 伊太祈曾站 , 始終未能一遊 , 可惜 ~


新站長上任 .


再一次恭喜 二玉 正式坐正站長一職 , 

與其搵其他貓隻空降呢個站長位 , 倒不如直接升 二玉 做站長 , 

話晒都叫做 順理成章 , 名正言順嘛 , 希望有日可以親臨和歌山 , 

一睹 二玉 站長既風采 , 黎緊呢年預左俾北海道 , 

或者下下下年先啦 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

輪到下一單 , 北海道泥石流 , 60登山客一度被困 .

話說北海道持續落雨 , 致十勝岳出現泥石流 , 大約60名登山人士被困 ,

當中包括20名中小學生 , 警方及消防員用左3粒鐘先將佢地全部護送落山 , 

事件中無人受傷 , 實在係可喜可賀 . 

十勝岳果頭 , 上果次去北海道有幸在山腳一遊 , 都幾好風景架 .

唔知泥石流在邊度發生呢 ? 我去果陣附近都堆左D碎石陣 , 

如果大雨既話 , 相信都可以沖散個石陣 , 唯有好天再搭過啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後一單 : 停產兩年 , 日本重啟核電站 ...

鹿兒島川內核電站於昨日重新啟動 , 結束了日本近兩年既零核電時代 , 

有400多示威者圍堵核電站門口贈興 , 當然係抗議啦 .

日本民意調查顯示有近6成民眾反對重新啟動核電站 , 

擔心重蹈311福島核電站既覆轍 .

就算係我呢個外人 , 都唔贊成佢重啟核電 , 就算真係重啟 , 

都等福島果邊百份百攪掂晒先啦 , 所以當地居民反對有理 .

反對核電 , 抗議核電 !!   XD

Bye Bye ! 


2015/08/06

劇集介紹




Hello !


之前好多篇網誌都講過 , 近排非常之忙碌 .

其實忙黎忙去都係睇電視 & 煲劇集 . (遲D球季開鑼會更忙)

今次呢篇介紹兩套我煲緊既劇集 , 首先第一套係 : 民王


呢套尋晚先開始收睇 , 係報紙介紹 . (唔係都唔知有呢套劇)

內容講兩父子身份對調 , 即係老豆幫個仔處理事務 , 

個仔又幫番老豆咁啦 , 由於老豆既身份係日本首相 , 身份特殊 , 

所以笑料百出 , 暫時出左兩集 , 大部份都係個仔幫老豆誤打誤撞完成任務 .

講番主角 ~ 兩父子都講唔出名 , 不過就經常會在日劇裡見到 .

老豆果位就在 Doctor X 飾演過醫生 海老名敬 .

個仔就在 35歲高中生度見過 , 講番呢類身份互換劇情 , 

最經典莫過於電影 衰鬼媽咪 (Freaky Friday) , 

通常都係透過互相了解而大團圓結局 , 不過爆笑過程先至係重點 .

相信打後果D集數都會繼續追睇落去 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另一套叫做 : 來自未來的史密特 .

 

一聽個名就令人聯想到 來自星星的你 . (兩劇當然全無關連啦)

呢套劇大玩未來Feel , 內容充滿懸疑 , 我只係睇左一集 , 

暫時資料唔多 , 有時間煲多幾集再講過 .  XD

Bye Bye !