2017/02/09

2017北海道及和歌山11天自駕遊~序




Hello !


呢篇係 2017年度既 北海道+和歌山11天自駕遊 序章 .

有幾個主題先黎個解構 , 等大家對日後既行程有更多理解 .

首先係日數 , 今次話就話11日 , 其實係夜晚出發 , 晨早返港 . 

實際只可以講得9日行程 , 不過條數係咁計 , 所以都照寫11日 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後係天氣 , 托大家既鴻福 , 今次全程大部份時間都係好天 , 

有幾日甚至曬到爆 , 都算係在合格之上 , 雖知天氣呢樣野 , 對行程有莫大既影響 , 

你話好似上年尾聖誕檔期出門咁 , 航班隨時因大雪延誤 , 叫你出發前上網或者

打電話去航空公司確認 , 咁攪法 ~ 就算最終有機出發 , 心情打個5折都唔止 , 

都仲未計去到大風雪 , 就好似我今次咁 , 返札幌還車時 , 一進入札幌地段 , 

天氣即刻黎個180度大逆轉 , 還車後街上橫風橫雪 , 有個景點都取消左 , 

仲要擔心聽日有冇機落 關西空港 , (好彩最終冇事) 所以今次都叫做好彩咯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住輪到講車 , 今次兩個地方各租一款車 , 分別係 Mark X 同埋 VEZEL .

先講 Mark X , 聽聞呢款車可以去到 250km , 所以叫做 Mark X 250G , 

至於係咪真 ? 就無從稽考 , 不過佢既爆炸力 , 可以話係一絕 , 

直路扒頭果陣 , 通常都係踩盡油咁去 , 過左佢頭再切入 , 果陣睇睇個咪錶 , 

原來已經140km左右 , 短短幾個車位 , 已經可以去到咁盡 , 正式係生平僅見 , 

不過 ~ 凡事都要付出代價 , 有咁勁既表現 , 油費當然唔簡單 , 

幾近每日都要入油咁滯 , 正式係食油怪 .  XD

至於 VEZEL , 由於係 Hybrid , 油費慳好多 , 而且設備亦先進D , 最讚既係個手掣 , 

同之前既完全唔同 , 只需在波棍下面個掣Click一Click就OK , 方便都不得之了 , 

日後再向大家詳細匯報 , 而且佢係屬於 SUV , 車身比一般私家車高 , 

上落都比較方便 , 呢樣都幾重要架 , 一日裡面經常出出入入 , 每次都要側身攝入去 , 

都咪話唔煩 , 不過論到上落最方便 , 始終都係七人車 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番個行程 , 由於今次車程比較長 , 再加上冬季日短夜長 , 

相片方面冇上次咁多 , 影左大約4000張左右 , 不過唔係張張都見得人 ,

所以篇數未必有上次咁多 , 盡量寫啦 ~ 重質不重量嘛 .  haha ...

(所有相片已經Save在電腦內 , 今次包冇甩拖 , 放心)

另外由於車程長 , 加上好快天黑 , 有幾晚都要摸黑駕駛 , 有次在搵旅館時 , 

發生左件 "蝦碌事件" , 好彩只係小蝦碌 , 輕易就擺平左 , 有驚無險 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後仲有小小花絮 , 襯有時間講埋佢 , 就係出發前果陣 , 

屋企人話某運程書話我所屬既生肖 , 今年出門容易唔見野 , 叫我事事小心 .

我話 : 放心喎 , 我唔係一個容易唔見野既人 , 運程書靠得住 ...  XD

結果真係比佢講中 , 今次在酒店漏低左支 午後之紅茶 唔記得拎 , 

同埋個USB手指蓋唔見左 , 真失策 ~ 記得個蓋我明明放左落衫袋 , 

不過就硬係搵唔番出黎 , 雖然唔係好值錢 , 但在我手底下唔見野 , 個心始終唔多舒服 , 

好彩好快就平復 , 算啦 ~ 唔見呢D , 點都好過唔見銀包護照嘛 .  XD

就係佢喇 , 個蓋究竟去左邊度 , 真係心裡有個迷 ???


好喇 ~ 序就講到呢度 , 至於正式網誌 , 要再等多一兩日 ,

整理需時嘛 ~ 其實係要還電視債就真 .  haha ...

Bye Bye !



6 則留言:

  1. 謂啊姐,禾無眼花嗎,128MB USB2.0仲要掛住佢個蓋???成支揼咗佢,買支32GB USB3.0 吧啦

    回覆刪除
    回覆
    1. haha ... 係就係舊左D , 不過要黎入mp3 , 都可以入到廿零首歌 ,
      況且用左咁耐 , 有感情嘛 , 最重要係我最唔鍾意唔見野 . XD

      刪除
    2. Eagletec... 好似都收左皮

      刪除
    3. Eagletec 個網頁仲有野sale喎 , 冇咁快收皮掛 ?

      刪除
    4. 十多年前曾經買過呢隻牌子嘅 pcmica 插卡, 之後都無買過佢嘅產品...所以已為收左皮添 :)

      刪除
    5. 佢既產品我都係得唯一呢隻手指 . XD

      刪除

歡迎光臨 , 如果時間許可 , 請留番個言丫 ~