2017/02/13

2017北海道及和歌山11天自駕遊D2-2完 ホテル神居岩房間及晚餐篇




Hello !


上回講到到達 新千歲機場 及攞車後 , 一路沿住海邊北上 .

睇左幾個景點之後已經日落 , 於是乎加速向旅館方向行 , 夜車就在所難免架喇 , 

希望唔好咁耐啦 , 中途見到間便利店 , 落車入番D貨先 .

去過日本自駕遊既Blog友都應該知道 , 便利店門前可以泊車 , 好正架 .


買D乜 ? 之唔係鮮奶 & 香蕉囉 .  ^^


臨去到差唔多接近旅館 , 發生第一件 蝦碌事件 .

(其實只係發生過呢一單 , 其他果D唔記得鬆手掣開車 , 未在此列)

事發係咁樣既 , 摸黑揸左約莫45分鐘車 , 己經心慌慌 , 

(皆因唔係處處都有街燈 , 尤其果D鄉下地方 , 正式係條街黑me蚊)

GPS指向左手邊小路 , 當然跟住行啦 , 跟住指向右 , 

不過見到有個路牌話前面修路封閉 , 心諗 : 唔係化 ? 就到咯喎 , 整路啫 , 

會唔會係好似洗廁所咁 , 求其棟個牌截人 , 其實裡面仲用得 ?

於是乎決定硬闖 , 一直行都OK , 去到盡頭 , 成條路唔見左 , 下面係個大凹位 , 

跌落去肯定渣都冇 . 黑夜雪駕已經夠步步驚心 , 仲要整單前路不通 , 

當時個心真係有D寒 , 點算呢 ? 如果去唔到旅館 , 固之然失信於人 , 

但重點係今晚瞓邊度 ? 瞓在車裡面 , 容乜易變雪條 ? 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

諗得咁多黎 , 不如解決左眼前危機先 , 就係掉頭出番大路 , 

果條路鬼死咁窄 , 仲要個泊車警報鬼死咁響 , 每次差不多到訂就 Do ~ Do ~ Do 咁響 ,

心情已經好緊張架啦 , 仲要俾佢咁都嚇法 , 真係心血小D都唔掂 .

結果果手掉頭車 , 冇十手都有八手軑 , 仲要不時落車睇位 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

解決左呢個危機 , 出到大路重新Set過GPS , 佢介紹過另一條路行 , 

好快就搵到間旅館 , 妖 ~~~ 個GPS駛唔駛咁攪野呀 ? 

我都已經係用一般路線架啦 , 又唔係用距離優先 , 唔駛算到咁盡喎 .

去到旅館 , 泊好部車再拎齊野Check in , Check in 手續相當簡單 , 

通常都係俾張表你填 , 分別填上 : 姓名 ~ 地址 ~ 電話等等 ...

再俾個護照佢Copy , 之後佢會問食晚餐 ~ 早餐既時間 , 之後就OK .

今晚房間 310號房 .


先介紹下間房先 .


好簡單既一間和室 .


呢款燈有遙控 , 我鍾意 .


個雪櫃都幾大喎 .


呢個櫃放被鋪 , 一陣佢會出手 .


LED TV , 一陣大派用場 .


洗手盆 & 鏡 .


傳統式馬桶一個 .


早餐券 & 門匙 .


頭先話部電視大派用場 , 皆因晚餐在房間度食 , 電視送飯 , 正 !

送飯黎果陣 , 又有故講 , 話說送飯黎果位老太 , 

送完飯果陣 , 再逐樣講解 , 包括食完飯打電話落櫃檯叫佢收野 , 

同埋講解每味飯送與及旅館設施 , 本來只係平常事 , 

讚就讚在佢全程都講英文 , 有時我用日文回應 , 佢都照講英文 , 

雖然要睇貓紙 , 不過一把年紀都要學英文 , 淨係呢份心都唔簡單 .


跟住介紹呢餐飯 , 首先係白飯一大兜 .


海膽粉絲鍋 .


醬油魚 .


刺身 .


炸物 .


又係魚 .


青瓜兩片 .

呢餐叫做一般啦 , 不過 一泊二食 7400Yen , 仲有溫泉浸 , 都算係咁咯 .


食完飯抖一陣 , 又到餘興節目 , 一樓浴場丫 ~ 唔該 .


浸完溫泉既節目 , 就係飲鮮奶 .


乾杯 , 飲勝佢 .


睇多陣電視就瞓覺 , 今日連場大戰加尋晚通頂 , 真係要好好咁回氣 .

Bye Bye !

第二日完 .

P.S. : 今晚旅館叫做 : ホテル神居岩



6 則留言:

  1. 有時set GPS最好set埋google先得
    舊年九月果次去白金溫泉酒店因颱風關係搞到部分道路封左唔行得,全靠google map行另外一條山路經過九曲十三彎摸黑進入旅館,非常驚險﹗

    北海道必食雪糕同飲牛奶,Seico mart咁多間便利商店買野係最平,只有北海道先見到,其他地區冇

    回覆刪除
  2. 每次都好鐘意睇你介紹洒店房間呢part

    有時去到鄕下D地方,夜少少都出街,街燈又喑,你都咪話吾驚😱

    回覆刪除
    回覆
    1. 多謝支持 , 介紹房間都幾過癮架 , 間間都唔同 . ^^
      鄉下地方都係小出街為妙 , 浸溫泉好過 . Yeah !!

      刪除
  3. 有時set GPS最好set埋google先得
    舊年九月去白金溫泉旅館因颱風關係部份道路封閉,全靠google map行另外一條山路經過九曲十三彎進入旅館,非常驚險﹗
    之後果日想去青池都封左....

    北海道必食雪粽同飲牛奶,Seico mart只有北海道先有,其他地區冇

    回覆刪除
  4. 有時set GPS最好set埋google先得
    舊年九月去白金溫泉旅館因颱風關係部份道路封閉
    全靠google map行另外一條山路經過九曲十三彎進入旅館,非常驚險﹗
    之後果日想去青池都封左....

    北海道必食雪粽同飲牛奶,Seico mart咁多間便利商店買野最平,只有北海道先有,其他地區冇

    回覆刪除
    回覆
    1. 我就通常信晒車裡面既GPS , 結果俾佢跣到攤攤腰 , haha ...
      白金溫泉正常應該係行果條大直路入去 , 行九曲十三灣既山路 , 一定非常刺激 .
      Seicomart 淨係北海道先至有 , 唔講真係唔知 , 以為全日本都有咋 .
      每日早餐(如果有)都會隊番杯鮮奶 , 感覺上好飲D .

      刪除

歡迎光臨 , 如果時間許可 , 請留番個言丫 ~