生日快樂2019

Hello !

大家好 ! 今日係12月26日Boxing Day , 

一如以往 , 在呢度攪番個小型生日會 , (上年總總原因下Miss左)

唔緊要啦 , 忘記左佢 , 今年一於食餐勁既 !!

先黎生日蛋糕一個 . (好似暗左D喎)

加埋閃光燈 , 效果好好多 .

另一個角度黎多張 .

開始喇喂 , 切件大既俾自己 , 其他自便啦 .

仲有其他小食 , 不過酒微菜薄 , 都費時獻醜咯 .  XD

最後都要講下生日願望 , 除左身體健康 , 青春常駐呢D大路野 , 

希望公司慢慢上番軌道啦 , 搵唔到食好慘架 .

另外睇番上次(2017)生日會果篇網誌 , 尾段仲講緊租 Honda N-Box , 

黎緊既農曆年 , 相信都唔會出門 , 再隔多一年 , 我諗應該會成行掛 , 

希望啦 , 正所謂今日唔知聽日事 , 不過點都要向好果方面諗 ,

就當係有拖冇欠啦 .  ^_^ !!

Bye Bye !

香港寬頻+myTV SUPER

Hello !

睇番上果篇網誌日期 , 原來相距近兩個月時間 , 

仲以為一兩個星期添 , 認真係時日如飛呀 ...

今次呢篇網誌 , 主要內容係轉換了網絡供應商與及myTV SUPER .

事緣一向用開PCCW , 依家已經轉會 , 過檔去HKBN .

最重要既理由就係價錢夠平之餘 , 仲有額外野送 .

送左既 , 就係呢套myTV SUPER機頂盒 (約滿後唔駛歸還)

線路已於較早前安裝好 , 而個盒亦於同日送上 .

包括有 : 主機一個 , Lan線一條 , 電源線一個 .

當然唔小得搖控器啦 .

機背有五個窿 , 由左至右分別係 : Reset (如非必要都唔會攪佢)

USB插頭 (暫時都未用得著) , HDMI插頭 (插電視)

LAN插頭 (插LAN線) , 最後係電源線插頭 .

基本上插三條線就OK , 首次著機時 , 要輸入D號碼 , 裝機師父幫我攪掂埋 .

連接電源後 , 中間藍綠紅燈會亮著 .

平時只係當機頂盒咁用 , 81台TVB , 一般電視都可以做得到 .

P.M.9:30 娛樂大家 .

張秀文 .

基本上都唔知點玩法 ?

大笑 haha ...

跟住進入點播區 , 呢度先至係重點 .

Doctor X 第六季 , 更新到第八集 .

摘星廚神 .

更新到第七集 , 呢兩套先至係重點出擊 .

雖然在網上都可以睇到 , 而且大家都係日文版 , 

不過在電視裡面睇 , 畫面大D , 舒服D , 所以都好滿意 .

介紹就到呢度 , HKBN服務同PCCW差唔多 , 

但係價錢就平幾十蚊一個月 , 仲多個TVB盒子玩下 , 

今次轉會 , 都算係明智之舉 , 依家既時勢 , 慳得就慳嘛 .

Bye Bye !

更換浴室抽氣扇

Hello !

今晚星期六 , 收工時食完晚飯 , 順手寫番篇網誌 .

暫時既內容 , 都係以生活上瑣碎事情為主 , 今次呢篇講 "更換抽氣扇" .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

話說近排個抽氣扇 , 使用上冇乜問題 , 不過可能係個膠蓋老化左 , 

每次關門時 , 受氣流衝擊之下 , 膠蓋底部有翹起情況發生 , 

嚴重時會被扇葉擊中 , 發出聲響 , 要即刻熄機 .   >_< !!

本來搵膠紙黐住個蓋 , 或者用野攝住 , 問題都可以解決 , 

之但係呢D只係治標既辦法 , 治本當然係換過部新機啦 .

加上舊機積滿晒塵 , 費時拆出黎清潔咯 , 懶得就懶嘛 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

就係咁 ~ 決定出去買機 , 原來抽氣扇都有好多個牌子 , 

不過心水入圍既 , 只係得兩個 , 就係 KDK 同埋 三菱 , 呢兩款都唔錯 , 

價錢亦都差唔多 (KDK貴小小) , 三菱D螺絲窿位 , 同舊果部一樣 , 

重新鑽過的話 , 工程實在太大 , 所以順理成章之下 , 揀左三菱 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講左咁耐 , 做野咯喎 , 再欣賞多次部舊機 , Fujicap 名不見經傳 .

用左好多個年頭 , 清潔過幾次 , 今次唔清潔 , 一於換機 .

就係膠蓋下半部 , 關門時會翹起 .

都積左唔小塵 , 今次未算最多 , 更差既都試過 .

鬆開幾粒螺絲 , 拆佢落黎 , 唔駛清潔 , 直接拎去掉 , 爽呀 !

周邊就要清潔 , 呢張好似背光 .

用閃光燈黎影 , 又好似光過頭 .  XD

三菱牌 EX-20SHC5T 抽氣扇 , 叫做 8寸 , 適合一般家庭使用 .

拆箱 ~ 有D似人地D開箱文 .

抽氣扇啫 , 又唔係乜野高科技家電 , 唔駛多介紹喇掛 .

拆左個膠袋 , 盒裡還有封說明書 , 相信都冇乜人會睇 .

擺上去對番D螺絲位上實佢 .

係咁咦開機黎個測試 , OK ! 

Cup番個蓋 , 再執好D電線 , 咁就大功告成 , Yeah !!

唔知係心理作用還是黎真 ? 總係覺得新機爽好多 , 

加上又靜好多 , 依家去廁所都係一種享受 , 正呀 ! 

正式係相逢恨晚 , 早知就早D換機啦 . haha ...

Bye Bye !

又要講唔好意思

Hello !

今次呢篇網誌 , 距離上篇兩個月左右 , 起初諗住停左一排 , 

打後每個星期寫一篇 , 應該冇乜問題丫 , 不過事情並唔係咁順利 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

因為由6月開始至到依家 , 香港發生乜野事 , 大家都好清楚 , 

事件不斷發展中 , 對各行各業都有唔同既影響 , 好唔好彩 , 我果行比較重災 , 

(係邊行就無謂提 , 總之就愁爆咁啦) 依家正在諗辦法中 , 

試問仲邊有咁好閒情逸致黎寫網誌呢 , 所以寫完呢篇之後 , 

相信會不定期更新 , 希望各界可以體諒 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外黎緊既農曆年外遊計劃 , 相信好大機會告吹 .

除左經濟層面方面 , 就係時機問題 , 依家香港個朵已經臭到無可再臭 , 

去到外地千祈唔好承認自己係香港人 , 就算人地唔郁你 , 

自己都要搵窿捐 , 所以暫時都係Hold住先 , 遲D再睇下點 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後就係介紹飲食 , 上個星期六收工之後 , 去左大家樂 , 

見到有個流沙奶黃西多士茶餐 , 睇落好正咁喎 , 一於試一試佢 .

再配埋紅豆冰 & 粟米 .

切開真係有流沙架 . (西多我比較鍾意切開六件)

由於D奶黃本身已經好甜 , 所以唔駛落糖漿或煉奶 . 味道唔錯喎 , 

食左幾十年中間夾花生醬 , 轉一轉流沙奶黃 , 感覺很好 .

宣傳單張 , 好似話係期間限定 , 唔知做到幾時 , 有興趣可以一試 .

Bye Bye !

唐記包點 阿華田包

Hello !

話都冇咁快又一個星期 . (次次都係用呢個開場白)  XD

呢排都只係講生活上既無聊野 , 呢篇就講呢一單 ...

我住果度開左間 唐記包點 , 都有一段日子 , 

大部份時間都係幫襯佢既蒸飯 , 順便搭多個蓮蓉包 , 不過蓮蓉包經常斷貨 , 

果日咁啱就沽清 , 店員問 : 不如試下 阿華田包 丫 .

又好啫 , 一於試下 ... 其實阿華田呢樣野 , 相信冇乜邊個未飲過 , 

曾幾何時 , 我每日都會飲番杯 , (有時飲好立克) , 

所謂時移勢易 , 依家多數飲凍奶茶或者凍咖啡 , 

所以都好小接觸阿華田咯 , 今次就黎個試食啦 .  ^_^ !!

啡色既包 , 襯番阿華田既顏色 .

一切開 , D餡多到呢 .

買到返屋企 , 雖然不至於凍冰冰 , 不過同即場熱辣辣咁食 ,

打左小小折扣 , 點都好 ~ 個包做得唔錯呀 , 比想像中好 .

如果唔怕甜 , 值得推薦 , 好 !

Bye Bye !

再見 ! Sony細電視

Hello !

今日星期日 , 又到出稿日 , 相信呢排都會以無聊瑣碎事為主 .

今次講睡房中的細電視 , 就係呢部喇 .

講開呢部電視 , 都買左好耐咯 , 唔記得有冇在網誌出現過 ?

部機放在睡房裡要黎駁腳 , 睡前睇一睇 , 至到高清廣播出現 , 加過機頂盒 , 

都仲頂得住 , 不過我份人一向都環保 , 唔用到盡都唔會掉 , 

終於等到冇晒反應 , 可以掉喇 , 要諗個辦法解決左佢 .

搬定出黎來個送別儀式 , 辛苦晒 !

Bye Bye !

更換鋅盆漏水位

Hello !

話都冇咁快又到星期日 , 上篇都講過 , 依家拖懶左個身 , 

要好似想當年咁每日出一篇稿 , 睇怕都冇乜可能 .

一周一篇都唔錯丫 , 暫時以呢種方式試下先 , 遲D再作檢討 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次既主題叫做 : 更換鋅盆漏水位 , 即係廚房裡面果個洗碗盆 .

早排發現有漏水情況 , 雖然唔算好嚴重 , 不過果D地方漏水 , 

那怕只係漏一滴出黎 , 都會攪到周身唔舒服 , 非解決不可 .

呢類小工程 , 如果俾人攪 , 連工包料幾舊水 , 相信都冇得點走雞 , 

依稀記得 Maggie & Kaykie 有一篇叫做 : 2013.1.5 更換鋅盤去水位 DIY , 

(唔好意思 , 又要提起你個名)  XD

睇落都唔算太難攪 , 不如膽粗粗試下自己黎 , 慳得一蚊得一蚊嘛 .  ^_^ !!

好多五金舖門口都會擺D材料 , 求其買一包 , 十幾蚊貨仔 .

即係地下果D , 任揀一包 .

買左料就黎囉喎 , 第一件事 , 就係拆開舊既水隔 ,

先先諗住用螺絲批鬆開佢 , 點知已經滑晒牙 , 最後唯有用暴力撬開佢 , 

仲以為好難拆 , 點知條長螺絲經過日子有功 , 變左支牙簽咁 , 一撬就斷開 . 

嚇得我丫 , 如果第一關都攪唔掂 , 仲點玩落去 .

盆底下面既情況 .

舊果個水隔 .

擰開出黎 , 依 ....... 正式係千年污漬 . (有D似芝麻糊)

拆開出黎之後 , 唔駛清潔 , 一陣成套換晒 , 乾手淨腳 .

先介紹下D配件 .

寸半闊 , 標準Size .

拆開就係咁樣 .

喉管有兩條 , 適合唔同Size接口 .

拎走個水隔 , 稍為清潔下 .

下面又係稍為清潔 .

呢堆就係舊料 , 一陣全部掉晒佢 , 實在太過污糟 .

去水口 , 抹到佢乾乾淨淨 .

揀啱所需配件 .

好似砌模型咁砌 .

先由呢件開始 .

記得套個膠圈上去先至好擰 , 否則會漏水 .

就係咁樣 .

正常情況下都唔駛用油灰 , 就咁Cup正就得 .

最後呢度 , 較啱D位就擰緊佢 .

開水測試 , 滴水不漏 , 大功告成 , Yeah !!

慳番幾舊水人工 , 其實呢D正式係人工錢多過材料錢 , 

成包材料都係十幾蚊之嘛 , 好賺到呢 .  >_< !!

Bye Bye !