Hello !
睇番以前D網誌 , 更換乜乜物物都寫左好幾篇 , 近既有抽氣扇 ,
鋅盆漏水位 , 遠既就浴室水龍頭 , 今次都係水龍頭 , 不過由浴室轉往廚房 .
講開呢個水龍頭 , 真係有段故 , 不如聽埋先至睇安裝 , 咁樣比較傳神D .
話說我在年少時 , 屋企買左樓 , 入伙時有新樓住 , 當然開心啦 ,
而果陣對家具都冇乜要求 , (亦可以話冇乜話語權) 總之有自己既房間就OK ,
若干年後 , 發現個廚房水龍頭 , 好似有D設計上既問題 , 乜野問題一陣先講 ,
不過問題唔係太大 , 所以都冇深究 , 當時心諗 : 等到佢有壞既一日 ,
即刻就換左佢 , 乜都唔駛講 . 如是者一等多年 , 終於等到佢有壞既呢日來臨 .
還記得入伙時係1992年 , 依家2020年 , 即係等左佢足足28個年頭 .
(咁又唔係日思夜想果隻 , 照番正常咁生活啫 , 所以都唔覺得好耐)
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
好 ~ 講完典故 , 出去買料 , 地點係旺角果頭 , 去到又係Wow一聲 ,
九十幾個款任揀 , 對於我呢類有選擇困難症既人黎講 , 都幾難揀架 ,
結果都揀到一款合眼緣 , 叫做啱心水既水龍頭 ,
家陣用左幾日 , 仲越用越鍾意添 . ^_^ !!
就係佢喇 , 大大盒 , 成個鞋盒咁款 .
1~2~3開 , 裡面有三樣野 .
分別係水龍頭一個 , 配件一合 , 說明書一份 .
配件裡面有兩包野 , 打開就係呢D .
睇完個水龍頭 , 依家講解舊水龍頭有乜設計上既唔妥 .
就係太過貼個鋅盆 , 如果淨係洗手 , 只要隊對手落去就OK .
不過若然係洗煲或者碗筷多 , 咁樣個出水位就會頂住 , 即使出水口可以左右移位 ,
都稍為唔方便 . 慶幸既係冇乜幾可多碗筷洗 , 平時都係煲下涼茶 ,
或者榨汁機配件等 , 好話唔好聽 , 間屋入伙左咁耐 , 都未曾煮過一餐正式既飯 ,
(煮出前一丁唔計數) 可能因為咁 , 先至可以忍咁耐 , 否則早就換左咯 .
講完缺點 , 跟住講點解要換 , 正常開關及出水冇問題 .
淨係個連接位有漏水情況 .
加個膠片就可以卸番落鋅盆 .
不過呢個只係權宜之計 , 咁好機會 , 梗係換個新架啦 .
咁黎咯喎 , 第一件事 , 當然係關水掣啦 .
執走附近D雜物後 , 用士巴拿擰果兩粒大螺絲 ,
唔記得擰左定擰右 , 開到就OK啦 .
拆開就係咁樣 , 比想像中容易 , 之後係拆埋牆上兩塊蓋 ,
呢兩塊蓋就難拆咯 , 可能係滑左牙 , 每次擰到咁上下又走番入去 , 個邊頭又鬼咁鋒利 ,
真係要好小心 , 結果費盡畢生功力先至拆得到佢出黎 .
攪掂 ~ 係咁咦清潔一下四周 .
講D題外話 , 果陣諗住開小小水掣 , 沖出水管中可能有既碎石 ,
出去開DD水 , 點知重手左小小 , 對面雪櫃都濕埋 , 第日再用呢招 ,
記得用毛巾包住出水位 , 咁樣穩陣D .
下一Part , 上兩塊新蓋上去 .之後既螺絲位 , 卷唔卷白膠布都得 ,
Youtube短片D人都係就咁裝個水龍頭上去 , 冇加膠布 ,
不過我就加左DD , 幾個圈咁啦 , 要黎好睇D .
水龍頭左右 , 記得加膠圈 , 否則擰到幾緊都會漏水 .
另外教學短片話最好拆個頭出黎 , 以防新水龍頭裡面有碎石 ,
出左一輪水之後先至安番上去 .
對番兩個窿位擰實佢 , 最好就每邊擰小小 , 直至擰無可擰 ,
千祈唔好擰到一邊死晒再擰另一邊 , 仲有 ~ 搵D野包住粒螺絲先好擰 ,
舊果個就話之你 , 新既水龍頭安裝時 , 螺絲花晒既話就唔好啦 .
加左白色膠布 , 係咪好睇D呢 ?
應該就鋪滿水喉部份既 , 依家得一半 , 算啦 ~ 費時翻兜 .
OK就出去開水掣 , 通常我都擰到盡之後 , 再回番小小 ,
習慣係咁 , 冇得解釋 , 可能係唔想去盡掛 ?
開水儀式 , 1~2~3~開 , 冇滲漏之餘 , 出水正常 , 合格 !
裝番個頭再開 , 出水靚好多 .
剩餘既配件 , 說明書我相信冇乜人會細閱 ,
另外果兩支野應該係大轉細或者細轉大 , 不過太難既野我都唔識攪 ,
淨係識得D手板眼見功夫咋 . XD
舊既水龍頭 , 果兩個窿裡面黑晒 , 非常之污糟 ,
我個人認為 , 就算冇壞 , 隔十年八載都應該換一換個水龍頭 ,
相信正常都唔會有人拆個水龍頭出黎清潔再裝番 ,
所以裡面可能會老化晒 , 呢個水龍頭用左廿八年 ,
平時可能飲飲埋埋唔小污糟水 . =_= !!
講番呢個水龍頭優點 , 除左唔會頂住之外 ,
由於出水居高臨下 , 所以唔駛開咁大水 , 年中慳埋唔小水費呀 .
(開盡的話 , D水會彈到四圍都係 , 仲麻煩)
唔用時可以擰埋一邊 , 呢款水龍頭 , 正式係相逢恨晚 .
個水龍頭就新 , 可惜附近就爛爛殘殘 , 冇辦法啦 ,
住左咁耐 , 除非大裝修 , 否則都好難有乜野改變 ,
不過用得就用住先 , 現時都唔想有乜野大攪作 .
Bye Bye !
