Hello !
轉眼又過了兩個多月 , 呢排既環境都唔慌好得去邊 ,
尤其係個疫情又翻兜 , 日日都幾十人確診 , (今日仲過佰添)
都咪話唔得人驚 , 自從再爆發之後 , 冇乜必要都唔好出街 ,
日日都係返工放工 , 生意就捱得一陣得一陣啦 . >_< !!
上篇咪話派左八萬蚊救命錢 , 同埋最近全民派一萬 ,
仲有$7500自僱人士保就業資助金 , 全部都收妥 , 仲可以頂多一排 ,
不過市道都冇乜多大起色 , 認真無奈 .
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
生意就講住咁多先 , 輪到講近況 , 呢幾個月黎生活都起左好大變化 ,
以前好景果陣 , 屋企又裝有線 , nowtv , 就連上網都幫襯兩間公司 ,
繼有線於數年前取消左 , (因為德甲冇英超咁好睇) nowtv亦都取消埋 ,
一套nowtv器材亦都交番俾佢公司 , 從此無波一身輕 ,
都唔係既 , 99台久唔久都會免費直播一場 , 不過就唔係主打果D囉 .
之後就係寬頻上網 , 早幾篇咪話幫襯左HKBN ,
前一兩個月PCCW亦都正式完約 , 部機交番俾佢公司 ,
依家淨係用HKBN , 用落都OK丫 , 都冇乜投訴 .
再黎就講電腦 , 一直以黎睇Youtube同煲劇 , 都係用個mon既喇叭 ,
呢方面我既要求唔高 , 聽得到就算啦 , 之不過近日去到某D高音位 ,
D聲拆拆地 , 無奈地要買個電腦喇叭 , 雖然出左1萬蚊 , 不過都唔捨得買貴野 ,
求其買個小喇叭就算 , 就係呢一款 , 價值$70.00
拆開出黎有兩條線(不過黐埋為一條)
接駁亦都好簡單 , 一頭插在出聲位 , 即係綠色窿 ,
另一邊插在求其一個USB位 , 中間盒仔要黎較大細聲 .
用落都OK呀 , 聽講野分別唔係咁大 , 一到播歌果陣 ,
就聽得出同Mon喇叭既分別 , 呢個喇叭好聽好多 .
當然同貴喇叭仲有好大距離 , 不過以性價比黎計 , 都相當滿意 .
最後係黎個大家樂雞鮑翅晚餐 , 呢餐係疫情初發之時影落 ,
依家晚市只能夠外賣 , 冇得堂食 .
睇開我旅遊網誌既讀者都應該知道 , 大部份既情況下 ,
我都會清檯 , 好小食剩野 , 做人有衣食好D . XD
好 ~ 呢篇講住咁多先 , 希望疫情快D過啦 ,
依家既生活真係好難頂呀 !!
好話唔好聽 , 要全球都冇晒疫症 , 仲有搭飛機唔駛戴口罩 ,
起碼都要三幾年時間 , 仲要係快果隻添呀 .
Bye Bye !
