檢測 ~ 檢測 ~ 再檢測

Hello !

一別數周 , 今日又黎過 , 而話題離唔開疫情與檢測 ...

上篇咪話住果座大廈要強制性檢測既 , 點知今個星期 , 連做野果度都要強檢 , 

一中就中個孖寶 , 都算係唔好彩 , 不過唔駛被封街強檢 , 都未算最黑 .

於是乎去 楓樹街 球場度做強檢 , 今次同上次唔同 , 有成百幾人排隊 ,

(現場唔俾影相 , 否則必定上載番幾張俾大家睇下實況 , 可惜)

由於果日都幾猛太陽 , 又冇帶定雨遮 , 結果曬足粒幾鐘先至攪掂 , 

真係做多多美白都補唔番 ,    >_< !!   隔日之後有結果 ~ 陰性 , 咁都好D

登記果陣話係強制檢測地帶 , 附送漂白水一支 , 多謝晒喎 .

其他自願檢測既人冇得送架 , 現場只有三幾個有漂白水 , 包括我在內 .

隔左幾日行過球場 , 咦 ~ 冇乜人做檢測既 ? 

同早幾日賓墟咁既場面相差甚遠 , 橫掂我做野果度屬於高危地帶 , 

不如檢測多一次 , 要多支漂白水都唔錯丫 .   ^_^ !!

之不過今次唔係送漂白水 , 而係送口罩一盒 , 真係估佢唔到 .

一盒50個 , 加埋上次支漂白水 , 呢個政府都算唔話得 .

講完檢測就講其他野 , 去日本一事就冇限期柙後 , 

今日在日本城見到有青森蘋果汁賣 , 咁就整番支黎頂住癮 .

 35.00/支 , 當去左日本 , 都唔錯架 . haha ...

再加一粒冰 .

飲杯 .

Bye Bye !

強制性大廈檢測 ~ 結果篇

Hello !

呢篇係上篇既延續篇 , 上回講到檢測完之後回家等結果 ...

隔左一日之後 , (可能係1號假期休息) 今朝開工冇耐就收到結果短訊 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

托大家既鴻福 , 加埋自己神功護體 , 証實冇俾大廈中招人士感染 , 

檢測結果為陰性 , Yeah !! 雖然結果屬意料中事 , 不過都有小小緊張 ,

因為好話唔好聽 , 若然屬於冇症狀感染人士 , 咁就大鑊咯 ,

首先應該點樣醫 ? 屋企人駛唔駛隔離 ? 要醫幾耐 ? 駛唔駛收費 ? 全部都唔知道 ? 

最慘都係手停口又停 , 萬一咁唔好彩中招 , 絕對係災難性事件 .

09:35 就send短訊過黎 , 好呀 ! 唔駛心掛掛 .

12:09 再Send多一段短訊 , 話可以申請電子檢測記錄 , 

唔駛咯 , 執番身彩就算 .

寫稿時適逢播放東張西望 , 報導話強制檢測安排混亂 ...

今次強檢能夠順順利利 , 叫做不幸中之大幸啦 , 不過唔好再黎喇下 .

既然咁高興 , 收工時整番半打蛋撻賀一賀佢 , 正常就應該啤啤佢 , 

之但係有樣野 , 唔講大家唔知 , 就係我已經戒左酒 ,

即係由2019年1月1日開始至到依家 , 一滴啤酒都冇飲過 , 可謂決心十足 .

不過又唔係乜野硬性規定既 , 只要去到日本 , 晚餐既時候一定飲大佢 .

在香港冇飲開就費時買黎飲咯 , 反正飲唔飲都冇乜所謂 .

蛋撻半打 , 手快有 , 手慢冇 . haha ...

好 ~ 講住咁多先 , 第日再玩過 .

Bye Bye !

突發 ~ 強制性大廈檢測

 

Hello !

今日係一月一日 , 首先祝大家新年進步 , 身體健康 , 

發多D新年財 , haha ... 農曆年咩 . XD

呢兩晚市區只得8度左右 , 正式係凍到啊媽都唔認得 , 日頭還好 , 好似依家咁烈陽普照 , 

一D寒氣都冇 , 就連外套都唔駛著 , 一件T恤都頂得順 , 係乾燥左D啫 .

講開又講 , 夜晚果陣既凍 , 令我諗起去北海道時 , 在機場等轉機果陣 , 

厚衫大褸放在寄艙行李未拎出黎 , 襯果陣會行出機場室外地方 , 

感受一下寒氣 , 直到頂唔順先至返回室內 , 日本市區氣溫大約零度 , 

陣陣寒風直刺入骨內 , 真係好爽架 , 依家既氣溫可以感受番當日既情懷 , 

而真正去日本一事 , 不知何年何月先至可以咯 , 唉 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 廢話講完入番正題 , 呢篇叫做強制性大廈檢測 , 簡單D講 , 

即係14日裡面 , 有兩個人中左招 , 該棟大廈所有住客及訪客都要強制性檢測 , 

好唔好彩 , 我住果座大廈剛剛入圍檢測門檻 , 所以就要接受強檢 , 

正式係六合彩就唔見中 , 衰野就中到正一正 .  >_< !!

所謂兵貴神速 , 尋晚番屋企知道消息後 , 食完個晚飯 (買左外賣唔想攤凍)

襯佢未收工 , 落去做埋個檢測 .

去到檢測中心 , 同上次全民檢測一樣 , 係都係用棉花棒撩兩邊鼻及喉嚨 , 

過程完全唔痛唔盛 , 仲有D舒服添 , haha ... 而且安排相當之妥當 , 

登記好身份証之後 , 排一兩個人就到 , 全程只係用左幾分鐘就OK , 

睇新聞見到其他人做強檢 , 個個怨聲載道 , 甚至話同跳舞群組一齊排隊 ,

真係唔得佢死呀 .  XD  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

順便講埋 , 今次檢測費用全免之餘 , 仲有一整盒口罩送 , 

上次只係送10個 , 今次送足一盒 , 認真大手筆 , 多謝晒喎 .

雖然我屋企大把口罩 , 不過叫做小小意思 , 唔成敬意 , 請笑納 !

就係呢一盒 , 50個裝 , NOT FOR SALE

一袋裝晒 , 冇獨立包裝 , 冇乜所謂啦 , 送既野 , 要求唔好咁高 .

最後 , 希望得出黎既結果係陰性 , 否則就真係大檸樂咯 .

不過我對自己好有把握既 , 有消息再通知大家 .

Bye Bye !