Hello !
唔好意思 , 咁耐冇同大家見面 , 呢排都係忙於生意 ,
所以冇乜時間攪個網誌 , 而生意方面亦都冇乜起色 , 一日唔清零及通關 ,
都唔會有乜作為 , 不過長命功夫長命做 , 急都急唔黎 .
至於呢篇網誌 , 並不是講抗疫檢測果D負面野 , 而係講生活上既無謂野 .
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
話說管理處每月會派垃圾袋 , 通常我都會放入廚房地下櫃裡 ,
某日如常打開 , 咦 ~ 點解地下濕濕地既 ? 搵個電筒搜查下 , 發現水管有滴水跡象 ,
好彩只係滴水而唔係大爆 , 否則大鑊好多 .
就係地下膠兜上面果個位置 .
大約一分鐘三滴水既流量 , 之前有講過 , 果D位置 , 只要有一滴水 ,
都會周身唔聚財 , 更何況唔理佢既話 , 一旦大爆發 , 後果可以好嚴重 ,
簡單D講就係非解決不可 , 於是乎翌日就搵人黎打價 ...
佢上黎之後 , 睇左一輪 , 話呢D係鐵喉 , 耐左會生鏽 , 希望我全屋都換銅喉 ,
整個工程大約 $7000.00 , 本來都有佢既道理既 , 不過D喉有部份入牆 , 佢話會放棄 ,
改為明喉 , 要鑿穿兩幅牆 , 經過深思熟慮之後 , 決定都係淨係整爛果個位算數 ,
錢固之然係一個問題 , 最大問題係用明喉 , 攪到間屋不倫不類 , 呢樣先至係重點 .
淨係整爛果節 , 工程費用 $1000.00 , 需時一粒鐘多小小 , 本來應該貨比三家 ,
格一格價 , 不過當日淨係想快D攪掂佢 , 而1仟蚊亦都唔算太離譜 ,
所以就俾佢攪掂啦 , 由於係街坊生意 , 好快就黎做野 .
為左唔打擾佢做野 , D相都係完工之後先至影 , (未清理果陣成個戰場咁架)
將爛果節鐵喉換左銅喉 , 駁落原本果位度 .
要鑿穿幅牆出去出面 .
即係咁樣 .
外面就係咁樣 , 再加多一節 , 直通入水錶 .
整完之後冇再漏水 , 舒服晒 !
雖然呢D只屬小型工程 , 不過自己絕對DIY唔到 , 除左唔夠力拆水喉之外 ,
亦都冇佢果套架生 , 更加冇水電工牌照 , 有D錢係要俾人賺架喇 .
好 ~ 今次講住咁多先 , 第日再講過 .
Bye Bye !
