2023/12/25

生日快樂2023

 


Hello !


今日係12月25日聖誕節 , 順便攪埋個生日派對 .   ^_^ !!


上次果篇網誌 , 正係上年既生日 , 即係話足足一年先至寫一篇 , 

真係開口中呀 , 不過冇辦法啦 , 依家好多媒體都好吸引 , 寫網誌都Out左 ,

就好似睇Youtube咁 , 我一日都花好多時間 , 相信過左呢篇之後 , 

又要明年見 , 至於日本果方面 , 由於佢多次排放核污染水落海 , 

所以都唔知仲有冇機會再去 , 就算真係去 , 都未必會寫網誌 , 

玩完就算 , 一切在心中 , 夠晒慳水慳力 . haha  ... 

(未必既 , 如果真係有機會出門 , 相信都會做個網誌黎記錄 , 

不過呢日唔知係猴年馬月)

輪到生日願望 , 今次大願D , 希望世界和平 , 唔好再有戰爭 , 歌都有得唱啦 : 

無助與冰凍的眼睛 , 流淚看天際帶悲憤 , 是控訴戰爭到最後傷痛是兒童 ...

另外最重要既係身體健康 , 開開心心 , 咁就夠架喇 .

Bye Bye !



2022/12/26

生日快樂2022

 


Hello !


一年容易 , 唔覺唔覺 , 又到左12月尾 , 今日26號  ,

正係生日既正日 , 係咁咦攪番個生日會啦 , 什果蛋糕一個 , 

年年都係咁上下 , 求其啦 ~ 叫做圍內人聚一聚 .  ^_^ !!


例牌切件最大既俾自己 .


食先喇 ~ 唔好客氣 , 請自便 .


睇番上次果篇網誌 , 在2月10日 , 即係成10個月都冇更新 , 

好話唔好聽 , 差D遺忘左呢度 , 下次更新有可能係2023年既生日篇 ...

唉 ~ 認真無奈 , 個心已經唔在呢度 , 除非重新去日本玩番趟 , 

咁就會好積極地寫遊歷俾大家參考參考 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番今年 , 真係發生左好多事 , 由年頭既不斷檢測 , 

至係依家連安心出行都冇埋 . 新冠既毒性 , 亦由十步殺一人 , 

降到只係普通感冒既級數 , 呢樣真係意料之外 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番正題 , 日本都叫做開番關 , 我幾時會再出發呢 ?

答案係短期內都唔會咯 , 點解呢 ? 原因有兩個 , 一 : 雖然佢開晒關 , 

但都好似好多人中招喎 , 如果依家就去玩 , 有D送羊入虎口Feel囉 .

二 : 就係日本當地 , 都係百廢待興 , 未必接受到突而其來既大量遊客 , 

倒不如等多一排 , 等佢穩定D先至去 , 咁就玩得開心D , 

而且聽講D機票都好貴下 , 又係再等佢慢慢回落先 , 

即係話唔等都等左咁耐 , 唔爭在等多佢一年半載先至做野 .

Bye Bye !

咦 ~ 好似冇講生日願望喎 , 都係果D開開心心 , 健健康康之類 , 

依家年紀大右 , 唔似得後生果陣乜都想要 , 平淡是福 !!

再一次 Bye Bye !




2022/02/10

安心出行 - 感染風險通知

 


Hello !


大家好 , 呢排香港既感染人數 , 可謂大爆發 , 之前講過 , 

冇乜事真係唔好出街 , 安坐家中睇冬奧 , 都係一個唔錯既節目 .

不過就算點樣小心 , 病毒都有機會搵到你 , 就好似早幾日出街食飯 , 

Do ~ 了安心出行 , 食完飯如常返屋企 , 隔幾日睇返 , 咦 ~

竟然有一次感染風險通知 , 咁大劑 ...


於是乎睇下乜野事 , 原來佢話2月2日果陣 , 與中招人士同場食飯 , 

有潛在感染既危機 , 最好就去做個檢測 , 大家但求心安 , 

萬一真係中招既話 , 都可以及早治療 , 否則得到重症 , 咪重大件事 .  


跟住去就近既檢測站 , 即係黃大仙祠隔離果度 , 果日係星期日 , 

Wow ~ 正式係萬人空巷呀 , 龍尾都唔知在那方 , 心諗 : 咁樣既環境 , 

排到黎起碼兩粒鐘或以上 , 大好星期日 , 梗係睇冬奧啦 , 

點會咁戇居排隊喎 . haha ... 乜都唔駛講 , 即刻走 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住星期一諗住閒日會小人D掛 , 一於再去睇睇 , 點知 ... 黐線架 , 

比起尋日 , 人數仲要多 , 目測起碼多一倍人 , 正式係賓墟咁既場面 .

又係即刻走 , 返到屋企又再心諗 , 咁樣唔掂喎 , 大吉利是 , 

如果係無症狀感染者 , 咁屋企人咪大檸樂 , 唉 ~ 最多同你排通宵 , 

點都要解決左佢 , (就算你肯排通宵 , 佢都要收工啦)  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後食完晚飯 , 再去同佢死過 , 排就排啦 , 去到果度 , 

一如以往咁多人 , 排左幾分鐘 , 隊尾有工作人員話另一邊都有個檢測站 , 

唔駛在呢度排餐飽 , 個站就在附近 , 叫做睦鄰街球場 , 即係現崇山隔離 .

去到果度 , 都唔係想像中咁小人 , 不過郁得都幾快下 , 咁就一於排佢啦 , 

如是者大約九個字 (即係45分鐘) 就攪掂整個檢測流程 , 

隔左1日半之後 , 收到短訊通知 , 檢測結果為陰性 , 舒服晒 .


今日開手機 , 多左一次感染風險通知既 ? 

自從果次之後 , 我都冇再用安心出行 , 就算食飯都係買外賣 , 

又點會多一次風險呢 ? Click入去睇 , 都係2月2日果次啫 .

唔知佢會唔會自動取消感染風險通知既呢 ?


Bye Bye !