2017/12/26

生日快樂2017




Hello !


今日係12月26日 拆禮物日 , 亦係我既生日正日 .

尋晚在家中攪左個細細地既生日會 & 聖誕Party ,

同往年一樣 , 叫做圍內人係咁咦聚一聚咁啦 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

生日會既野 , 乜都唔駛講 , 只需要大擦一餐 .

首先黎生日蛋糕一大個 . 


再搭D 帶子 ~ 三文魚 & 壽司 .


仲有好多其他野架 , 不過蛋糕先至係主角 .


開始喇喂 .


第一件 , 當然係生日果位食先啦 , 唔客氣喇 .


話咁快就冇左一半 , 有買就襯手 . haha ...


年年生日願望都係咁上下 , 都唔駛多講 .

來來去去都係果D 身體健康 , 去旅行事事順利 , 世界和平之類 ...

倒不如講下旅遊進度啦 , 首先機票攪掂左啦 , 如果依家先至Book都有位 , 

不過價錢就要多幾個百份點 , 跟住就酒店 , 經過連日既努力 , 

8晚酒店都搵齊 , 之前有冇講過 , 難波 果邊D爆好難搵 , 唔係冇房就係好貴 , 

所以今程都唔住果頭 , 最尾果晚在 神戶 落腳 , 就在 大阪 隔離 , 

唔算好遠 , 果度選擇多好多 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後係Book車 , 上次咪話Book左不過唔講住既 , 

我都唔係D鍾意收收埋埋既人 , 不如就講埋啦 , 就係Book左部

Honda N-Box , 我諗係相中呢款掛 ? Book呢款車都唔諗住點樣飛車架啦 , 

四國 果度唔似得北海道咁大地方 , 需要用速度黎爭取時間 ,

而呢款車外型夠晒趣緻 , 有D似 Toyota Porte 或者 Spade .

我諗應該唔錯掛 ? 有冇人開過呢款車 , 俾D意見丫 .


攪掂呢幾大類 , 之後果D可以慢慢黎 , 景點方面仲搵緊 .

國際牌下個月先攪 , 日圓屋企仲有剩 , 入mp3落手指都好濕碎 ,

手板眼見功夫 , 最後係唔知天氣如何呢 ?

尋日新聞話北海道有大雪 , 隨時重演上年新千歲事件咁話喎 , 

真係得人驚 .

好 ~ 講住咁多先 , 蛋糕慢慢食 , 手慢就明年請早 . haha ...

Bye Bye !



2017/12/17

2018四國遊 (行程量度中)




Hello !


如是者又過左兩個禮拜 , 今日有D特別 ,

特別方面在於氣溫 , 係入冬以來最凍既一日 , 尋晚又夜左瞓 ,

今朝要早起身都不知幾辛苦 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

要早起身既理由 , 就係飲早茶 , 如果唔係約好左 , 真係鏟都唔願起身呀 .

又係一連串既蝦餃 ~ 燒賣 ~ 鳳爪及山竹牛肉 , 睇埋份報紙再傾陣偈之後各有各散 .

自己埋位啦 , 唔駛客氣 .  haha ...



散水後經過兩個道館 , 見到有 固拉多 , 順手打番兩場 ,

一場捉到一場俾佢走甩 , 感覺上比 鳳王 難捉 .  ^_^ !!

最後就返屋企繼續度行程 , 行程方面都失左小小預算 ,

之前咪話想繞住 四國 一周咁都黎行既 , 計過數 ~ 如果咁樣行 ,

我去既日數就剛剛好攪掂 , 之但係內陸果D就要下次咯 .

好似祖谷溪流 ~ 大小步危 ~ 金刀比羅宮等等 ...

唔緊要啦 , 今年唔去下年攪番掂啫 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

話時話 ~ 今日係12月17日 , 換句話講 , 仲有兩個月左右就出發 ,

依家攪掂既野 , 只得機票 ~ Book車 ~ 換日圓 , 其他既仍在進行中 .

下周聖誕節有幾日假期 , 可以慢慢度掂佢 ,

只要搵齊酒店既話 , 行程都仲有時間 .

好 ~ 講住咁多先 .

Bye Bye !

P.S. : 西布朗剛剛追番一球 , 依家79分鐘 , 曼聯贏2:1



2017/12/03

旅遊流程




Hello !


兩星期既時間又到 , 今次呢篇叫做 旅遊流程 .

並唔係講行程景點或者路線 , 主要係想講 , 由決定出發至到出門既流程 .

由十月頭開始落實出門之後 , 第一件事就係Check下個護照到期未 ,

呢樣野好多人都唔會咁注重 , 但係又好重要 , 否則臨出發先發現 , 

輕則要做快証 , 重則行程泡湯 , 咁就真係大件事咯 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

睇完護照OK , 仲有3幾年貨仔 , 之後就係搵機票 , 之前講過 , 

機票呢樣野 , 唔買又貴D , 如果度掂既話 , 早買早著 , 我就攪掂左喇 , 

貴就貴啦 , 過年嘛 ~ 係咁架啦 , 唔斬到你一頸血仲等幾時喎 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就係度路線 , 雖然今次諗住沿住海邊繞場一周 , 

不過仲有好多細節位未諗到 , 就正如早幾日在Blog友 Maggie & Kaykie

果度搵到兔島(大久野島) , 心思思想兜埋過去 , 一時又諗不如下次先 , 

今次集中D遊四國 , 一時一樣 , 遲早精神分裂 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再之後就係搵酒店旅館等等 ... 呢樣同度路線一樣啦 , 

花多眼亂 , 不過今年諗住以實際為主 , 房間唔需要太大 , 

更加唔需要房裡面有風呂果隻 , 慳得就慳嘛 , 留番D在食果方面好過啦 .

依家一間都未Book到 , 真係要著緊D至得 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住輪到Book車 , 呢樣就攪掂左 , 今年又玩神秘 , 

唔講係乜野車 , 等返到黎至開估 , 透露些小啦 , 係一部好正既車 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後果D濕碎野 , 慢慢攪都得 , 就好似申請國際牌 ~ 換日圓 .

日圓上次有洗剩 , 所以唔換都得 . 

最後係錄D歌落手指度 , 等駕駛途中有歌聽 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

流程大至上係咁啦 , 印齊晒所需A4紙之後 , 到時到候執野出發就OK .

玩得開心D啦 , Yeah !!

Bye Bye !



2017/11/20

2018四國遊 (行程大方向)




Hello !


光陰似箭 , 話咁快又兩個星期冇同大家見面 ...

咁又唔係限定兩個星期至出一篇既 , 有時間就盡量寫啦 , 不過呢排較為忙 .

未開始之前 , 先交待D野 , 留言位置方面 , 已經解封左 , 

如果有時間 , 歡迎留番個言 .  ^_^ !!

不過Pokemon go宣傳及 比特幣 就唔好黎咯 , 俾個面 ~ 就咁算喇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於今次想講既係 , 機票價位方面 , 可以話係高處未算高 ,

淨係去果程機 , 同我見到既最低位 , 貴左足足1000元 , 好彩叫做Book左咋 ,

否則又要再貴 , 再遲D會唔會更加貴呢 ? 真係要拭目以待 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就講正題 , 行程大方向 , 之前咪話今次將會去 四國 既 . 

諗住照番用 (北海道) 方式黎行 , 即係沿住海邊繞場一周 , 

東南西北四個岬都去勻 , 再搭D其他野 , 暫定係咁啦 .

四國果度有度好 , 就係可以一鋪過行晒一周 , 如果係北海道 , 

好小人會一次行程裡面繞場一周 , 起碼都會分兩至三次 , 甚至四次 .

依家先黎介紹一下 , 佢東南西北四個岬 , 叫做乜野名 .

最東端係 : 蒲生田岬 .    最南端係 : 足摺岬 .

最西端係 : 佐田岬 .         最北端係 : 竹居岬 .

就係咁樣喇 , 之後再在天書及其他Blog友度搵料 , 搭夠呢個行程 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後想講酒店方面 , 最尾果晚通常都會住 難波 , 跟住翌日搭鐵路出機場 .

不過想入住果間 , 晨咁早就Full左 , 其他果D唔係冇位就係超貴 .

依家諗緊住唔住 難波 呢 ? 仲未諗到呀 .

好 ~ 呢篇講住咁多先 , 有進一步消息再通知大家 .

Bye Bye !

P.S. : 在網上搵張最北端 竹居岬 既相黎頂住癮先 .  ^_^ !!




2017/11/05

千祈唔好過年出門(第N次)




Hello !


闊別了兩個星期 , 今日星期日 , 又黎寫番篇網誌 .

不過未開始之前 , 先講其他話題 , 就係請兩位仁兄高抬貴手 , 

唔好再在呢度留言 , 俾條生路黎行下 .  ^_^ !!

第一位係經常在留言區留低下載Pokemon Go既留言果位 ,

呢個遊戲我都玩緊 , 早排亦已經打爆左機(Level 40)

近月開始既神獸 ~ 聖獸亦都捉左唔小 , 好似今個月1號先開始既炎帝 , 

打左7場 , 捉左4隻 , 叫做OK啦 , 所以唔駛再留言叫我下載呢個遊戲喇 .  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另一位仁兄就係 比特幣 , 呢幾日不斷收到留言 , 話買比特幣可以投資 ,

每日都有十個八個留言 , 剷都剷到手軟 , 究竟你係手動留言 ,

定抑或係透過程式黎留言既呢 ? 如果係前者 , 希望你收手啦 .

記得好耐之前飲過一種叫做 潘高壽 咳水 , 盒上寫住 : 勸人莫冒潘高壽,

留些善果子孫收 , 比特幣 係一個騙局 , 相信冇乜人唔知掛 ?

本來你想呃錢我唔怪你 , 不過你用我個平台黎宣傳 , 咁就好有問題 .

所以呢排都會暫時將留言區收起 , 叫做避一避風頭 . =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

輪到講番正題 , 記得呢個話題都講過好幾次 , 就係 千祈唔好過年出門 .

記得10月中果陣 , 留意過機票價位 , 並且Mark低左 , 

大安旨意之下 , 冇即時Book位 , 尋日睇番同時段 , 貴左幾佰蚊 , 

本來已經好貴架啦 , 仲要再貴多D , 認真攞膽 , 如果在閒日 , 

來回關西機場咪頂多二仟蚊有找 , 一到過年就變身搶錢家族 , 

依家Book好來回機票 , 加埋接近六仟元 , 只係廉航機咋 , 

如果係大公司 , 更加係天價 , 之後仲要租車同酒店 , 

正式係荷包大出血 , 最後都係果句 , 如果可以閒日去 ,

記得閒日出發 , 千祈唔好過年出門呀 !!

Bye Bye !

P.S. : 行程同路線 , 暫時都未諗到 , 有機會先再講 .



2017/10/22

2018年度旅遊目的地




Hello !


話都冇咁快又過左兩個星期 . (次次都係呢款開場白)  XD

近排晚晚都係睇電視兼搵料 , 經過幾番考慮之後 , 

終於落實到目的地 , 就係包含住四個縣既 ~ 四國 !!

今朝又係去飲早茶 , 一輪蝦餃 ~ 燒賣 ~ 山竹牛肉 ~ 馬拉糕之後 , 

跟手過 荷里活廣場 三聯書店買本天書 .


講番呢個 四國 , 好多Blog友都去過 , 搵料方面可以話係不愁寂寞 .

上篇亦講過Youtube果度有好多旅遊片提供 , 介紹得相當專業 .

暫時搵到幾個必到景點 , 好似 : 大步危 ~ 祖谷 ~ 德島漩渦 ...

仲有好多架 , 不過家陣要睇足球 , 第日先慢慢講 .  ^_^ !!

Bye Bye !



2017/10/08

約法三章




Hello !


呢篇網誌係上篇既延續 , 話說尋日有個回應 , 

話期待我既新遊記 . 難得大家咁俾面 , 今朝一於再問下屋企人點睇 ?

跟住又去飲早茶 , (今次本來係 山竹牛肉 , 不過唔記得影相)  XD

席間經過幾番斡旋之下 , 終於得到佢地既首肯 , 

即係話黎緊既農曆年檔期 , 可以如常出發 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

不過要應承三個條件 , 先至可以成行 .

第一 : 唔可以去北海道 . 第二 : 唔可以去太長日數 . 第三 : 夜晚唔可以去太僻靜既地方 .

雖然話將在外 , 君命有所不從 , 之但係佢地都係出於一片關心 , 

所謂 : 養兒一佰歲 , 長憂九十九 , 呢樣可以理解既 .

所以我都會遵守呢個遊戲規則 , 第一樣唔去北海道 ,

其實北海道已經去到八八九九 , 即使唔去都問題不大 .

第二樣唔好去太長日數 , 諗住去八至九日之間咁啦 .

最後一樣 , 夜晚唔可以去太僻靜既地方 , 呢樣反而冇問題 , 

通常去到酒店或旅館 , 食完晚餐就係浸溫泉 , 甚小外出 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

飲完茶諗住行下書店 , 揀番本旅遊天書黎參考一下 , 

不過 ~ 真係花多眼亂 , 好似有 : 北陸 ~ 能登半島    山陰 ~ 山陽

四國 , 九州 ~ 福岡 ... 總唔能夠每樣買一本 , (一本都接近一舊水 , 幾貴下)

之前淨係諗去北海道既邊一忽 , 依家唔去北海道 , 

反而唔知去邊度好 , 上篇話想去 廣島 嚴島神社 , 只係初盤 .

跟住返屋企 , 電視話 杜如風 有 九州攻略 , 想睇埋先至決定 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住整個下午都在搵料 , 依家搵料 , 唔淨止在網誌 , 

Youtube 果度都有好多有心人放料 , 都係果句啦 , 花多眼亂 , 度度都想去 .

睇黎屋企人唔想我出門 , 係唔想見到我咁煩呀 . haha ...

好 ~ 呢篇講住咁多先 , 有進一步消息再通知大家 .

Bye Bye !



2017/09/29

今日唔知聽日事




Hello !


話都冇咁快又過左兩個多星期 , 都係時候寫番網網誌 , 

Keep住個曝光率 .  ^_^ !!

依家係九月尾 , 就到十月頭 , 正常既情況下 , 應該係搵緊料 , 

準備明年既日本之旅 , 不過今年添左D變數 , 攪到搵料都搵到戰戰競競 .

所有野就要數到上周日同屋企人飲早茶果陣講起 ...

乜都唔駛講住 , 整件燒賣先 , 襯熱呀 . haha ...


講番正題 , 在飲茶期間 , 家人們游說 , 希望我黎緊呢年唔好出門 .

佢地話日本唔係咁安全 , 可能係近排 北韓 連續試射導彈 , 跨越北海道 .

我話 : 去旅行頂多咪十日八日 , 又唔係移民 , 唔怕掛 ?

話雖如此 , 不過老人家既野 , 自有佢一套睇法 , 所以一時之間 , 

我都冇乜野講 , 只係拖延住先 , 話睇下點啦 ,  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果係其他人 , 我可能會答 : 扯 ~ 該死唔駛病啦 , 有冇咁邪呀 , 

如果去到果度咁啱食正個導彈 , 咁就死都死得抵啦 .

之但係由屋企人問到 , 答都唔可以企到咁硬 , 因為冇野比屋企人更重要 .

依家唯有照搵住料先 , 希望盡力斡旋 , 我都好想去日本鬆一鬆嘛 .

如果真係去既話 , 今次想去 廣島 果頭 , 即係  宮島 嚴島神社 .

萬一真係去唔成 , 都唔好怪我 , 因為冇人會比我更難過 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講開 該死唔駛病 呢個話題 , 上周五 長沙灣巴士意外 呢單野 , 

的確係好慘 , 果度在我做野既附近 , 以下果幾張相係事發後翌日所影 ,

雖然已經清理好 , 不過依然見到意外既痕跡 , 認真唔講得笑 .

對面就係事發現場 .


一轉燈即刻人來人往 , 影相果陣都未到高峰期 , 仲可以再多人D .


見到冷氣機都撞到變形 . (依家已經搭晒棚維修)


見唔見到地下有D野 ?


仲有D玻璃碎未掃走 .


事發果刻係晚上6:30左右 , 果陣應該係搭緊地鐵 , 離開現場頗遠 , 

之但係果個燈位 , 我都經常會經過 , 正所謂 : 生死有命 , 富貴由天 , 完全唔到你揀 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外 基隆街 13車連環撞果單 , 果度我亦有去開 , 見到新聞片熟口熟面 , 

認真唔老黎 , 有時間既話 , 都會去現場 , 影番幾張事發現場相片 .

好啦 ~ 今晚講住咁多先 .  

Bye Bye !



2017/09/11

好耐冇見




Hello !


睇番上篇網誌日期 , 係8月23日 , 

足足兩個多星期冇寫過野 , 再唔寫番篇 , 恐怕D讀者都冇晒 .

(不過依家都走得八八九九咯)  XD  

咁寫D乜野呢 ? 就寫近況啦 , 由9月頭開始至到月尾 , 

Pokemon Go 都有 水君 捉 , 我都捉左唔小架 .  ^^

最高CP果隻都係 1591 , 從未見過 1600以上果D .


跟住輪到下一單 , 早排電腦節 , 襯熱鬧之下 , 

買左個27寸 Mon , 價錢係 $1550.00


拆開個盒之後就係咁樣 , 未開機添 .  XD


講開又講 , 依家D Mon既價錢 , 同以前真係差天共地 , 

曾幾何時 , 15寸都要賣成2仟尾 , 17寸更加係雙倍咁滯 , 

之後經過十多年 , 先至降到依家既價位 .  ^^

好啦 ~ 近況就講住咁多先 , 旅遊方面又有消息 , 

呢方面遲D先至講 . 

Bye Bye !



2017/08/23

天鴿襲港




Hello !


隨住尋日既熱爆全城之後 , 今日黎到既就係十號風球 .

曾幾何時 ~ 我都經歷過希望掛8號風球而放假 , 正式係年少無知 . 

就以今朝黎講 , D風大到呢 , 在房裡聽到風陣陣烈風紛紛吹 ,

真係心都寒埋 , 跟住落樓下買早餐 , 直接感受勁風 , 

雖然沿途有瓦遮頭 , 不過橫風橫雨 , 要睇住D風黎行 , 

等佢間歇停風先快步行 , 總好個同D風硬拼 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

返到屋企之後 , 百無了賴 , 都係睇新聞及風暴消息渡日 .

見到杏花邨同鯉魚門果頭 , D海水正式係大海無量 , 

感覺上同311海嘯差不多 (實際上當然差得遠啦)

一個大浪就將D海水打上黎 , 記者要札住馬黎報導 , 真係辛苦晒 .

辛苦晒既仲有消防員 , 澗住水黎救被困既鯉魚門居民 , 勁呀 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

唔好以為在家裡就絕對安全 , 土瓜灣有單吊船撞窗 , 

又係攞你命 , 隻吊船撞到D窗爆晒 , 維修費亦係無法估計 , 

不過最緊要都係人冇事 , 錢可以再搵過 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

風暴感嘆就講到呢度 , 第日再講其他話題 .

Bye Bye !



2017/08/13

Pokemon Go Level 40




Hello !


唔覺唔覺 , 寫完個旅遊網誌都成個多星期 ,

呢段時間去左邊 ? 之唔係幫個 Pokemon Go 埋尾 , 打到上頂級 Level 40 .

幾經艱辛之下 , 終於都完成晒整個歷程 , 到達 Level 40 .

XP 果欄已經冇左 , 即係再打都唔會有分計 .


左下角果度都係咁 , 條紅線到達盡頭 .


話時話 , 近排要賺取XP , 都唔係咁難 , 出左神獸之後 ,

打贏一場團體戰 , 都有10000XP , 所以先至咁快升呢 .

還記得 利基亞 & 急凍鳥 , 係8號風球果日推出 , 當日即刻出去打團體戰 ,

急凍鳥只係推出一周就Bye Bye  , 利基亞 到今日都仲有得捉 .

呢隻比較難捉 , 只係捉到6隻 . 最高果隻 CP2025 .


急凍鳥捉左5隻 , 最高CP係1676 , 唯有自己慢慢升佢 .


火鳥比較多D , 捉左7隻 , 最高CP係1851 .


今日都仲有得捉既 雷鳥 , 有8隻進賬 , 最高係 CP1902 .


其他既 班吉拉 , 寫 FULL 果D就係升到盡頭 .


雖然已經到達 Level 40 , 不過並唔代表會放棄呢個Game , 

相反 ~ 仲要捉多D野黎賺取 星塵 要黎升呢 , 所以仲有掛忙架 . XD

至於旅遊方面 , 暫時都未諗到去邊度 , 仲有大把時間 , 慢慢都未遲 .

(唔記得之前有冇講過 , 只得農曆年檔期可以出門)

有進一步消息再通知大家 .

Bye Bye !



2017/08/03

2017北海道及和歌山11天自駕遊D11-1 回港結局篇(全篇完)




Hello !


上回講到食完 拉麵同埋八爪魚波 , 跟住返酒店 ...

之後除左睇電視外 , 仲要收拾好所有行李 , 聽朝晨咁早就出機場 ,

連酒店早餐都食唔切 , 至於今日雖然係第11日 , 不過完全冇景點可言 , 

所以都唔再拖拖拉拉 , 一篇過寫晒整個第11天 .

好 ~ 攪掂就開始 , 大清早起身Check out , 落到樓下 , 天都未光 .


向住 南海難波駅 方向行 , 經過地下鐵入口 .


繼續向前行 , 好快就見到 南海難波駅 .


上埋條樓梯就到售票處 .


拎住個大篋 , 梗係搭自動電梯啦 .  ^^


前面買車飛 .


難波 往 關西空港 , 920 Yen .


入閘 .


當時時間係 05:17


05:28 有班急行 往 機場 .


仲有小小時間 , 過黎呢邊9號月台懷念一番 .

懷疑乜野 ? 新讀者未必知 , 就係當日在呢度遺失相機 .

有興趣睇番既話 , 可以Click入呢度 .


綠色補票機 , 就係案發地點 .


攪掂 ~ 過番去5號月台 .


部車亦都恭候多時 , 立即上車 .


晨早流流 , 大把位任坐 .


約莫40分鐘 , 到達 關西空港 .


向住 T2 方向行 .


搵番無料接駁巴士站 .


都係冇乜人搭 , 點坐都得 .


到站 ~ 天色藍藍地 , 天光喇 .


裡面就係國際線 , 之前有冇講過 , 搬左地方 .


Wow ~ 多人到呢 , 首先排隊在部機登記 , 之後再排櫃檯交低行李 .


經過一連串排隊之後 , 在前面入閘 .


再一輪離境及行李檢查手續之後 , 黎到候機地方 .


DUTY FREE .


FOOD , 就在呢度食早餐啦 .


經過擴建後 , 地方大左好多 .


不過賣野地方小左 .


2017年1月28日 擴張 . 果陣係2月頭 , 開張冇幾耐 .


08:01 準備埋位 .


Gate 85 , 右邊丫 , 唔該 .


排隊中 ...


行出停機坪上機 , 正呀 .


上機通道有D水族館Feel .  ^^


桃紅配白色機身 , 更勝 捷星 一籌 .


上機擺好件手提行李 , 開機後由於冇野食 , 瞓番尋晚果Part .


一別數小時 , 落機後辦妥入境手續 , 黎到呢度等行李 .


雖然延誤左一陣 , 不過都好快領回行李 .


往機鐵途中 .


仲未有車黎架 , 果陣正式係歸心似箭 . haha ...


下一站 青衣 ...


好 ~ 送君千里 , 終須一別 , 行程就寫到呢度 , 多謝收睇 .

Bye Bye !

全篇完 !