2016/02/29

3日兩夜大阪行 領回G10篇B




Hello !


上回講到到達關西空港 , 在裡面磨爛蓆 ...

好唔容易磨到06:00 , 同上次一樣 , Jetstar 開始有人做野 ,

不過案內所就未有人 , 唯有食個早餐再多等一陣啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

終於等到07:00 , 案內所有人喇 , 第一時間衝入去問 .

佢查左一陣話 : 冇喎 ? 等我同你向警察局問下 , 如是者又打左個電話 ,

不過都係話冇喎 , 佢話 : 如果唔介意 , 可以在呢度等消息 .

我話約好左今日黎攞過喎 , 連Code no.都有 , 於是佢再打多個電話 , 

之後話 : 唔係在呢度領取 , 而係在南海鐵路果邊 , 

係喎 ~ 果陣在電話同佢講 , 依稀聽到南海呢兩個字 , 

只係當時認定左係機場 , 所以先搵機場案內問餐飽 .  XD

佢好好人呀 , 仲指引埋我點樣去南海鐵路果邊 , 

真係要講聲唔好意思兼唔該晒 , 只怪自己唔醒目 , 

不過過程唔重要 , 結果先至係重點 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住過去南海鐵路果邊 , 就在 T1 & T2 之間連接點果頭 , 

去到問一問個職員 , 佢即刻就知道乜野一回事 , 引領我入去佢既駅務室 .

就係由呢度入去 .


駅務室 , 特別警戒實施中 ...

好似好勁咁 , 唔知唔知既人仲以為乜野事 ?


入到佢 , 佢俾張Form我填 , 大致上係姓名 ~ 地址 ~ 電話 , 

最後係簽署 , 攪掂之後佢拎部相機出黎 , 好 ~ 果然係我既G10 , 

仲要電池 ~ 記憶咭 ~ 操作性能完全OK , 實在太好喇 .

(果陣應該係由個篋跌落地下 , 個套又唔係好硬淨 , 幾驚會崩咁一忽)

完成整個移交程序之後 , 第一時間過番機場果邊 , 

用佢個wifi黎寫番篇網誌報平安 , 即係呢一篇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

果陣只不過係07:30 , 仲有一日時間作市內觀光 , 

本來想去 海遊館 ~ 摩天輪等地方 , 不過臨急臨忙冇準備路線圖 ,

雖然可以即刻問旅遊案內 , 之但係諗過 , 果日係星期六 , 

果D地方可能會勁多人 , 不如轉一轉場 , 去番D熟路既地方 , 

就係出難波 , 先去黑門市場幫襯佢既壽司早餐 , 

食完再去行 BIC Camera ビックカメラなんば店 , 果度有成七層樓 , 

逐層睇都有排睇 . 最後就仲精彩 , 就係去果個世界之大溫泉 .

http://www.spaworld.co.jp/ 上次去果陣趕頭趕命 , 

今次由13:00 玩到 19:00 , 足足6粒鐘 , 真係浸到甩皮都仲得呀 , haha ...

但係又唔覺得好耐喎 , 正式係快活不知時日過 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就返回酒店 , 翌日晨咁早出機場 , 返到黎香港只不過係中午時份 .

就係咁 ~ 結束整個G10移交之旅 , 雖然辛苦 , 不過都幾好玩 .

Bye Bye !

後記 : 今次能夠領回G10 , Blog友 Johnson young 既功勞最大 , 

我可以好肯定咁講句 , 如果冇佢咁積極咁指引 , 

單憑我係絕對冇辦法可以搵呢D資料 , 因為我個心已經死左 .

今次之旅除左領回G10之外 , 仲係見証人間有情 .

如果在香港等地遺失相機 , 肯定唔知去左邊 , 正式係屍沉大海 . 

而今次能夠寫埋第6日半打後既網誌 , 

真係要再一次多謝 Johnson young , 多謝晒 !!



2016/02/28

3日兩夜大阪行 領回G10篇A




Hello !


自從由上次 (19號) 返到黎香港 , 心情可謂反反覆覆 , 

思潮起伏 , 忐忑不安 , 總之就係行唔安 , 坐唔落 , 直到呢一刻 , 

終於將所有煩擾一掃而空 , 可以安安樂樂咁訓一鑊 .

一切就要由2月21日(即係上個禮拜日)講起 ...

話說當日下午1時左右起床 , 打開電腦睇回應 , 

見到各位Blog友留言安慰遺失相機一事 , 

當中Blog友Johnson young最為熱心 , 幫我向案內所查詢 , 

好坦白講 , 當時個心已經死左 , 總覺得能夠尋回一事 , 比大海撈針更難 , 

不過人家提供晒一切資料 , 如果連打個電話都懶既話 , 

未免太過拒人於千里之外 , 於是諗住姑且都黎個一試 .

之但係問題又黎喇 , 實不相瞞 , 我D英文唔係掂得咁掂之餘 , 

日文更加不值一曬 , 謬然要打電話俾個外國人溝通 , 真係有D難度 , 

幸好勉強都叫做能夠溝通得到 , 講低佢所需要既資料之後 , 

佢查左一陣 , 話有呀 ~ 有人在車站附近發現相機一部 , 

同我提供既資料完全吻合 , 我當時心諗 : 唔係下話 ? 真係咁都得 ?

跟住又有問題出現 , 佢話唔會代客寄回失物 , 即使淨係記憶咭都唔得 , 

只能夠親自黎領取 , 果陣啱啱先至返黎香港 , 又要再去 ?

正式係機票錢都可能貴過部相機 , 於是同佢講 : 等我諗諗先 , 

或者遲小小再俾電話你 ? 唔知乜野時間方便呢 ?

佢話下個星期二 (2月23日) 辦工時間OK , 

好 ~ 下星期二再聯絡過丫 , Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

鑑於部相機仲未到手 , 唔敢爆晒響口咁話有 , 免得空喜歡一場 , 

所以未對外公佈住 , 就算有Blog友問起 , 都只能夠話 : 

暫時聯絡上 , 調查中 ! 呢樣請大家見諒 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實果陣話就話要考慮 , 心目中已經有一個答案 .

引用Mark哥既格言 : 唔係我既野我唔會要 , 係我既野就一定要攞番 .

反正錢啊姐大把 , 俾錢攪得掂既問題就唔係問題 .

(最尾果兩句只係講笑 , 千祈唔好當係真 . haha ... )

於是乎當晚上網訂機票 , 出發幫襯Jetstar , 回程幫襯Peach .

兩程加埋大約 $2100.00 , 值唔值得就見仁見智 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

終於等到星期二再同佢聯絡 , 晨咁早就打電話俾佢 , 

不過冇人聽 , 只係得電話錄音 , 大致上話依家好忙 , 一陣再打過黎啦 .

於是隔個零鐘再打多一次 , 今次終於搵到佢本人 , 

我話我呢個星期六 (2月27日) 會親臨大阪領取相機 , 

約實領取地點為關西空港 , 佢再講出一組密碼 , 話要講得出先至得 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如是者等到星期五晚收工出機場 , 再一次經T2辦理登機手續 .

飛機在晚上九時起飛 , 去到大阪約莫深夜一時多DD . (當地時間)

今次既入境手續冇上次咁多人 , 只需十零分鐘就攪掂  ,

同埋冇寄艙行李領取 , 關員只係打開背囊望兩望 , 

再問幾個簡單問題就放人 , 過到出閘口 , 機場詢問處居然仲有人 , 

就搵佢黎問一問 , 佢話要問總部至知 , 叫我聽朝去2/F LAWSON

隔離果間案內問下啦 , 果陣係凌晨兩點多D , 

要磨到佢開工 , 起碼要6個小時 , 同上次一樣 , 靚位果D一早被使用中 , 

幸好今次早有準備 , 帶定兩張鋪檯白色薄膠鋪在地上 , 

再在地上訓覺 , 話就咁話 , 不過有乜風吹草動立即醒覺 , 

所以同捱通宵分別不大  , 一直磨到佢開工 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Wow ~ 打左咁大篇架喇 , 仲未講完喎 , 要睇足球添 .

唯有寫住咁多先 , 聽晚先寫埋個下集 .

俾住部相機大家睇住先 , G10 ~ 就係佢喇 .


Bye Bye !



2016北海道雪駕遊 再一次回港報平安篇




Hello !


經過大阪30小時旅程 , 終於在下午回到香港 , 

順利地將G10帶回家 , 依家先抖番陣 , 等今晚再黎過詳細匯報 .

老老實實 , 咁樣既風塵樸樸式日本遊 .

(星期五晚20:45機 ~~~ 星期日早上0825回港)

除左中間自由活動時間 , 都咪話唔辛苦 , 不過都值得既 , 

唔係人人都有第二次機會 .  ^_^ !!

好喇 ~ 依家食個飯 , 沖個涼 , 睇番尋晚車仔場錄影 .

今晚見 , 約定你架喇 . 

Bye Bye !





2016/02/27

2016北海道雪駕遊 再一次報平安篇




Hello !


Wow ! 唔講你唔知 ,

依家我身在大阪關西空港 ,

今次黎既目的係領回我的 G10 .

原來呢個世界真係有奇蹟架 .

之前未成事所以唔透露住,

免得大家包括自己空歡喜一場 .

依家相機在手, 好興奮呀 ! Yeah ...

明日返港 , 今日要玩盡佢 .

返黎先至詳細滙報今次G10緣未了事件 .

Bye Bye !


2016/02/25

2016北海道雪駕遊D1-5 千歳市防災学習交流センター篇A




Hello !


上回講到在 Rera outlet 裡面睇野 , 睇到午餐時間 ...

上篇俾小頭兄估中我食拉麵 , 冇錯 ~ 就係去西餐部隔離既千歲拉麵博覽會 , 

所謂千歲拉麵博覽會 , 即係集好多間拉麵店於一身 , 

然後由客人選擇自己喜愛既拉麵店 . (類似札幌既拉麵共和國咁啦)

入去睇下咯 .  ^_^ !!


北之麵物語 .


拉麵櫻島 .


蝦千 .


其實間間都差唔多 , 點會睇得出邊間好味D ? 都係是但一間 , 

睇下邊間投緣就入去幫襯 , 唔 ... 就呢間啦 .


有辦你睇 , 就叫有蛋果味啦 .


如果唔係要開車 , 一定啤啤佢 .   =_= !!


話咁快就到 , 相機食先 . haha ...


食完埋單再行多陣 , 裡面係乜野呢 ?


原來係兒童樂園 .


休息地帶 .


仲有洗手間 , 去埋都差唔多咯 , 要去下一站 .

結果在Outlet乜野都冇買 , 有D入寶山 , 空手回Feel .  XD


地下只係濕而冇雪 , 啱晒 ~ 

因為我正在熟習部車當中 , 起碼唔駛兼顧埋雪地 .


慢慢上番手 , 在燈位得閒可以影相添 .


又一個燈位 .


下一個景點唔駛好耐車程就到 , 就在附近 .



呢個交流中心 , 係教你應付各式各樣既災難 , 

在日本 ~ 最起碼都要識得點應對地震 , 大吉利是遇到都唔會騰晒雞 .

迷你消防車 , 幾過癮喎 .  ^^


首先展示既係舊式消防產品 .


古董消防衣 .


呢件唔通係江戶時代 ? haha ...


呢邊果D可以試穿 , 不過咪攪 .


搭電梯上3字 .


牆身寫滿救災戰績 , 1739年 樽前山大噴火 . 


1959年 台風15號 (伊勢灣台風) , 比較近代D .


1993年 釧路沖地震 .


2011年既3.11東日本大震災 , 依家都仲歷歷在目 .


消防車規格介紹 .


仲有其他車 , 包括白車 , 化學消防車 ...


消防 Q&A , 問都唔知佢問乜 , 又點會識答呢 ?  XD


睇住上集先 , 仲有下集架 , 聽晚見 .

Bye Bye !



2016/02/24

2016北海道雪駕遊D1-4 Rera outlet 篇




Hello !


上回講到到達 新千歲機場 , 好快就拎埋件行李 ...

向住租車公司方向行 , 中途見到其他店舖 , 包括有 :

MOS BURGER .


LAWSON便利店 .


連吉野家都有 ? 夠晒大眾化 .  ^^


影完相繼續向前行 , 直至黎到呢度 , 見到一排過租車公司 .


Toyota 都有兩間 , 不過今次唔係幫襯佢 .


而係隔離既日產 NISSAN .


呢間機場店只係做個簡單登記 , 並唔係正式 , 

所以只係拎預約A4紙 , 同埋國際牌俾佢係咁咦望一望就得 .

(聽講有D租車公司要求埋香港車牌 , 如果要既話我都有帶出黎)

睇完之後俾左份北海道行車地圖同埋個12號牌仔我 , 

叫我過對面坐一陣 , 佢幫我Call接送車黎 .


OTS 冬季好似唔做外國人生意 , 之前網誌都有講過 , 

公司策略係咁都冇辦法 , 所謂食小多覺訓 , 就係咁解 .  =_= !!


幾分鐘後 , 接送車就到 , 成部大巴車到黎 , 咁勁 !

(臨急臨忙 , 對唔到焦 , 攪到鬆郁矇)  XD


不過只係得我一個乘客 , 似乎有D浪費 . 

另外果張號碼咭 , 並唔係乘車券 , 上車唔駛俾司機 .


而係要黎咁樣用 : 如果好多人同時到達 , 

呢個就係掛號牌仔 , 叫你個號碼果陣先至輪到你 .


幾分鐘車程就到 , (好似近過 Toyota 果次)

得我一個人 , 到達後自然招呼我先啦 , 今次就要拎齊所需文件 .

包括 : 護照 ~ 國際牌 ~ 信用咭之類 , (香港車牌唔需要)

經過一講解 , 即係果D唔好超速 ~ 唔好亂泊車 ~ 唔好醉駕 , 與及保險細則 , 

電油叫做 Regular , 入滿先至好還車 , 由於我唔係在機場還車 , 

所以仲要講埋還車地點及電話 , 跟手簽埋咭就可以出去驗車 .

同佢一齊行個圈 , 有乜野花痕都指晒出黎等佢記低 , 

(有D太過濕碎佢話唔駛咯喎 , 我個人認為 , 除非刮到好明顯既花痕

或者炒到部車都開唔到 , 否則小小地既傷痕佢都唔會太介意)

最後等佢講解點樣用個GPS就可以正式出發 , 雖然GPS萬變不離其宗 , 

不過由佢示範使用一次 , 點都定檔好多 , 仲有就係收音機 , 

幾乎次次出車部收音機都係開住 , 我會叫佢幫我熄左佢 .  ^^

今次租左乜野車呢 ? 早前已經開左估 , 就係 ELGRAND .

不過其他車款都唔錯架 , 就好似呢部 : NOTE .


同埋呢部 . (唔知叫做乜野名 ? )

經 t先生解答 , 原來佢叫做 : X-TRAIL .


CUBE , 呢部經常出現在沖繩 .


七人車SERENA都係一個唔錯既選擇 .


ELGRAND 到 , 不過唔係呢部 , 我租果部係黑色 .

部車遲D再黎個詳細分析 , 依家攪掂個行程先 , 免得越攪越晏 .


出車果陣非常之唔習慣 , 話晒都放低左一年有多 , 

雖然係自動波車 , 不過軑位 ~ 油門&煞掣 , 全部都在水準之下 , 

好彩唔需要太耐就熟習番晒 .  ^_< !!

第一個景點就係 Rera , 因為夠晒近 , 就在租車公司隔離咁滯 .


呢度睇Blog友網誌就見得多 , 自己就未黎過 .  XD


都幾多野賣架 , 如果有心行 , 預佢一日左右啦 . haha ...


好多國際品牌呢度都有 .


案內地圖 .


發車時刻表 .


繼續參觀 .


休息區 , 大紅燈籠高高掛 , 充滿中式氣氛 .


LAOX 免稅店 .


波鞋比香港平DD , 其實我都冇乜野買 , 至在參觀 .


當時係中午12時左右 , 早上6時淨係食左件三文治 , 

當然唔夠啦 , 係時候搵食 .


呢邊有水牌 .


中西式任揀 .


FOOD FOREST , 係佢喇 .


食左D乜野呢 ? 下篇話你知 .

Bye Bye !