2016北海道雪駕遊 序章篇

Hello !

為期11日既 2016北海道雪駕遊 經已圓滿結局 , 

今次之旅首要任務就係人車無恙 , 呢樣可以達標 .

其餘勁玩 ~ 勁食 ~ 勁買 , 前兩樣亦都做得到 , 最尾既勁買就唔多成功 , 

因為我基本上都無缺 , 淨係前兩樣已經夠皮 .   ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

睇番上幾次旅遊都有D甩轆野 , 今次都唔例外 , 仲係超級甩轆果隻添 .

就係在行程最尾回港果日 , 在 南海難波站 附近 , 唔見左部相機 ,

果陣正在前往機場 , 一個大篋加一兩包野 , 在路邊將部相機放在篋上 , 

轉燈後未有拎番部相就拖篋行 , 到發現時再趕回現場 , 

相機已經不知所終 , 果度人來人往 , 正式係渣都冇得剩 .

唉 ~ 只怪自己唔醒目 , 大意失荊州就係咁解 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

在列車上不停自責 , 心諗 : 有冇攪錯呀 ? 點會連相機都可以唔見架 ?

就算唔見左本護照都可以補領 , 最多留多一兩日唶 .

唔見相機就最杰撻撻架喇 , 呢一種都稱得上 : 旅遊最痛算這種 .   >_< !!

部G10由2009年第一次北海道自由行果陣買到依家 , 

經歷過數次行程 , 可以話係陪我出生入死 , 跌都跌過兩次 , 

性能仲好OK , 今後佢唔知會去左邊度 , 不過希望執到佢果位仁兄 , 

可以繼續咁善用佢黎影靚相 , 咁就於願足矣 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外相機裡面有張記憶咭在內 , 呢樣又係另一種痛心 , 

經檢算後 , 第一張記憶咭Keep住頭6日半既行程 , 在相機裡第二張咭 ,

打後果4日半既心血就付諸流水 , 唯有用番老本行 , 

用文字黎表達啦 , 慶幸既係尾果兩日在大阪 , 冇乜野景點 , 

都係果D 道頓堀 ~ 黑門市場 ~ 通天閣 ~ 天王寺動物園 , 

其餘時間都係留在兩個天然溫泉 , 裡面冇得影相 , 至於遺失 北海道 既包括有 :

摩周湖 ~ 然別湖風水旅館 ~ 跟住係富良野 ~ 美瑛等雪景 , 

仲有往旭岳纜車上山 ~ 旭岳萬世閣旅館 ~ 翌日去旭山動物園 ~

旭川拉麵村 ~ 與及回札幌還車 , 相比之下 , 前果部份精彩好多 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果問依家心情 , 事發果陣的確好難受 , 隔左一日平復番唔小 , 

係難過架喇 , 不過唔好難過太耐 , 畢竟呢一年更差既都捱過 , 

就當同部 G10 緣份已盡啦 , 之但係點都要同各位支持者講聲 :

唔好意思 , 令到大家失望而回 !!

正式網誌聽日開始 , 雖然得6日半行程 , 不過都唔好錯過呀 .

Bye Bye !

P.S. : 仲有既係CarCam影片冇失到 , 全部齊晒 , 

呢段係由旭川往札幌既高速公路行程 , 視野欠佳 .