2013/12/30

冬天出門唔多盞(延續篇)




Hello !


呢篇係早幾篇 "冬天出門唔多盞" 既延續篇 .

內容係話 "日本" 既暴雪 , 有增冇減 .


報導話新年假期前幾日 , "日本" 北部受到強烈冷空氣影響 , 

持續強風暴雪 , 多個機場航班唔係停飛就係延誤 , 截至昨日 , 

"北海道" 札幌市錄得積雪達130厘米 , 落小小既 "青森縣" 溫泉區 ,

積雪更高達180厘米 , 日本天文台方面表示 , 暴風雪會持續到元旦日 .

正如上篇所講 , 冬天出門實在太多野難以預計 , 

遇著航班延誤已經夠慘 , 大吉利是若然去到先遇到暴風雪被困 , 

糧水及衣物不足既話 , 隨時瀨大鑊都有份 , 所以真係要考慮清楚先 .

聖誕及除夕都係旅遊旺季 , 如果暴風雪持續 , 都咪話唔掃興 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 

好喇 ~ 天氣報告就講住咁多 , 講開日本料 , 黎多一單 .

早幾日 "日本" 首相 "安倍晉三" 不理全民反對參拜

供奉有二次大戰甲級戰犯既 "靖國神社" .

今日報紙話有人想發起 "罷買日貨" , 我個人認為唔駛喇掛 ,

所謂禍不及家人 , 正如當年 "菲律賓" 總統衰格唶 , 冇理由搵菲傭黎出氣 .

所以我照食 "菲律賓" 出產既生果 , 頂多就唔去 "菲律賓" 旅遊 .

(其實係冇乜興趣去果度)  XD

講開罷買日貨 , 依家就比較容易 , 以前D人既家電 , 

十居其九都係日貨 , 家陣有 Samsung 同埋 LG , 形勢黎個大逆轉 ,

隨便在街搵人抽樣調查 , 睇下佢用邊個牌子既手機 ,

相信 Samsung 會多過 Sony 好多個百份點 .

至於罷去 "日本" , 更加係冇可能 , 正如D麻甩佬 , 

相信佢地都唔肯罷睇日本 AV 而轉睇鬼婆 AV 掛 . haha ...

Bye Bye !

2013/12/27

Yahoo Blog一路好走(悼念篇)




Hello !


尋日12月26日發生左兩件事 , 

第一件係生日 , 生日會經已結束 . 第二件係 Yahoo Blog 正式關門大吉 .

生日會上篇開完 , 呢篇主要講 Yahoo Blog 關門事件 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由8月尾佢宣佈結束後 , 至今已經四個月 ,

期間經歷過封Blog , 攪到旅遊網誌要開另一個戶口 . 

完成晒整個旅遊網誌後 , 即使佢變成唯讀 , 我都會上去瀏覽 , 

依家佢正式關門大吉 , 心情上若有所失 .畢竟第一次寫網誌 , 就係由 YB 開始 . 

最後果日我上番自己兩個網誌度記錄番D資料 . 

A區 (即係首個網誌) , 有 915657 個瀏覽次數 .

B區 (即係新開網誌) , 有 131239 個瀏覽次數 .

扣除番自己瀏覽次數 , 都有成接近 100萬次點擊 , 

對於我黎講 , 都算唔簡單咯 , 嚮度多謝曾經上過黎參觀既讀者 , 多謝晒 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

話說呢個網誌既由來 , 係當年年少氣盛既我 , 

在報章裡見到乜野唔順眼 , 都拎黎講一餐 , 尤其係自殺攪攪震果D , 

更加係剷到佢上天花板 , 之後乜野都講下 , 好似 : 足球 , 

私人恩怨之類 , 最後見人地寫旅遊網誌寫得咁過癮 , 

自己都加入戰圈 , 結果一寫就寫到依家 .

呢6年裡面都同 YB 經歷過好多篇網誌 , 依家佢正式結束 , 

就拎番部份曾經上載過既相片黎懷緬一番 . (相片排名不分先後)

首先第一張 , 風球過後黎過直擊報導 .


呢隻碟在遊日期間購買 , 明明唔識日文都買隻日文版 , 

都幾無謂 .  XD


最初版本既資料統計 , 累積瀏覽 133073 , 勁 ! 


有8個人同時在線 , 多謝支持 !


CHOYA 梅酒 , 好正架 .


地圖URL 係搵 Mapcode 既方法 .


曾幾何時 , 有好多垃圾留言 , 黑名單多達 302 人 .


棕熊大鬧 "斜里" , 之後去實地考察一番 .  ^^


鴨記電煲 , 一套一舊水 . Yeah !


班門弄斧學人講足球 , 紅魔下盤穩 .  ^_^ !!


新聞時事亦佔左好多篇網誌 .


過年湯丸 , 私人恩怨篇經常出現 . 


仲有好多張相可以懷緬 , 不過篇幅所限 , 不能盡錄 .

懷緬住咁多先啦 .  

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 

P.S. : 至於當日 Yahoo 提供既另一個網誌 : with GOtrip .

經過詳細考慮 , 決定唔參加咯 , 理由只有一個 .

就係 : 棄我去者 , 昨日之人 , 不可留 !

2013/12/26

生日快樂2013




Hello !


今日係12月26日 Boxing Day , 

亦係我既生日正日 , 而今次亦係搬遷黎 Google Blogger

第一次生日 , 所以嚮度攪番個簡單而隆重既生日會 .

首先黎蛋糕一個 . Yeah !


再黎蛋糕幾件 .


唔夠喉既話 , 再黎多幾件 . 


生日願望當然都係果幾味 , 不外乎係身體健康 , 

發個新年財 , 去多幾趟 "日本" 咁啦 , 

其實最重要都係開開心心 , 事事如意就OK .

好 ~ 可以開餐 , 小小意思 , 唔成敬意 , 食大佢啦 .

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~

P.S. : 頭先上 Yahoo Blog 果度睇下點 , 

上到去已經關門大吉 , 唯有祝佢一路好走啦 .  ^_^ !!

2013/12/23

冬天出門唔多盞




Hello !


剛剛心血來潮 , 不如寫番篇網誌 .

頭先上Blog友 "小肥兄" 網誌度參觀 , 佢有一篇叫做 "問你怕未" ?

內容係講 "北海道" 新千歲機場 , 因大雪有多班航機欠航 .

雖然依家既日元跌左唔小 , (早日 "頭條日報" 都有報導)

不過冬天出門真係要考慮清楚 , 皆因D雪大到得人驚 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果去旅遊時遇著大雪 , 來回程又航班欠航 , 

相信呢個假期都幾 "刻骨銘心" , 唔講唔知 , 其實我都有一刻諗過 , 

不如二月尾黎番個 "北海道" 雪地之旅 , 不過好快就打消 .

因為好耐之前都列出過幾味冬天出門既弊處 , 依家不妨再講多次 .

首先係日短夜長 , 每日俾佢扣兩粒鐘 , 十日既話 , 足足扣咁一日行程 .

之後係安全問題 , 如果技術好既話 , 應該都冇乜難度 , 

係就係驚遇到盲頭烏蠅唶 , 至於我 ~ 暫時都未走出陰霾 .

另外係封路問題 , 好多地方都會因為大雪封路 , 

我都有好幾個景點望門輕嘆 .  >_< !!

好喇 ~ 唔好處就講到呢度 , 咁當然雪地出門都有佢既好處啦 , 

如果唔係都唔會有咁多人出門 , 落雪浸溫泉 , 點都正宗過

大暑天時浸嘛 .  ^^

呢刻維持原判 , 5月中球季結束先至出門 , 係咁先 !!

Bye Bye !

2013/12/19

新移民 綜援結局篇(解決方案)




Hello !


今次係 "新移民 綜援" 結局篇 , 

其實仲有排可以寫 , 不過唔想晚晚都講 , 所以黎個暫時結局唶 .

話說呢單枉判 , 令眾街坊嘩然 , 去到邊度都有人談論 , 

當然以我去開既 "茶餐廳" 收到最多風 . 歸納所有街坊意見 , 

得到個一面倒既結論 , 就係 : 有冇攪錯呀 , 啊姐做到肺都甩埋 , 

每個月都係得果幾仟蚊 , 果班大食懶一個唔該 , 

政府就每個月質成皮野過佢地 , 係 ~ 佢地係好慘 , 

咁慘就咪鬼黎 "香港" 啦 , 都離X晒譜架 ! 

~~~~~~~~~~~~~~~~~~~~~~~~~~~~~~~~~~~~~~~~~~~

大至上都係咁上下啦 , 其他既用字可能唔同 , 不過意思一樣 .

其實 "政府" 要解決民怨一D都唔難 , 只要對症下藥就OK  

另外嚮電台聽到D友話 , 只要向內地攞番個審批權 , 

將D老弱殘兵篩走 , 淨係吸納D類似 湯唯 , 李雲迪 , 郎朗等專才 .

咁樣先可以確保資源盡量用在本地人身上 .

呢招本來都唔錯 , 不過問內地攞審批權 , 基本上同問老虎攞皮差唔多 , 

俾左個權 "香港" , D貪官食乜野呀 ? 你養佢呀 ? 

~~~~~~~~~~~~~~~~~~~~~~~~~~~~~~~~~~~~~~~~~~~

倒不如用我既方法就實際得多 , 呢類方法在 Yahoo Blog都講過 , 

可惜 "梁班子" 既智囊團冇上過去瀏覽 , 依家搬到黎呢度 ,

不妨再講多次 , 希望佢地睇得到 , 最多唔收佢顧問費 .  ^^

其實大部份 "港人" 唔順既 , 不外乎係個錢字 , 

只要俾番些小著數我地 , 叫做緩和一下大家不滿既情緒 .

~~~~~~~~~~~~~~~~~~~~~~~~~~~~~~~~~~~~~~~~~~~~

首先薪俸稅方面 , 年薪200萬以下既 , 一律免繳交 .

另外1000萬以下既物業 , 一律免交差餉及地租 .

最後呢樣亦係最重要 , 就係申請 "綜援" 不設任何限制 , 

即使你發過 "李X誠" , 或者窮到要訓街 , 只要你申請 , 

一律照市價發放 , 當然每年用13個月就永冇走雞啦 .

如果你覺得唔需要 , 可以唔申請 , 甚至申請完 , 轉交公益金亦得 , 

總之就人人有份 , 永不落空 , 咁樣咪唔會存在任何歧視問題囉 .

暫時講住呢三招先啦 , 再講落去就未免太過貪心 . 

~~~~~~~~~~~~~~~~~~~~~~~~~~~~~~~~~~~~~~~~~~~~~

我誠意希望 "特首" 既智囊 , 能夠採用呢個方案黎解決民憤 , 

頂多唔好話取材自呢度 , 功勞留番自己領 , 

即使他日 "特首" 論功行賞 , 我亦甘心做個無名英雄 .

Bye Bye !

2013/12/18

再談 新移民 綜援




Hello !


呢篇繼續講上篇既話題 ...

尋日五位法官聯手打開 "潘朵拉" 盒子後 , 

相信武林從此多事 , 呢個話題亦都沒完沒了 , 

不過今次並非講 "新移民" 點樣巧取豪奪 "香港" 既資產 ,

而係想講我地 "香港人" , 對呢單野點睇 ?

基本上絕大部份人第一個反應都會係 "有冇攪錯" ? 

都 "黐X線" 架 , (之後再講18個字既粗口)

不過間唔中都會聽到D另類見解 , 歸納多種另類意見 , 

有兩類我係最痛恨 , 就拎出黎呢度聲討 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先第一類另類意見係 :

即使政府真係讓非住滿七年既新移民領取綜援 , 

當中所涉及既款項都係有限 , 頂多每年都係十億八億 , 咪由得佢囉 . 

唔該咪咁戇居啦 , 當年雙非判勝訴 , 夠有人話所涉及既人數 , 

唔會太多 , 誰料十年過後 , 雙非童既人數 , 多都嚇死你 , 

之後搶奶粉 , 搶學位 , 搶醫療 , 搶公屋 , 呢波都仲未平 , 

"香港" 又要受多一劫 , 真係慘不忍睹 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~

第二類令我最痛恨既另類意見係 :

今次 "港府" 輸官司 , 足以証明 "香港" 係司法獨立 ,

絕對唔會受社會所影響 ,  樣樣都照足 "基本法" , 一字一句都唔可以改 .  

有呢種諗法既人都係戇居既 , 當年 "莊豐源" 慘案 , 明明人大已經釋左法 , 

(根據 "基本法" 唔知幾多條 , 全國人大常委會有權解釋法例詮釋)

何以法官唔依照釋法而正確判決 , 夾硬錯判 "莊豐源" 勝訴 , 

亦令 "香港" 陷於萬劫不復之地 , 睇黎只係佢鍾意就依法審理 ,

唔鍾意就自己打橫黎判 , 但係你又吹佢唔漲呀 . 

最近果位法官 , 都有出黎牙斬斬 , 見到佢就唔開胃 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次就講住咁多先 , 遲D先講今朝 "葉劉" 所講既中介公司 , 

辦理 "長者配對服務" , 專為內地女人安排嫁長者奪綜援服務 .

Bye Bye !

2013/12/17

司法界最黑暗的一日




Hello !


本來今晚諗住休息唔寫住 , 

不過下午聽收音機時聽到呢單案件既判決 , 忍唔住手寫番篇 .

正如標題所寫 , 今日都算得上係司法界最黑暗既一日 ,

點樣黑暗法 ? 之唔係判來港未滿七年領取綜援勝訴囉 . 

唉 ~ 個官都唔知點判既 , 所謂國有國法 , 家有家矩 , 

唔係見人地慘就俾同情分判人勝訴 , 還記得呢個條例係 "特首" 

曾蔭權所設立 , 當年新移民瘋狂湧港 , 來港第一件事就係往 

"社會福利署" 登記申領綜援 , 於是 "特首" 設立關卡 , 

要來港住滿七年 , 才可以申請綜援 , 總算係任內既一件德政 .

豈料今日被終審庭枉判推翻 , 真係六月飛霜 , 慘絕人寰 .

如果要一家團聚 , 大可以返 "大陸" 一家團聚丫 , 之前講過 , 

家陣 "大陸" 不知好境過 "香港" 幾多 , 果班 "冚家祥" 分明就

覬覦住 "香港" 既福利 , 可憐 "香港人" 再一次成為 "內地人" 既搖錢樹 .

而 "律政署" 班懶鬼 , 連請 "人大釋法" 既勇氣都冇 , 真係無恥 !

我相信果班友今次只係開始 , 遲D既訴訟會陸續有黎 , 

好似申請公屋 , 投票 , 樣樣都要升堂 .  >_< !!

有時想唔陰謀論都唔得 , 我個人懷疑呢單案又係 "西環" 在背後發功 , 

一個奪命追魂Call俾個法官 , 就可以推翻 "曾蔭權" 既德政 , 

令到 "大陸人" 可以盡情來 "香港" 略奪 . 

唉 ~ 心情灰爆呀 , 寫住咁多先 . 

Bye Bye !

2013/12/16

離職啟示




Hello !


本人 man wai , 於 2013年12月16日

正式離開 Yahoo Blog , 今後 Yahoo Blog 一切華洋轇轕 , 

皆與本人無關 , 特此聲明 . 

~~~~~~~~~~~~~~~~~~~~~~~~~~~~~~~~~~~~~~~~~~~~~

其實10日之後 , Yahoo Blog 都會正式結業 , 

呢篇啟示只係想帶出一個訊息 , 就係搬Blog一事 , 經已圓滿結束 .

回想起呢幾個月既搬Blog事件 , 可謂苦樂參半 , 

感覺上好似3個幾月去6次 "日本" , 叫做溫故知新 .  ^_^ !!

至於苦既係佔用晒我收工休息既時間 , 由於有成接近600篇網誌 , 

每晚只能搬幾篇 , 連星期日都要趕貨 , 電視都係聽多過睇 , 

依家攪掂晒 , 可以正式咁睇電視喇 . Yeah !

~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁點解唔用匯入網誌 ? 之前唔記得有冇講過 , 

曾經去成功匯入網誌既Blog友度參觀 , 發現頗多甩漏 , 

就好似D相片大細邊或爆格 , 回應又冇左Blog友相片 , 

總之就效果唔多理想咁啦 , 與其匯入完都要每篇執漏 , 

倒不如重新上載 , 雖然係手續繁複 , 但係出黎效果滿意 , 

縱然係捨易取難 , 總算每篇都好好睇睇 .  ^^ 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於今後有乜計劃 , 暫時諗住休息一排 , 

去下Blog友們既網誌度參觀 , 就好似 : (排名不分先後)

コーさん , t , Nerissa , 3J家庭 , 小肥 , 編號 , Shirley , 1733兄 , 

CK鼠 , 路過蜻蜓 , Nono's Blog , PIGGYBREAD , cowcow ...

(下刪500人 , 編幅所限 , 未能盡錄 , 如有掛漏 , 請諒 ! )

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外旅遊方面 , 呢刻初步諗住明年5月中球季完結後出門 , 

地點係 "北海道" 既 富良野 , 美瑛 , 層雲峽等地為主打 , 

如果有剩時間 , 或者執多一兩個地方 .

只可惜公司假期只係二月至五月可以動身 , 

暫時都未敢諗去 "根室" 果頭報 (上次大霧瀨大鑊) 既仇 .

不過距離依家仲有成五個多月 , 慢慢度都未遲 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~

好喇 , 講住咁多先 , 繼續睇 TVB 頒獎典禮 . 

Bye Bye !

2013/12/14

再談 路姆西




Hello !


上篇既 "路姆西" 大家爆粗都爆得好過癮喎 .

乜野路姆佢個西 , 丟佢個路姆西 , 路姆臭西等等 ...

雖然就粗鄙左D , 不過爆完粗 , 個人充滿正能量 , 好爽架 . ^^

既然爆得咁過癮 , 一於唔好俾佢停 , 呢篇繼續 "路姆西" .

早幾日 "頭條日報" 刊登 "與狼共桌" , 特首都擺番隻風水狼 , 

夠以証明呢隻 "路姆西" , 滲透率係幾咁高 , 上至達官貴人 , 

下至市井平民 , 大家都想擺番隻嚮屋企鎮宅 .  ^_^ !!

不過唔知受政治壓力還是自發性 , "宜家" 竟然幫隻狼改名 , 

由 "路姆西" 改為 "路福西" , 真係冇解 .  >_< !!

之但係你有你改 , 佢有佢叫 , 坊間依然稱佢為 "路姆西" .

歷史上改名唔接受事件 , 都發生過唔小 , 遠既就有 "叮噹" 改為 

"多拉A夢" , 近既就有 "泡菜" 改為 "辛奇" , 呢兩樣我都係唔接受 , 

照舊叫番佢既舊名稱 , 唔知大家又點睇 ?

~~~~~~~~~~~~~~~~~~~~~~~~~~~~~~~~~~~~~~~~~~

另外由於 "路姆西" 熱賣 , 市場觸角極之敏銳既 "香港人" , 

又點會放過呢個搵銀機會 , 一於抽盡佢既水 , 發番個新年財 .

有蛋糕製作公司 , 以 "路姆西" 及 "嬤嬤" 造型製作蛋糕 , 

只不過咁做 , 隨時犯上 "侵犯知識產權" 條例 . 

因為搵快錢而惹上官非 , 咁就唔抵啦 , 小心 !!


Bye Bye ! 

P.S. : 原來 "宜家" 呢個助學公仔廣告 , 我都有睇過 , 

(睇番D舊節目先知) 不過當時完全冇上心 , 睇完就算 .

估唔到呢隻 "路姆西" 會爆紅 , 天意 . haha ...

2013/12/11

人氣主角 ~ 路姆西




Hello !


好似好耐冇寫過正式網誌 , 既然搬Blog已經到尾聲 , 

咁就寫番篇黎襯下熱鬧 , 寫乜野主題 ? 

當然係當今人氣主角 ~ 路姆西 !!




呢隻公仔能夠熱爆全城 , 相信連作者都始料不及 , 

至於點解會熱爆 ? 好大程度係對政府不滿 . 

首先淨係佢個名都夠抵死 , 加上狼呢樣野代表乜 ? 

大家都心照不宣 , 買隻返屋企擺 , 得閒大叫佢個名 , 

叫做發洩一番 , 我諗都會幾過癮 .

話說回來 , 家陣個社會攪成咁 , 其實係意料中事 , 

當日即使由 "唐X年" 出任特首 , 情況亦相差唔會太遠 , 

我個人懷疑 , "香港" 比較重要既施政 , 其實係由 "西環" 設計 , 

交由 "特首" 宣讀 , 你地鍾意港人治港嘛 , 就棟個港人特首出黎 ,

不過所有野都由 "西環" 幕後操縱 .

如果心水清既 , 只要睇一兩單野就估到 , 就好似 "電視牌照事件" , 

相信 "特首" 本身同 "王維基" 並無深仇大恨 , 

何以寧逆天下人意見都唔發牌 ? 

另外 "林鄭" 話 "香港" 人口不設上限 , 呢D說話又點會係由衷之言 , 

"鐵達尼號" 既救生艇上客 , 都唔會不設上限啦 .

仲有水貨客 , 如果 "香港" 係有心做野 , 點會日日都迫爆 "上水" 區 ?

梗係 "啊爺" 有令 , 叫隻眼開隻眼閉啦 .

正如我早幾篇網誌 "進擊的巨人" , 回歸之日 , 巨人進城 .

就今朝聽收音機 , 話 "上海" 唔知乜野超越 "香港" , 

咁攪法 "香港" 唔俾人超越至奇啦 .

做市民既 , 唯有買個 "路姆西" , 在家裡好似打小人咁發洩 , 

叫做 "自我感覺良好" , 除此之外 , 別無他法 . 唉 ~

Bye Bye ! 

P.S. : 如果好環境既 , 可以考慮移民 .  ^_^ !!

2013/12/05

Yahoo 重生記




Hello !  


頭先試試再上Yahoo Blog , 咦 ~ 攪番掂喎 .

又可以繼續執網誌 , 今日在公司仲諗 , 假設Yahoo真係提早執笠 , 

咁應該點呢 ? 尋晚雖然更新左兩篇 , 不過同重新寫冇乜分別 , 

極之耗損資源 , 即係浪費時間 , 既然佢攪番掂 , 

一陣又執番幾篇啦 , 咁依家做乜 ? 

當然係睇番尋晚果場 "新特蘭vs車仔" , 3:4客其他 , 

實在太勁 , 唔睇保証終生後悔 . haha ...

好 ~ 夠鐘 , 埋位睇波 . 

Bye Bye ! 

2013/12/04

Yahoo提早執笠 ?




Hello !  


攪乜鬼 ? Yahoo玩提早執笠呀 ?

頭先諗住入去搵番D網誌 , 結果點都入唔到 , 

明明話12月26日結束架 , 點解會咁 , 出爾反爾 , 好卑鄙唶 .

我之所以咁慶 , 係因為我要對番D舊網誌 , 

先至可以搬到去呢度既網誌 , 依家入唔到去 , 攪到我進退失據 .

話時話 ~ 搬網誌進度比預期中順利 , 已經攪掂大部份 .

剩番最後一個旅遊網誌 , 即係 "北海道 + 青森" 呢Part ,

只要攪掂埋就大功告成 , 依家俾Yahoo攪一攪 ,

唔通要出Plan B ?

Bye Bye ! 

2013/11/27

再見 . 秋葉原




Hello !  


今日頭條 : 秋葉原無線電街Sayonara .


呢單報紙料係尋日 "太陽報" 刊登 , 

內容話經營了64年既 "秋葉原" 電器街 (電子零件市場攤檔) ,

因受網上購物頂爛市影響 , 決定於本月底結業 . 

講開 "秋葉原" , 對上果次參觀係2008年東京自由行 , 

(由於剛搬完網誌 , 所以記憶猶新)

當日有幸瀏覽佢既 "電子零件攤檔" , 由於在 "鴨寮街"附近工作 , 

所以參觀完都未有感到特別震撼 , 反而出面街一幢幢既大型家電中心 , 

睇到我嘩嘩聲 , 果D新款家庭電器 , 正式係唔打得都睇得 .  ^_^ !!

記得當日參觀完 "秋葉原" 家電中心 , 再去附近食拉麵 + 餃子 , 

味道一流 , 到依家仲回味緊 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~

不過有樣野令我感到奇怪 , 若然係網購頂爛市既話 , 

理應係大型家電商店首當其衝 , 簡單D講即係就算執笠都佢執先 , 

有乜理由電子零件攤檔執先 ? 話晒租金點都小過大型公司掛 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於網購 , 相信都好難做到我生意 , 皆因我份人一向多疑 , 

買野既話 , 最好就一手交一手 , 即使係 Yahoo 果D所謂拍賣 , 

(在地鐵交收果隻) 我都絕對唔會幫襯 , 唔知點講 , 

總之就好似冇乜保障咁啦 . 

Bye Bye ! 

2013/11/23

進擊の巨人 J2




Hello ! 


好消息 ! 日本人氣動畫 "進擊の巨人" , 將於今晚11:30 , 

假座於 J2 首播 , 並於翌日凌晨05:30重播 , 千祈咪走雞呀 .

其實呢套動畫早已於 Youtube 熱播 , 不過係日語配中文字幕 . 

我只係睇左一集咁多 , (即係男主角母親被巨人食了果度)

其餘等都等到 TVB 播放果陣先收睇 , 因為配上廣東話唔駛睇字幕 , 

咁樣先睇得夠傳神 , 今日終於都俾我等到 , Yeah !


講番呢套動畫 , 話題就多咯 , 首先宣傳句語方面 , 

究竟係照 "日本" 果邊直接翻譯 , 還是係 TVB 原創 ?

若然係後者 , 咁創作果位仁兄 , 真係要加人工 .  ^^

居然有人可以將 "香港" 依家既境況 , 咁一針見血地形容 .


係咪形容得相當透徹呢 ? 事實上 , 我一直懷疑 , 

該動畫既故事大綱 , 係以 "香港" 現況作為藍本 , 

至於動畫裡面既巨人 , 想暗示邊個 ? 大家心照不宣啦 .

只不過佢地唔係將我地監生吞落肚 , 只係將本來屬於我地既野 , 

變成唔再屬於我地 , 就好似點解生仔會冇床位 ? 

點解買唔到奶粉 ? 點解小一學額要排隊 ? 點解 ......

~~~~~~~~~~~~~~~~~~~~~~~~~~~~~~~~~~~~~~~~~~~~

套動畫既結局究竟有冇將巨人消滅 ? 我暫時都未知 .

不過 "香港" 就肯定唔可以戰勝巨人 , 

咁多位 , 準備定被巨人慢慢吞噬啦 . haha ...

Bye Bye !

2013/11/22

阿信的故事




Hello !


尋晚同Blog友 t 講開 "阿信屋" , 

話果度有 "摩周湖の水" 賣 , 於是今晚收工去走番一趟 ,

去到凍櫃搵搵 , 唔見喎 ? 可能唔係間間分店都有啦 , 

不過入寶山又豈能空手回呢 ? 於是乎求其執番兩件 , 

就係 "芥辣豆" 同埋右手邊果包唔知乜 .  ^_^ !!

另外仲送多一張10蚊戲票折扣券 , 用黎睇電影 "阿信的故事" ,

可謂夠晒傳神 , 一齊唱番Part歌啦 , 準備 :

命運是對手 , 永不低頭 , 從來沒抱怨半句 , 不去問理由 , 

 仍踏著前路走青春走到白頭 , 成功只有靠一雙手 , 奮鬥 ...


講開日本零食 , 還記得以前要經過好多渠道先至買得到 .  

所謂 : 一個酸梅兩個核 , 今時就唔同往日 . ^^

依家要買既話 , 真係話都冇咁易 , 一落樓下就攪掂 . 

不過話時話 , "阿信屋" 開業時以日本零食為主 , 時至今日 , 

已經有好多其他國家既食物銷售 , 包括 : 韓國及台灣等 ...

而我主要都係幫襯佢買日本零食 , 亦因為咁 , 

即使去到 "北海道" , 都買小好多食品 , 

反正價錢又唔相差得幾遠 , 無謂拎餐飽嘛 . 

好 ~ 講住咁多先 , 繼續睇 "法外風雲" 結局篇 .

Bye Bye !

2013/11/19

萬千熄機賀台慶




Hello !


今日係11月19日 , 亦係TVB台慶既大日子 .

早排發牌風波攪到一鑊粥 , 到依家都仲未解決 , 

而事件上TVB亦有發功 , 所以市民遷怒於佢亦合情合理 , 

加上 "阿叻" 寸寸貢推波助瀾 , 令市民忍無可忍 , 

所以我決定加入熄機大軍 , 由依家開始 , 

直至到P.M.10:30都唔開電視 , 之後先至睇 "明珠台" 

劇集 "新福爾摩斯" , 唔知大家對於今次熄機事件又點睇呢 ?

不過話又說回來 , 一般市民熄機與否根本唔重要 , 

最重要係府上安裝監察黑盒既特別觀眾 , 果D先至係重點 , 

聽講全港有800個家庭有安裝呢類黑盒 .

再簡單D講 , 即係話就算全港九成九市民都熄機 , 

只要果800個家庭都開機睇TVB , 咁佢既收視率就達100% .

所以根本就冇公道可言 .

Bye Bye !

P.S. : 其實係好多年都冇睇過台慶 , 所以先賣個順水人情咋 . 

若然他朝有個 "萬千熄機罷睇英超" 活動 , 

我真係采佢都有味 , 因為 "英超" 實在太過精彩 , 

尤其係 "車仔" , 勁 !!  haha ...

2013/11/16

港府應否撥款助 "菲律賓" 賑風災 ?




Hello !


今日討論焦點 : 香港應否批款賑風災 ?

一於長話短說 , 我個人認為 , 除非 "菲律賓" 總統向聯合國發出呼籲 , 

希望各國仗義幫拖 , 否則既話撥款一事 , 可以Hold住先 .

皆因人家都未出聲 , 我地就擒擒青送錢 , 咁樣即係下意識覺得佢地攪唔掂 , 

正如當年 "美國" 受颶風 "卡特里娜" 所破壞 , 

又或者 "日本" 3.11大海嘯 , 從未冇聽見 "立法會" 有人提出撥款 ,

甚至街頭募捐 , 話協助日本同胞 , 血濃於水等字眼亦唔見 , 點解呢 ? 

因為我地覺得佢會自己攪得掂 .

同樣地 ~ 如果 "菲律賓" 總統冇開聲就捐款俾佢 , 

唔知佢可唔可以向 "國際平機會" 投訴 , 話 "香港" 歧視佢地 ?

另外 ~ 就算真係撥款俾佢地 , 款額一定唔可以比 "中國" 多 ,

皆因 "鎗打出頭鳥" , 一向係內地既潛規則 , 正當你沾沾自喜 , 

以為自己捐款夠大份之際 , "西環" 已經將你記錄在案 , 

第日你就知味道 , 功高蓋主呢個大忌 , 可以發生在任何地方 .

至於民間應否自行捐款協助 "菲律賓" ? 其他人點我管唔到 , 

我自己就一定唔會捐 , 除了受人質事件影響之外 , 

當日 "菲傭" 司法覆核爭居權 , 差點令 "香港" 萬劫不復 ,

呢樣亦都係好難忘記 , 再者 ~ 所謂民間捐款 , 若然捐100元出黎 , 

有50元落到災民手上 , 經已要劏雞還神 .

所謂 : 善財難捨 , 有時都唔可以太過疏爽 .

Bye Bye !  

2013/11/12

Yahoo又有新攪作




今日收到Yahoo既電郵 , 

內容話想我過檔去旅遊 with GOtrip . 

乜野叫做 : 旅遊 with GOtrip ? 不如大家一齊睇睇佢介紹 .

電郵內容如下 .


親愛的 Yahoo! Blog 用戶 :

您好 ! 我們是 Yahoo 旅遊 with GOtrip , 

一個集旅遊分享平台及旅遊訊於一身的網站 .

相信您早已知道 , Yahoo! Blog將於2013年12月26日關閉服務 .

我們亦都明白作為一個Blogger , 

要在短時間內將自己多年來的心血另找一個「家」寄存並不容易 , 

因此我們特別推出轉移帳戶資料服務 , 幫助你輕鬆搬家 , 

保留舊有Blog文 , 並提供方便易用的平台讓你的Blog延續下去 .

作為 Yahoo 平台下的旅遊頻道 , Yahoo 旅遊 with GOtrip 

不受 Yahoo Blog 關閉服務影響 , 將為所有用戶繼續提供遊蹤分享服務 .

只要幾個簡單步驟 , 即可將您以往在 Yahoo! Blog的文章轉移到 

Yahoo 旅遊 with GOtrip 內 , 將您的精彩 Blog 文延續下去 .

閣下轉移帳戶資料後 , 大部份資料如文字 , 相片及文章編排均會保留 , 

與一眾旅遊名人包括泰國通胡慧沖 , 寫攝人 Celia 和旅遊食家紀曉華等 , 

無間斷地在網上分享你獨一無二的旅遊經歷 .

你的精彩文章更有機會被編輯選中 , 成為Yahoo主頁推介文章 , 

向更多人分享你的遊蹤 .

轉移帳戶資料步驟 :

1 . Click 入 Yahoo 旅遊 with GOtrip 登記成為用戶 .

2 . 在 Yahoo! Blog 申請資料備份和下載 .

(如您已下載資料備份 , 可跳過此步 .)

3 . Click 入轉移帳戶資料頁 , 完成轉移資料步驟 , 

約 3 至 7 天會收到電郵通知 , 確認成功轉移資料 , 

並能在 Yahoo 旅遊 with GOtrip 分享旅遊經驗 .

4 . 如您的資料備份容量超過 100MB , 

請電郵致gotrip_cs@nmg.com.hk , 將有專人回覆你 .

如有任何問題或查詢 , 歡迎隨時與我們聯絡 , 

我們期待在Yahoo 旅遊 with GOtrip 見到你的文章 !

聯絡電郵 : gotrip_cs@nmg.com.hk 

Yahoo 旅遊 with GOtrip 團隊 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

就係以上既電郵內容 , 參唔參加好呢 ?

如果唔係善忘 , 還記得當日我錯誤按下 "輕鬆搬家" , 

結果攪到雞毛鴨血 , 到依家都仲未走出陰霾 .

所以都係睇定D好 , 呢D刺激 , 我受得起一次 , 受唔起第二次 , 

因此決定將我在Yahoo既網誌搬晒黎呢度先講 , 

免得再一次瀨野 .  >_< !!

就咁決定啦 .

Bye Bye ! 

2013/11/09

最瀛自由行 . 北陸




Hello !


今日星期六 , 求其搵D野黎寫 , 就講搬Blog進度啦 .

經過連日既努力 , 6個旅遊網誌裡面 ,

4個經已搬妥 , 依家淨番兩個 , 希望可以在YB執笠前攪掂埋佢 , 

正式係搬Blog尚未成功 , 同志仍需努力 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~

話題一轉 , 講其他野 , 今晚做果套 "最瀛自由行" 北陸篇 , 

究竟邊度先至係 "北陸" ? 未睇之前我都唔知 ?

個節目睇了一半就要轉台 , 過 J2 度睇 "律政狂人" , 

不過唔緊要 , 呢D旅遊特輯一定會錄起黎翻睇再翻睇 . 

佢地去既地方都OK喎 , 或者可以編排入明年行程裡面 ,

依家掛住睇 "英超" , 都唔寫落去喇 .

Bye BYe !   


2013/11/02

日本櫪木縣名物展




Hello !


早日睇報紙見到有個 "日本櫪木縣名物展" 介紹 .

老老實實 , 對於 "櫪木縣" 所知真係有限 , 淨係聽過 "櫪木SC" . 

(依家在 "日本乙組聯賽" 排名第8 , 聽日將會作客 "長崎成功丸" , 

"馬會足智彩" 暫時賠率係 2.95 , 買些小支持佢都好喎)

至於佢在 "日本" 邊個地方 ? 真係俾張地圖我都指唔出 . 

於是上網搜集佢既資料 , 原來就在 "東京" 上面 "日光" 果頭 .

而呢個名物展就在 "荷里活廣場" 舉行 , 既然近近地 , 

今晚收工一於去探過究竟 , 一去到 ~ 即刻見到連場打鬥 , 

有兩位 "美少女" 與 "忍者" 扮相既男人火拼 , 

間唔中有位老伯出場攪笑 , 期間播放 "金鐵交鳴" 既打鬥音響 ,

呢個情況有D似曾相識 , 就係 "登別伊達時代村" 裡面打鬥模式 , 

不過 "登別" 果度仲要肉緊小小 . 

就在地下舞台打鬥 , 走來走去 .


打鬥中 ... (四圍取景)


有工作人員在攝錄 , 好Pro喎 .  ^^ 


忽然二對一 . (試試唔用閃光燈)


老伯忍者負責攪笑角色 .  ^_^ !! 


睇唔到既話 , 樓上有大電視播放 .


本來隔離仲有D名物介紹 , 同埋旅遊資訊部 , 

不過部相機冇電冇得影 , 唯有拎D資料返屋企慢慢睇 .


睇完之後 , 覺得果度都係一個唔錯既地方 , 

只不過明年即使出門 , 亦多數唔會選擇果度 .

因為我始終都係 "北海道" Fans , 就算離開 "北海道" ,

次選都暫定 "能登半島" 或者 "鬼太郎" 家鄉 "境港市" 果頭 .

依家始終都仲有一段長時間 , 可以慢慢考慮 .

如果大家有時間 , 不妨去 "荷里活廣場" 睇睇佢地 , 

個名物展做埋聽日 (11月3日) 就完結 .

Bye Bye !

P.S. : 櫪木SC 作客不敵 長崎成功丸 , 慘吞兩蛋 .  0:2 

2013/10/19

變形金剛大戰大南街




Hello !  


呢幾日既新聞都圍繞住 "變形金剛" , 等我都黎襯熱鬧 , 整番篇網誌贈慶 .

話說呢套電影黎 "香港" 取景 , 仲要 "深水埗" 都係其中之一 , 

既然黎到我主場 , 點都要過去睇睇 .

係咁咦影兩張相啦 , 真係掛滿燈籠架 .
黎張遠小小既 , 不過佢地未開工 , 聽日應該會好熱鬧 .  ^^

一去到首先見到就係招牌兩旁掛滿紅色燈籠 , 可能在外國人眼中 , 

咁樣先至夠 "中國" 氣氛掛 ? 另外咪錶位旁擺滿雪糕筒 , (應該係用黎趕車) 

其餘都冇乜點改動 , 聽D街坊傳聞 , 聽日(星期日)將會封街拍攝 , 

屆時希望各商戶繼續開門 , 黎營造平日既氣氛 , 電影公司會有小小心意 , 

大約數仟圓左右既報酬 . (不過呢D都係聽番黎 , 未經証實)

好彩唔係在我果邊攪咋 , 因為大好星期日都要返公司 , 

真係會好唔高興 , 有錢收都係咁話 , 不過人地貴為億萬金元大製作 , 

仲要全世界發行 , 度度都可以取景 , 偏偏就千里迢迢黎到 "香港" ,

仲要係 "深水埗" , 若然企硬唔開門 , 又似乎有點不近人情 , 所以都幾難抉擇架 .

依家咪好囉 , 在另一邊拍攝 , 唔駛煩到我 , 到電影上畫時又可以睇番呢幕 , 

相信都只會係3幾分鐘劇情既唶 , 唔好有乜大期望 .

最後講番收 "陀地" 果幾條 "躪癱" , 呢D人渣正式係唔死都冇用 , 

攪到 "香港" 個朵臭晒 , 報導話佢地係 "黑社會" 既會員 , 

究竟今次收陀地行動 , 係自發性定抑或係奉 "社團" 既名義 , 

我覺得該 "社團" 有必要出黎澄清 , 甚至開除佢地 "黑社會" 會籍 , 

邊有人咁黐線架 ? 收果10萬蚊陀地 , 人地返去唱衰 "香港" 既話 , 

"香港" 損失何止10倍 , D人真係低能到爆 , 

再簡單D講 , 簡直係垃圾之中既垃圾 , 案件都唔駛點審理 , 

求其拖出去亂棍打死再五馬分屍 . 

Bye Bye !

2013/10/06

第十次試Blog之 "相片Size篇"




Hello ! 


今次呢篇網誌叫做 : 相片Size篇 , 即係測試邊種Size既相片最適合呢度 , 

相片內容只係求其執幾張 , 可以不理 .一般既上載相片 , 佢會整到好細張 , 

不過可以更改 . 分別係小 ~ 中 ~ 大 ~ 特大 ~ 原始大小等等 ...

而坊間有辦法可以一鋪過令相片轉為指定Size , 好似係利用HTML , 

Copy後再更改 , 之後又Copy番落去 , 呢招適合大量相片而又唔駛旁白既Blog友 , 

至於我咯喎 , 基本上每張相片都有旁白 , 點都要執一執佢 ,

我比較鍾意用 "原始大小" 呢個項目 , 所以就要測試 , 

上載乜野Size既相片 , 先至比較滿意 . 試過用800X600 , 好似有D爆框 . 

之後又試640X480 , 呢種就剛剛好 , 不過又略嫌大左D . 

再之後試480X360 , 睇落都OK , 但係又好似細左DD , 

今次一於試勻晒每一種 , 睇過效果又如何 ? 大家幫幫眼丫 . 

首先打頭陣係 "成瀨心美 & Rio" , 800X545 點睇呀 ? 係咪爆晒框呢 . 


跟住係 640X437 , 好似剛剛好 , 但係略嫌大左D . 


之後輪到 "夏目彩春" (原名 : 原更紗)

呢個係依家沿用緊既Size , 480X326 都OK既 , 

但係睇得耐又好似細張左D , 真係難服侍 .  >_< !!  


跟手又試試 560X376 , 呢張僅次於 640X480 , 又睇下點 ? 


橫掂試開 , 唔爭在試埋 520X354 , 今次係最後一試 . 


相片測試完畢 , 基本上會在呢幾種Size裡面揀一種 , 

報告會在YB執笠後 , 亦即係兩個月既試用期完結後公佈 . 

Bye Bye !