2015/03/26

好彩佢仲識得分




Hello !


今次呢篇網誌非常簡單 , 只係跟進番上果篇 .

本來上篇要講既都講晒 , 不過就係爭咁張相 , 今晚解決埋佢啦 .

就係呢張 , 夠晒詳細喇掛 , 香港人請放心 .  ^^


既然咁高興 , 黎多一單添 .

就係呢度既瀏覽次數 , 終於突破十萬 . 

 

雖然比起其他Blog友既戰績 , 依然微不足道 , 不過以呢度黎計 , 

都叫做唔簡單 , 仲有 ~ 在早幾篇我最唔開心既時候 , 

得到大家既慰問 , 感覺好Warm , 再一次多謝大家 . 

Bye Bye !

2015/03/25

租定係唔租 ?




Hello !


早幾日聽收音機 88.1 光明頂節目時 , 

主持人 陶傑 話收到未經証實既消息 , 話日本方面唔租車俾中國護照遊客 .

咁大鑊 ? 唔係嘛 . 香港人有冇影響先 ? 

在一連串問號之下 , 上討論區度搵料 , 睇下是否真有其事 ?

結果搵到呢段消息 ...


咦 ~ 新札幌喎 , 咪我幫襯開果間 , 究竟佢地會否將香港人歸類埋中國人 ?

如果連香港人都唔租車 , 咁就唔駛浪費時間搵料 , 因為冇車既話 , 

都好難去得落手 , 搭 JR 轉巴士基本上都唔會考慮 .

而討論區方面又眾說紛紜 , 冇一個較肯定既答案 .

直至到今日 , 太陽報報導呢單料 , 佢話呢個措施全為內地人而設 , 

香港人不受影響咁話喎 , 所以唔駛咁擔心 . 

咁都好D , 話時話 ~ 雖然我仲未知道心情幾時先至恢復到可以出門 , 

不過對呢單料都好關心 , 假設他朝往北海道冇得租車 , 

都咪話唔冇癮 , 其實日本旅遊局應該一早出黎澄清啦 .

Bye Bye !

P.S. : 多謝 t先生介紹 , 下列網頁有詳細解釋來龍去脈 .

http://china.hket.com/article/573891

蘋果網頁 , 鳴謝 小肥兄 介紹 :

http://hk.apple.nextmedia.com/realtime/news/20150324/53564875


2015/03/22

近況




Hello !


又一個星期日 , 輪到講下近況 ...

感謝親友們的協助 , 辦妥了父親的後事儀式 , 感覺上正式與父親道別 ,

心中依然萬般不捨 , 正如佛家所講既愛別離苦 ,

未試過唔知 , 原來真係咁苦 ,

唯有希望父親一路好走 , 如果有機會 , 來生再做過一家人 .

依家心情又平復返唔小 , 正如上篇所講 , 內心既疤痕結焦又厚D .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 夠鐘睇波 , 曼聯剛入一球 .

有心情睇波 , 証明心情好番好多 , 回想早排真係每刻都咁黯然 ,

乜都冇心機 .

Bye Bye ! 

2015/03/15

傷心過後 , 重新出發




Hello !


今日係3月15日 , 雖然已經年廿五 , 冇晒過年氣氛 , 

不過勉強都叫做新正頭 , 如果D相仲係黑白 , 未免有點那過 , 

所以都係時候轉返做彩色 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住輪到講近況 , 首先要嗚謝各界Blog友 , 得到大家既鼓勵 , 

心情大致平復 , 叫做好過最差果陣好多 , 點講好呢 ? 就好似心裡面既傷口 , 

結了層薄薄既焦 , 依家等佢不斷咁厚 , 最後整片剝落 , 不過點都會有疤痕 .

始終呢D野都係人生必經階段 , 只能靠自己克服佢 .

再俾多小小時間 , 相信一日會好過一日 . 

Bye Bye !

P.S. : 呢篇個名叫做 重新出發 , 並唔係講旅遊 , 旅遊尚未有心情 , 請諒 !



2015/03/07

最難過的農曆年



(以下網誌內容可能令人情緒不安 , 敬請各界留意)


Hello !


今日係3月7日(年十七) , 農曆年氣氛稍減 , 

係時候講解何以咁耐都冇更新網誌 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

在新春年假初期 , 家父不幸離開了我 , 失去父親果種傷痛 , 

絕對難以用言語或文字來形容 , 如果真係要搵個形容詞 , 悲痛莫名 一詞較為貼切 .

平時聽到有人離世既消息 , 大多數都係聽完就算 , 最多都係愕一愕然 , 

今次發生在自己身上 , 發夢都估唔到 , 原來可以痛得咁交關 . 

與父親的關係雖然未到無所不談既地步 , 我會形容在良好之上 .

收到消息初期 , 正式係晴天霹靂 , 寑食難安 , 食飯只係將D野放落口 , 

完全不知其味 , 晚上失眠到夜一夜才能入睡 , 經常想著從前生活點滴 . 

心想 : 父親離開了 , 縱然俾晒全世界我又如何 ? (當然全世界唔會俾晒我)

另一方面又想過正常生活 , 盡快忘記傷痛 , 不斷在網上尋找方法 , 

見過無數安慰字句 , 全部都明白其含意 , 可惜傷痛依然 , 

對任何事都冇晒興趣 , 更枉論更新網誌 , 到依家稍為遠離新春 , 

先至將呢個消息公佈 , 免得影響大家新春情緒 . (始終都係我既事)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

直至到呢一刻 , 傷痛仍然未能克服 , 心神恍惚之餘 , 對任何事都冇興趣 .

旅遊一事已經取消 , 對於想睇旅遊網誌既Blog友 , 只能講聲 : 抱歉 !

 而呢度暫時都要休息一排 , 等遲D心情回復之後 , 先至探訪大家 .

不過真係唔知幾時先至可以痊癒 .

最後 ~ 如果因為我既事而引起大家情緒不安 , 只能再講一聲抱歉 .

暫別的 Bye Bye !