Hello !
上回講到參觀完 道の駅 伊方きらら館 ,
跟住向 佐田岬 繼續進發 , 點解下面張相會變左在 八幡浜港 ?
原因就同標題所講既 影快相 有關 .
寫呢篇稿之前都要組織一下 , 因為好多細節位都忘記左 ,
要慢慢咁重拾記憶 , 話說當日離開 道の駅 一路向前行 , 大約過左條隧道位之後 ,
有個人衝出黎截住我部車 , (當時唔知佢係警察 , 仲以為係修路工人)
示意我駛埋一邊 , 於是乎照做 , 跟住見佢係警察 , 順便熄埋匙 ,
見佢唔知講乜 , 以為係例行檢查 , 俾左個護照及國際牌佢睇 ,
佢叫我落車 , 同佢去一輛Van仔車尾 , 車尾有部儀器 , 顯示73km ,
果陣先至知道係影快相 , 再跟住佢叫我上警車後坐等 .
隔左一陣佢話要影印護照及國際牌 , 不過呢度冇設備 ,
要拎去其他地方影印 , 來回大約要20分鐘左右 , 我心諗 : 俾你攪一攪 ,
乜野心情都冇晒啦 , 之後都唔去 佐田岬 咯 , 等就等啦 .
等候其間 , 在車上接受佢既問話 , 內容大約係姓名 ~ 地址 ~ 電話 ~
在日本有冇親戚朋友 ~ 同埋講解交通法例之類咁啦 .
問其他手續野就冇乜所謂 , 大家各為其主 , 我唔怪佢 ,
之但係講到交通規則 , 呢樣就有野講喇 ...
(我心諗 : 在呢D咁既路上限速50km ? 你冇野呀嘛 ~ 大哥 ,
就算在市區燈位與燈位之間 , 有時都唔止73km啦 , 如果在北海道 ,
租 Mark X 果陣 , 係咁咦都80-90km以上啦 , 家陣已經留番唔止一手 ,
如果全程行50km , 簡直係對部車同條馬路既侮辱 ,
你日本政府係咪好等錢駛 ? 咁樣黎裝人彈弓 , 都離X晒譜)
以上對白 , 只係自己既心聲 , 當然冇同佢講啦 , 就算想講都唔識講 . XD
告票一張 . (上半部份)
下半部份 .
再之後佢俾張入數紙我 , 叫我在一星期內 ,
在任何一間銀行交罰款 , 盛惠 15000Yen ,
擾攘左大約半小時之後放人 , 正如之前所講 , 乜野心情都冇晒 ,
掉頭往今晚入住既 八幡浜 方向行 .
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
後記 : 被影快相之際 , 心情的確係有D唔順 , 因為影響埋打後既車速 ,
所謂一朝被蛇咬 , 十年怕草繩 , 如果車速稍快 , 又驚俾佢陰多次 .
(若然一次自駕遊俾入影兩次快相的話 , 相信都係史上第一人)
之但係舖舖行50又冇乜可能 , 參考番當地司機 , 得出一個理論 ,
唔知Work唔work , 就係在佢限速之內 , 加多10km ,
即係話如果佢限50km , 咁就保持左60km左右 , 如此類推 ,
打後既車速 , 就係用呢種策略 .
另外用啊Q精神黎睇 , 坐警車都算係一個景點 ,
有乜野係可以唔駛犯刑事就可以上警車參觀 , 依家咁樣都唔錯丫 ,
係入場費貴左小小啫 , 要成15000Yen . XD
Bye Bye !
