2009北海道8天自由行(修訂版)D5-7TOKYU HANDS篇

Hello !

上回講到在 "萬世閣" 酒店裡面浸 "日歸溫泉" , 

玩足幾粒鐘之後 , 落地下大堂買手信 , 之後出番大馬路等巴士 . 

好彩等一陣就有車到 , 否則冰天雪地裡 , 

即使剛剛浸完溫泉 , 都會變 "雪條" .  ^^

一上車 ~ 咦一個人都冇 , 唔通由總站出車 ?

又唔係丫 , 張 "整理券" 寫住3號既 . 

(落車果陣只要將 "整理券" 同埋 "巴士券" 一齊入落個錢箱就OK)

終於有人上車 , 唔駛一個人咁寡 . (開始天黑)

落車請按鐘 . (不過坐到總站 , 呢程用唔著)

搭左大約一個小時 , 部車埋站 , 佢話到總站 .

咦 ~ 唔似 "札幌" 喎 . Why ? 原來頭先 "擒擒青" 上車 , 

都冇睇到部車原來以 "真駒內" 為總站 , 

即係要駁多一程地鐵至得 . 冇乜所謂啦 , 搭地鐵一樣唶 .

呢個就係 "真駒內" 地鐵站 .

送車尾添 , 唔怕 ~ 好快就有另一班車 .

坐15分鐘地鐵 , 9個站 280Yen .

落車之後 , 即刻就有節目 , 就係行呢間 TOKYU HANDS .

好多層樓 , 我最鍾意由頂層直掃落地下 .

呢類公司好好行 , 只係僅次於 "企鵝王國" .

一齊參觀啦 , 相片排名不分先後 . (家品部)

時計部 . (D鐘如果寫 "電波放送" , 就千祈唔好買 , "香港" 用唔到)

呢D唔係時鐘 , 係 "溫 ~ 濕度計" , 我買左一個 , 依家仲掛緊廳度 . 

燈飾部 , 小心電壓唔同 "香港" .

好快佢地就話開始收工 , 唯有跟大隊一齊收工啦 . =_= !!

最後一擊 , 手提包部 , 地下果層 , 睇完就 Bye Bye .

出番黎大街 , 都係時候食晚餐 , 午餐 "親子丼" 早已經落晒格 .

食乜呢 ? 蟹本家 , 咁豪 ? 下次先啦 .

門口有個蟹池 , 利害 ! 

KFC 我找到了 , 你也可以找到 . haha ...

今餐一於食大佢 , 四件雞 , 勁飽呀 , 個 "葡撻" 都要打包返酒店食 .

返酒店途中 , 見到間 MOS BURGER , 早知幫襯佢啦 . 

(食完先黎後悔 , 係咁架啦 , 如果幫襯佢之後見到 KFC , 

又會後悔 , 我都好難服侍架 , haha ... )

十勝 ... 包 , 賣相一流 , 想引死人咩 .  ^_^ !! 

經過 LAWSON , 補充番D物資 .

  

買齊 , 返酒店咯 , 條街黑me蚊 , 充滿 "孤身走我路" Feel .

Bye Bye !