2011北海道10天雪地自駕遊(修訂版)D1-1出發篇

Hello !

今日係2011年1月26日 , 第一日出發 , 

基本上冇乜行程 , 咁就一於長話短說啦 .

搭機鐵 , 青衣往機場站 , 大約10分鐘就到 .

記得拎齊野 , 搵番個櫃檯Check in .

當日係農曆年左右 , 機場都攪番D賀年氣氛 .

有幾部ANA自助登記機 , 不過我習慣用人手處理 .

咁就過隔離幫襯櫃檯啦 , 橫掂得小貓3幾隻 .  ^^

入閘檢查後 , 黎到呢度搵幾多號Gate .

NH1172 東京羽田 , Gate30 .

就係呢一部機 .

機場D指示板都用晒 LCD Mon . 勁 !

鏡頭一轉已在機上 , 飛機餐 , 正 ! 乜都同佢清晒 . 

3個多小時後就到達 , "羽田" 冇咁多人 , 排3幾個人就攪掂 ,

跟手去 T2 國內線免費巴士 , 中途見到間 LAWSON ,

入去買D野 , 打散張10000Yen .

就係買呢兩味野 .

好快就有車到 , 上車喇喂 .

大把位任坐 , 不過幾分鐘車程 , 坐唔坐都得啦 .

再等內陸機 , ANA81 札幌  20:30 起飛 .

終於等到上機 , 快D起飛啦 , 好心急呀 .

個多小時就到達 , 等候行李期間 , 

見到個牌話22:14有班JR出 "札幌" , 錯失既話要等10幾分鐘 , 

所以一拎行李就飛奔去買飛入閘 , 相都唔得閒影 , 

上到車唔夠30秒就關門 , 時間剛剛好 .

唔算好多人 .

凳下面係暖氣出風口 , 剛坐低就好舒 , 隔多陣變得好熱 .

經過7個站 , 終於到步 , "札幌" 我來也 .  ^_^ !!

Bye Bye !

2011北海道10天雪地自駕遊(修訂版)雪地自駕遊經驗之談篇B

Hello !

上回講到雪地駕駛最重要與前車保持距離 , 經過我實驗 , 

只要車速低於40km , 即使係全白色雪地 , 

一腳勁踩 Brake都可以唔係發出聲響之下順利煞停 .

(不過部部車都唔同 , 最好自己在雪地測試穩陣D)

皆因未出發之前 , 睇到Youtube某段片 , 

講到D車在雪地好似冇Brake咁跣住去 , 想嚇死人咩 ?

所以自己在雪地做番個實驗 , 可以對部車了解多D .

仲有一樣係非常之重要 , 不過甚小人留意 , 就係千祈唔好諗住清理積雪 , 

而直接倒水落個擋風玻璃度 , 我就瀨過兩次野 , 第一次在 "網走" 酒店 , 

諗住淋水落擋風玻璃度清理積雪 , 開頭真係OK呀 , 豈料D水即刻結冰 , 

個擋風玻璃能見度 , 只係得番3份之1 , 果陣真係唔知點算好 ?

又要趕去坐 "破冰船" , 唯有憑住僅餘既視線黎慢慢駕駛 ,

好彩只係5分鐘車程左右 , 長D既話真係死俾你睇 .

之後好彩停車場有陽光 , D冰先至自動消失 .

第二次係油站裡面既 "自助噴水洗車機" 度發生 , 

當時部車污糟辣撻 , 諗住洗洗佢 , 順手洗埋擋風玻璃 , 點知又出事 .

記得當時天都幾近黑齊 , 能見度比上次更低 , 

在 "阿寒湖" 果頭搵緊酒店位置 , 車程係好短 ,

不過又要搵酒店位置同埋泊位 , 都驚隊到人地部車 , 好彩冇事 .

就係(下圖)呢D自助洗車機 , 入200Yen落去 ,

按掣後用高壓水鎗自己盡情清洗車 , 好過癮架 .

大約出水兩分鐘左右 , 唔夠乾淨就再入過 , 我果次用600Yen , 

洗了3次先至可以將黐在車轆附近既冰全部清除 , 

不過好快又污糟辣撻番晒 . XD

所以千祈唔好淋水落個擋風玻璃度呀 , 真係會即刻結冰 . 

另外之前講直路可以開快小小 , 不過亦不能太快 ,

果度並唔係冇黃管任你飛車 , 某D地方有影快相 , 

咁又唔駛咁驚 , 佢地明刀明鎗話俾你知影快相 , 

好小偷襲既 , 放心 .

見到呢個標誌 , 自己識得做野啦 .

真係有部相機 , 快D收油啦 .  ^_^ !!

差D唔記得有樣野 , 就係太陽眼鏡 , 未出發之前 , 

我問Blog友駛唔駛帶埋太陽眼鏡去 ? 佢答有需要架 .

(為事前我都唔知帶唔帶) 好彩有帶咋 , 因為中午時份烈陽普照 ,

在白雪反射之下 , 更加殘眼 , 一陣都難頂 , 

若然駕駛3幾個鐘車 , 真係對眼都唔駛要咯 .

Ada & Man San 你救番我對眼呀 , 多謝晒 . haha ...

以下呢幾味 , 就算唔係自駕遊都要留意 , 就係果度勁乾燥 , 

記得帶多幾塊面膜同埋Cream去搽 , 只係去幾日 , 對手都 "鞋烚烚" , 

記得有幾多帶幾多去 , 用唔晒好過唔夠用 .  ^^

仲有係耳罩 & 手襪 , 如果 "香港" 冇就去到都要買 , 

在戶外地方 , 一陣就冇所謂 , 若然長時間 , 最快頂唔順就係對耳同雙手 , 

有次在 "美幌峠" 果度刮起大風 , 吹到我對耳同對手殭硬 , 要好耐至復原 .

還有係小心地滑 , 今次行程我見好多人滑倒 , 強如我都仆過幾次街 , 

有次在 "宗谷岬" 附近就最甘 , 諗住唔跌唔跌 , 最終都係跌 , 

望到隻手紅色既 ? 原來流緊血 , 好彩有帶藥水膠布 , 

不過傷口好快就自動癒合 . (明珠台 Heroes ?) haha ...

經驗之談就講住咁多先 , 祝大家玩得開心D , 

事事順利 , 無風無浪 , 有一個愉快既旅程 .

Bye Bye !

經驗之談完 .

2011北海道10天雪地自駕遊(修訂版)雪地自駕遊經驗之談篇A

Hello !

未開始正式遊記前 , 我諗有必要黎番篇 "經驗之談" .

皆因可能有Blog友即將出發 "北海道" , 並且係首次雪地自駕遊 , 

希望憑住我小小經驗 , 可以幫助到大家有定個心理準備 . 

(實際情況就要自己執生)

首先講今次行程 , 安排上確係有D失誤 , 

第一日取車就要直踩上 "稚內" , 呢程車都咪話唔惡哽 , 車速方面 , 

如果長時間維持50至70km左右既話 ,恐怕都去唔到幾多個景點 .

而今次係我首次 "雪地自駕遊" , 所以選車方面都要格外留神 , 

唔係話其他車唔得 , 不過今次呢部 RAV4 , 俾到我好大信心 ,

因為佢個車轆比普通私家車高及闊 , 行車時夠晒穩定 , 

至於突爆果方面 , 亦比上次租既 Axio 更勁 .

車身比普通私家車高D .

呢款車適合我呢類雪駕新手 .

  

我個人認為 , 如果係大直路兼四野冇車既話 ,

車速可以快小小 , 不過講到轉灣 , 就真係要收油 ,

仲有一樣唔講得笑 , 就係同前車保持距離 , 預鬆多D煞車空間 , 

試過有次在 "紋別海豹公園" 附近 , 當時係全白色雪地 , (類似上面果兩張相咁)

前面路口有部車停燈位 , 我後面趕上 , 因為預唔夠煞車距離 , 

差唔多到訂時先至發覺差小小停唔切 , 即使踩死個 Brake 都冇用 , 

(真係會發出轟 ~ 轟 ~ 轟聲 , 佢話係ABS發揮作用喎) 

眼看要 Kiss 前車車尾之際 , 慶幸隔離線冇車到咋 , 

唯有將個車頭扭向右手邊 , 避免同佢相撞 , 

結果要凸出多兩尺先停得晒 , 若然真係隊落人地車尾度 , 

就算冇受傷都夠麻煩啦 .  =_= !!

所以嫌煩都要講多句 , 真係要預留多D距離黎收油煞車呀 .

仲有既就係如果個人夠冷靜既話 , 用波棍黎減速都係一個唔錯既方法 ,

即係話由 "D波" 拍向右邊 "M波" 果度 , 同埋轉落最低既 "1波" , 

的確係可以好有效咁將部車好快咁拖慢 , 仲要係踩油都唔多去果隻 , 

不過可能會傷部車 , 所以如非必要 , 都係用番收油拖Brake好D ,

更何況兵慌馬亂之際 , 邊有咁冷靜丫 , 我就冇咁好身手 .

M波都分1至5 , 不過未必部部車都有 , 自己隨機應變啦 .

最後輪到講天氣 , 今次行程好彩未遇過暴風雪 , 

小小落雪就試過 , 見過Blog友D相 , 個天黑蚊蚊兼大風雪 ,

能見度極之低 , 咁樣真係唔知點算好 , 停低部車又唔知等到幾時 ?

夾硬開車又驚睇唔到路 , 真係兩難 , 好彩冇遇到 .  ^^

仲有出發前聽人講果度好快天黑 , 原來真係 .

大約P.M.4:00開始黃昏 , P.M.5:15就黑齊 ,

有幾次我要焗住開夜車 , 如果係市區都冇乜太大所謂 ,

試過有次由 "砂湯" 去 "川湯溫泉街" 酒店 , 

沿途全無街燈 , 只係靠個車頭燈 , 都咪話唔驚 .

好彩大約15分鐘車程就到 .

Bye Bye !

仲有篇B