2014北海道11天自駕遊 (優先處理篇之Prius)

Hello !

返左黎香港復工兩日 , 一如之前所料 , 

所有思鄉情緒復原不特止 , 反過黎懷念在日本既時刻添 . 

我要去酒店食早餐 ~ 晚餐 ~ 浸溫泉 ~ Prius 呀 ... haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講開 Prius , 好似好多 Blog友好感興趣喎 , 

所以同上次 AQUA一樣 , 黎番個優先處理篇 , 

等有 Heart 租呢款車既 Blog友可以先睹為快 .  ^^

好 ~ 即刻就去片 , 呢輯相係在尾二果日所住既酒店 :

HOTEL MOUNT RACEY 出面停車場拍攝 , 相片排名不分先後 . 

首先黎個車尾全景 .

車頭側面 .

車頭燈棍仔 .

車尾箱 . (幾件行李都放得落)

軑盤 .

左邊倒後鏡 .

右邊倒後鏡 .

Power . (踩住Brake一按就著車)

札幌302  わ . 5 01

HYBRID SYNERGY DRIVE .

PRIUS .

車窗控制 .

放飲品位置 .

有兩個位 , 可以放兩支飲品 .  ^^

倒後鏡 & Carcam .

Carcam 插頭 , 起初搵唔到呢個位 , 

要兜返部車去 Toyota 問佢先至響呢度 , 

唔知可唔可以列入 "蝦碌事件" 呢 ?

GPS & 冷氣板面 . (中午唔開冷氣真係會死人架)

古靈精怪波棍 . (熄匙會自動跳去P波)

油蓋掣 .

拉起就係咁喇 .

換軑架生 , 士啤軑在下面 . 

(希望大家唔會咁唔好彩用得著啦)

死火燈 .

轆軨 . (呢款係咪合金軨 ?)

車轆 . (坑紋好深)

車頭燈 . (好有型)

另一邊車尾 .

另一邊車頭 .

側面 .

ETC咭插位 .

坐位調較 .

擋風玻璃 & 水撥 .

司機位情況 .

左邊望過去 .

乘客位望向出面 .

最後就係乘客位 , 我都未入過去坐 , 

不過望落好似好窄咁 , 相信唔多舒適 .  >_< !!

OK ~ 介紹住咁多先 .

Bye Bye !

P.S. : 仲有呢張最重要 , 差D唔記得 ,

見唔見到左手邊既腳踏 , 並非極力子 , 而且手掣 , 

呢款車係用腳踏當手掣 , 我呢類用慣傳統手掣既人 , 認真唔慣 .

蝦碌事件之一亦係經常忘記鬆呢個腳掣就想開車 . 

再 P.S. : 日前應承左 Blog友 : Johnson young , 

話補充番條車匙既相 , 之後冇左件事 , 唔好意思 .

今日終於記得番 , 即刻 Post 上去 .

好簡單既一條車匙 , 只得兩個掣 , 開鎖基本上唔駛用 , 

只要行埋車門一開就OK . (只限司機位)

背面乜野冇 , 只得 Toyota 標誌 .

2014北海道11天自駕遊(優先處理篇之捉快車)

Hello !

好似好多Blog友都對捉快車好感興趣 , 

既然係咁既話 , 不如優先處理左佢先咯 .

不過由於我得一個人 , 所以冇影到相 , 一切只憑口述 .

~~~~~~~~~~~~~~~~~~~~~~~~~~~~~~~~~~~~~~~~~~~~~~

其實未出發之前 , 已經聽聞 "富良野" 果頭好多捉快車 , 

但係今次事發地點並非 "富良野" , 而係由 "旭川" 去 "層雲峽" 途中發生 .

話說當日遊覽完 "旭山動物園" 之後 , 本來想去附近既 "拉麵村" , 

不過當日可能大安旨意得滯 , 總之就資料搜集不足 , 

見到既竟然係爛地一片 , (其實就在附近 , 今日再上Google地圖先知)

心中有氣之下 , 諗住直接往 "層雲峽溫泉區" .

一路向前行 , 其實我都算醒目架喇 , 見到前面第四部車係警車 , 

特登等佢轉向右手邊行 , 我先至加速直去 , 豈料有另一部警車 ,

停泊在我左手邊 , 到我經過時見到已經太遲 , 

最後望到既咪錶數目係 75km , 之後再望一望倒後鏡 , 

果然有部警車出黎 , 其間佢既無響號 , 亦冇嗌咪 , 只係吊住我尾 ,

既然自己身有屎 , 亦都知道佢既來意 , 倒不如自己停埋一邊 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

停埋一邊之後 , 佢亦緊隨我車尾停泊 , 攪低車窗後 , 

見到一名警員行過黎 , 個樣似足 "明珠台" 劇集 Heroes 裡面既 中村廣雄 .

佢先講一堆日文 , 雖然唔識聽 , 不過睇得電影多 , 都知道係果D :

熄匙 ~ 車牌 ~ 身份証之類既對白 . 

跟手俾左個 Passport 佢睇 , 佢再講一堆日文 , 不過唔識聽 , 

我諗佢想要國際牌掛 ? 但係個牌放在行李裡面 , 

於是落車去車尾箱度拎俾佢睇 , 佢兩樣都睇完之後 , 

用英語問我係黎做生意還是旅行 , 我答黎旅行 . 

跟住問我下一站去邊度 ?

(層雲峽日文點樣講 , 我都唔識 ? ) 於是寫俾佢睇 .

最後佢講 : Speed Down !

我話 : OK !

就係咁就攪掂 , 其間佢都相當 NICE , 

我關上尾箱時夾住條行李帶 , 佢都有提聲叫小心 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如是者就係咁樣 , 大家分道揚鑣 , 之後既行程 , 畢竟有些小陰影 , 

即使超速都唔敢超得太盡 .

另外我發現左一個方法 , 或者可以減低被捉快車機會 ,

就係在有民居既地方 , 可能會有警車停泊在左右 , 

果D地方就要小心 , 之但係上到四野無人既山路 , 

車速就可以稍為提升 , 話時話 ~ 去到尾段由 "桂澤湖" 過 "夕張" 果邊 , 

我又再次慘敗於當地車手 , 一經俾佢過頭就完全跟唔到佢尾 , 

俾佢一放絕塵 , 輸得相當難睇 .  >_< !!

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

P.S. : 以上減低被捉快車方法只係理論 , 

如果咁唔好彩超速時斷正 , 千祈唔好話我教架 . haha ...

2014北海道11天自駕遊 ~ 序

Hello !

今朝落樓下買早餐時 , 見到管理員可以講 "早晨" , 

唔駛再講 おはよう ございます . 感覺很好 ~ 

覺得有個地方可以講自己既語言 , 睇自己既文字 , 真係唔錯 .

不過呢種感覺只能維持到開工前 , 一旦開工既話 , 

又變番懷念在 "日本" 浸溫泉 & 晚晚勁食及勁飲 . haha ...

食早餐 , 歎報紙 , 正 !!

講番今次行程 , 在編排上確實係有小小失誤 , 

富良野 果邊 , 應該俾多小小日數 , 咁就唔駛咁趕行程 , 

不過唔緊要啦 , 大部份預算景點都攪得掂 , 只有10%落空 , 

叫做合格啦 , 如果真係要為今次行程俾分既話 , 

我只係俾74分左右 , 扣分在邊度呢 ? 咪就係見到太多團體囉 , 

食飯時打衝鋒不特止 , 兼且大聲講大聲笑 , 咁又唔係怪佢地既 , 

跟團係應該開開心心 , 只係自己在唔應該出現既地方出現唶 .  >_< !!

另外在景點度影相都要打崩頭 , 呢樣在以往行程裡都比較小見 .

之前多數去既地方都係鬼影都冇隻 , 今次周時見到 "賓墟" 咁既場面 .

所以相片裡經常出現其他人 , 如果等佢散晒先影相 , 真係有排等 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而今次行程裡面 , 經歷過好幾單之前自駕遊從未遇到既體驗 .

首先係被警察捉快車 , 與及車頭佈滿昆蟲屍體啦 , 仲有昆蟲飛入車影響駕駛 ,

千祈唔好睇小佢呀 , 話說有日在高速公路途中 , 突然頸裡一痕 ,

一摸落去原來有隻昆蟲 , 捉住佢之後點呢 ? 總唔能夠拎住佢黎駕駛 ,

仲有漫漫長路要行 , 而在高速裡又要高度集中 , 唯有慢慢單手渣軑 , 

用另一隻手餘下既手指開窗 , (其他手指夾住隻昆蟲)

好唔容易先掟到佢出車外 , 呢種經驗都幾牙煙 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外仲想講既係原先明年咪話想租 86棍波車既 ~ 

呢樣真係要重新評估 , 因為今次自動波車都渣到我對腳好攰 , 

又行得山多 , 試過有次上 "雙瀑台" , 行到賣老抽 . haha ...

所以真係要再考慮 , 不過仲有大把時間選擇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後係講天氣 , 幸運地行程當中絕大部份時間都係好天 ,

中午時直情曬到爆 , 落雨只係試過兩三次 , 雖知行程中落雨 , 

真係好掃興架 , 落唔落車影相呢 ? 拎唔拎遮呢 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

序就講住咁多先啦 , 正式行程既話 , 我諗隔日上黎比較穩陣D , 

好多相片 & 影片要執過佢 , 最重要係立即 Copy 落硬碟度 , 

試過上次刪除左SD咭事件之後 , 真係怕怕 . 

Bye Bye !

P.S. : 雖然回應方面比較麻煩 , 亦希望大家有時間留番個言 ,

當然垃圾留言除外啦 , 有大家既支持先有心機寫落去嘛 .  ^^