Hello !
上回講到在機場渡過漫漫長夜 , 終於見到黎明 .
06:11 有番D聲氣 , 係時候洗個面 ~ 刷個牙 , 食番個早餐 .
早餐到 .
有D人仲未瞓醒 .
搭番接駁巴士去T2 .
去到Peach櫃檯 , 空空如也 , 尚未開工 .
順便講埋 , T2呢邊既Peach , 淨係做國內線 ,
國際線要過隔離果座 , 1月28日剛剛開始 .
Check下個降雪預報 , 全部藍色 , 咁都冇咁驚 .
攪掂晒寄艙行李及登機手續 , 過到黎呢邊候機室 .
如果有興趣 , 有間店舖可以行下 .
跟住捱多個零鐘機程 , 在新千歲機場降落 ,
取回行李之後 , 即刻往租車公司方向行 , 去到果度 , 好似轉左位置咁喎 ,
交張Book車A4紙俾佢 , 順便俾埋護照及國際牌 , 起初佢話冇喎 ...
唔係嘛 ~ 咪玩野喎 , 原來佢本簿登記既係我日文拼音 , 所以混淆左 ,
跟住佢俾個號碼牌我 , 叫我在對面等接駁巴士 , 呢個手續都熟晒路咯 .
呢部就係接駁巴士喇 , 行一段比想像中長既路 , 到達租車公司 .
又係一連串租車手續 , 包括影印國際牌 & 護照 , 講解唔好超速 ,
唔好違例泊車 , 唔好醉駕之類 , 仲有 ~ 記得入番油至還車 ,
最後 , 當然係信用咭簽名 , 攪掂晒之後就出去Check車 ,
繞場一周記錄低有乜花痕之後 , GPS都唔駛教喇 , 經過咁多次租車 ,
萬變都不離其宗 , 只要搵到電話輸入同埋Mapcode輸入就OK ,
雖然年年都如是 , 不過都要講解下 , 就係隔左一年冇坐司機位 ,
一上車各方面都好唔適應 , 包括 : 油門 , 軑位 , 煞掣 ... 樣樣都騰晒雞咁 ,
幸好好快就適應番 , 另外有樣亦係不得不提 , 就係今次訂機票 ,
有小小失誤 , 應該就訂 08:05 果班內陸機 , 點知就訂左 10:20 果班 ,
結果就係晏上加晏 , 出車時已經係 13:15 , 就算邊度都唔去即往旅館 ,
都要足足3個小時車 , 而且仲要雪駕 , 咁耐冇揸車 , 又雪駕又趕時間 ,
真係要小心D , 所以第一日就要揸夜車 , 果單 "蝦碌事件" 就在一陣發生 .
新千歲 往 石狩方向行 , 冇耐就上高速公路 , 中途休息站停一停先 .
呢個休息站叫做 : 輪厚
行左大約40分鐘車 , 部車叫做 Mark X , 遲D會有篇詳細報導 .
之前都講過 , 部車好好飛架 , 最重要係快得黎唔多覺 ,
以為係70km , 望下個咪錶 , 原來90km左右 , 呢樣先至唔簡單 .
雖然係雪駕 , 不過馬路冇雪 , 淨係兩旁有雪 , 咁都好D .
(暫時係咁啦 , 遲D度度都係雪) 之前話今次相片小左D ,
因為長程車之餘 , 仲得一個人揸車 , 雪駕又要小心D ,
呢張相都係扭埋一邊影咋 , 其他靚海岸都只能用眼去睇 .
不過久唔久都要襯後面冇車黎 , 影番一兩張 .
出發前以為會好大風雪 , 依家咁樣都OK .
行行重行行 , 黎到呢個叫做 厚田漁港 既地方 .
夕陽無限好 , 卻是近黃昏 .
其實呢度只係一個冷清清既漁港 .
一D人氣都冇 , D人去晒邊度呢 ?
同 MARK X 一齊欣賞日落啦 . ^^
攪掂 ~ 即刻上車趕下場 .
因為又日落左DD , 一旦落晒 , 就要同時間鬥快 .
下一站 : 浜益海浜公園
左中右咁黎介紹啦 , 先黎左邊 .
跟住係中間 .
最後係右邊 .
呢邊好似污雲密佈咁款 .
後面果座係洗手間 , 不過冇幫襯到 , 同佢黎個合照 .
好凍呀 ~ 又要上車 .
跟住經過一個海港 , 停低順便影幾張 .
今程都見好多呢類海港 , 另外仲有D奇岩怪石 ,
好多都冇停車位 , 只能夠用眼黎睇 .
現場D海浪聲好勁架 .
仲好多垃圾添 . haha ...
成個地下都係雪 , 唔講唔知 , 今次都跣過幾次呔 , 不過唔算好嚴重 ,
仲係在控制之內 , 駛唔駛整番篇 跣呔篇 呢 ?
呢張相既時間係 17:03 , 仲有成粒鐘先至到旅館 .
都要開番盞車頭燈 , 唔開真係唔掂呀 .
呢篇講住咁多先 , 聽晚見 .
Bye Bye !
