Hello !
上回講到離開 "冰海展望塔" , 準備前往 "網走" 方向 .
行了無耐 , 去到一個燈位路口 , 前面有部 Van仔在等轉燈 ,
去到差唔多要停之際 , 先至發覺停車距離唔夠 ,
即使踩煞掣踩到轟 ~ 轟 ~ 轟 ~ 都停唔得切 , 自忖必死之際 ,
(當時只係剩番些小動力 , 即使撞到都唔會有死傷)
果個時候好似突然停頓咁樣 , 心諗 : 唔通我一世英明 ,
今日要栽在呢度 ? 唔好呀 ~ 就在果一剎那 , 忽然人急智生 ,
見到隔離右線冇車 , 不如扭去隔離咪唔駛隊埋去囉 ,
隨即扭軑過去 , 結果凸出多兩尺先至夠位煞停部車 , 真係險到爆呀 .
路多車小呢個亦係我喜愛 "北海道" 既原因之一 ,
因為如果隔離線有對頭車既話 , 咁就真係玩完 !
大吉利是講句 , 若果真係撞車 , 言語不通之下 , 真係唔知點解決 ?
賠錢都事小 , 俾人怪責事大 , 因為掉番轉係我停燈位 ,
後面有車隊埋黎 , 即使好似我咁好修養 , 都會落車鬧爆佢 . ^^
驚魂甫定之後 , 檢討點解會發生呢件事 , 思前想後之下 ,
原來由我第一日取車至到依家 , 都甚小行呢D厚底白雪路 ,
唔係黑色地下兼大直路 , 就係四圍都冇車 , 所以今次先掉以輕心 .
在 "香港" 成日講預留多D空間煞車 , 都係紙上談兵 ,
黎到試過要幾多空間先煞得停部車 , 先至係實戰 .
下圖並非事發地點 , 出事果陣都嚇到標冷汗 ,
邊得閒影相 , 所以冇相參考 .
由 "紋別" 去 "網走" , Google 地圖果度睇 ,
只係得一寸 , 原來行起車上黎 , 都幾遠喎 .
去到一個 "道の駅" , 停車休息一陣先 .
"道の駅" 叫做 かみゆうべつ温泉チューリップの湯
呢度真係有溫泉浸架 ~ 利害 !
買張 "入浴券" , 入去浸番Part先 .
講笑咋 , 仲要趕路 , 今晚返酒店先浸餐飽過佢啦 .
蓋番個章都仲有時間既 . ^^
攪掂 , 走得 .
再行多一陣 , 又一個 "道の駅" , 隔離有個遊樂場 .
呢個 "道の駅" 叫做 愛ランド湧別 .
好多零食賣 .
一齊參觀選購 .
不過只係齋睇唔買 , 攪攪震 , 冇幫襯 . ^_^ !!
離開後繼續行 , 去到一個影相位停低 .
呢度應該係一個湖 , 不過結晒冰 , 好荒蕪 .
仲好凍添 .
之後好大段路程 , 都係咁既模樣 ,
經過剛才一事 , 車速都唔敢咁太快 .
一有凹位就停低影相 .
不過都冇乜景觀可言 , 只係一片雪地 .
仲有部污糟貨車停泊 . haha ...
如果資料冇錯 , 呢度應該係 サロマ湖 .
Bye Bye !
沒有留言:
發佈留言
歡迎光臨 , 如果時間許可 , 請留番個言丫 ~