2012北海道10天霧地自駕遊(修訂版)D5-16相機驚險事篇

Hello !

上回講到在 霧多布温泉ゆうゆ 浸溫泉 , 呢篇繼續 .

在果度玩了兩粒幾鐘先捨得走 , 果陣都諗住往民宿 ,

不過呢度距離民宿只不過15分鐘車程 , 橫掂唔係幾遠 ,

不如去埋呢個景點 , 聽日就可以慳番D時間 , 點知咁就出事 .

~~~~~~~~~~~~~~~~~~~~~~~~~~~~~~~~~~~~~~~~~~~~

講番出事地點 , 叫做 : 霧多布濕原中心 .

話說果陣好快就到達 , 循例咁四圍影相 , 影到冇幾耐 , 

過對面馬路 "步道" 繼續 , 冷不提防腳下木板地好跣 , 

一不小心失去平衡跌到攤攤腰 , 情況似足當日 "宗谷岬" 咁 .

本來跌一跌個人就冇乜事 , 頂多件外套污糟左小小 ,

弊就弊在連部相機都跌埋落地 , 仲係開緊鏡頭備用果隻 , 

咁就大件事咯 , 起身第一時間檢查部相機 , 個Mon漆黑一片之餘 ,

鏡頭仲縮唔番入去 , 即使按下ON/OFF掣 , 都只係郁一郁就停左 .

果刻心諗 : 慘 ~ 呢一跌都甘咯 , 部相機打柴 , 咁之後行程點算 ? 

雖然我有士啤相機 , 不過質素差好遠 , 兼且心情必定大受影響 , 

(大霧已經夠影響 , 仲要加多二錢)  真係想喊出黎呀 . >_< !!

之後再 Check 部相機 , 既然熄左機個鏡頭都縮唔番入去 ,

不如就 "監粗黎" 質番佢入去啦 , 咦 ! 又駛得喎 , 

個鏡頭真係縮番入去 , 再開機又伸番出黎 , 好似好正常咁 , 

但係個 Mon 依然冇畫面 , 無計可施之下 , 求其都影張相啦 , 

奇跡地個 Mon 有畫面出現番 , 按一按快門又消失番 , 

唔係嘛 ~ 咁都得 ? 咁就要試真佢 .

於是乎按右手邊最落海果個 DISP. 一按就出番晒畫面回復正常 , 

真係險過剃頭 , 噓 ~ 真係好彩呀 , 如果認定左佢係壞機而收埋佢 , 

拎部士啤機黎完成餘下旅程 , 番到 "香港" 先知冇事 , 

咁就真係喊得一句句 . 

打後既行程可以繼續用番部 G10 , 正 !

Bye Bye !