2014/11/24

2014北海道11天自駕遊D11-2 夕張PA




Hello ! 


上回講到食完個早餐之後 , 上房執齊野 , 準備出發 .

酒店錢尋日Check in 時已經俾左 , 落到去只係交鎖匙同埋拎收據就OK .

話時話 ~ 有部份酒店要求Check in時俾埋錢 , 有D就走果陣先俾 ,

不過絕大部份都係後者 , 要俾錢先既大約佔一成左右 .

兩樣都冇所謂啦 , 反正都係俾 , 遲俾早俾都冇問題 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

攪掂晒所有手續正在出發途中 , 本來係輕輕鬆鬆既行程 , 

中途又攪單刺激野我歎 , 真係俾佢嚇親 . (應該話俾我嚇親)

話說諗住上高速過千歲果頭 , 過左ETC閘口 , 有個分叉路口 .

左邊係 帶廣 , 右邊係 札幌 / 苫小牧 , 正路就梗係行右邊 , 

不過當時只留意到 苫小牧 , 好似唔啱喎 , 結果糊裡糊塗地行 帶廣 果邊 , 

咁就出事喇 , 聽人講 札幌 去 帶廣 要3粒鐘 , 就算呢度係 夕張 , 

減半都要粒半鐘 , 一來一回咪3粒鐘 , 到時唔好話 千歲三文魚館 冇得去 , 

就連航班亦都未必趕得上 , 還記得當時真係有D心寒 , 不知點算好 ?

只係不斷向前行 . (高速冇得掉頭) 好彩 ~ 行左大約12分鐘 , 

有個叫做 むかわ穂別 既出口 , 於是乎有理冇理都出左去先作打算 .

(如果Miss左呢度 , 下一個出口要去到 占冠)

中途經過 穂別ダム , 不過都冇乜心情欣賞佢 , 只想快D重行正軌 , 

皆因當時油缸存量得番好小 , 想盡快搵到油站入油 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

行番正常方向 , 驚魂甫定之後 , 去到一個叫做 : 夕張PA 既地方 , 

停一停 , 抖一抖 , 回一回氣 . (俾佢攪一攪 , 磨左我半粒鐘)


軟雪糕OK嘛 ? 食完早餐仲有D飽 , 唔食咯 .


夕張PA


去一去洗手間 .


呢度仲係IC範圍 , 有D高速公路資料 .


MAIL BOX . (係咪真係可以寄信 ? )


攪掂上車繼續行程 , 個位泊到衰衰咁 , 可想而知當時既心情 .

(後面果部車都係白色Prius , 混能車市場滲透率極之高)


跟手駛過小小 , 有個油站 .

有樣又係唔講唔知 , 高速公路附設既油站 , 油價比一般街道貴DD .


之前好似講過 , 電油味好哽 , 不准吸煙絕對有理由 .


呢張相做左版面 .


果陣只係入左2000Yen油 , 因為仲要行多一段路先到 千歲 .

如果依家入滿既話 , 好似唔多公道 , 都係臨還車前先入滿佢 .


經過一輪火拼 , 最後終於到達 千歲三文魚館 .

呢度亦係一個 道の駅 , 叫做 : サーモンパーク千歳 .


而三文魚館就叫做 : 千歳サケのふるさと館 .


下篇入場參觀 . 

Bye Bye !

26 則留言:

  1. 冇開GPS? GPS冇顯示轉左定轉右?

    回覆刪除
    回覆
    1. 應該有既 , 不過當時神推鬼摃咁 , 好難解釋 . >_< !!

      刪除
    2. 好多時個GPS指示唔清晰,一到IC出口位就出事,
      上次九州之旅都焦左一次,本應去鹿兒島,搞到行左回頭路,
      好彩中途有出口,唔係都唔知點算好
      不過咁樣搞一搞,浪費左成粒半鐘

      刪除
    3. Fung Mandy : 係架 , 有時陰陰濕濕咁又中招 , 好彩最後可以撥亂反正 .
      你浪費左粒半鐘 , 都好影響行程下喎 . 大家都小心D啦 . ^_^ !!

      刪除
  2. 我去本州全部都係check in 時比錢,但到左北海道除左商務全部都係走先比錢。

    回覆刪除
    回覆
    1. 正常係走先俾錢既 , 起碼十間有九間半都係 . (淨係講北海道 , 其他唔知)
      不過各處鄉村各處例 , 冇所謂啦 . ^^

      刪除
    2. 如果住民宿就一定收左錢先,仲要收cash

      刪除
    3. 唔通 北海道 興走果陣先俾錢 ? 即使係民宿都係後數 .
      不過我只係住過一次民宿唶 , 不可作準 .
      呢方面 , 3J家庭 經驗多好多 . ^^

      刪除
    4. 温泉宿一般check out俾錢,民宿/商務就prepaid,無乜變過。

      刪除
    5. 我係知床同美瑛民宿都係check out先俾錢架

      刪除
    6. コーさん : 大集團就冇所謂 , 若然小本經營俾人走數 , 唔通搵國際刑警黎通輯佢咩 ?
      就算捉到 , 又要引渡返日本受審 , 咁鬼煩 ~ 所以相金先惠都好正常 . ^^

      刪除
    7. Maggie, Kaykie : 大家講個信字 , 唔會咁衰格既 . ^_^ !!

      刪除
  3. 一直冇留意高速公路油站貴啲,不過貪就腳。算啦,豪俾佢 XD

    回覆刪除
    回覆
    1. 可能佢覺得入得黎都係焗住 , 就好似便利店貴過超市咁解 . =_= !!

      刪除
    2. 自己唔識煮嘛 ? 有D錢唔慳得既 . XD

      刪除
    3. 唔係呃你, 今年我又試過, 好容易.

      刪除
    4. 最後入果次就係去到自助式 , 時間又唔夠 .
      好彩佢有人 , 叫佢幫手攪掂 , 費時自己煩 . ^_^ !!

      刪除
    5. 收貴D有原因架
      比出面油站服務多DD
      抹車範圍大D,又抹得乾淨D

      刪除
    6. 哦 ~ 原來如此 , 咁就貴得有道理 . ^^
      香港入油有冇抹玻璃呢Part ? 我就冇車 , 所以唔知 ?

      刪除
    7. 貝殼果間好多時都有
      埃掃就無

      刪除
    8. 仲以為香港一定冇呢著添 , 真係估佢唔到 . XD

      刪除
    9. 宜家我老公會去搵セルフ (self) 油站,再平D...XD

      刪除
    10. 3J 家庭 : 仲有得平 ? 果然精打細算 , 佩服 !!

      刪除
  4. 真係唔覺得無油, 點算呢?

    回覆刪除
    回覆
    1. 我個人認為 , 就算個油錶真係冇晒油 , 裡面應該仲有D儲備 , 唔會真係話冇就冇 .
      在日本 (其他地方唔知) 相信都唔會幾個鐘都搵唔到間油站 ,
      大吉利是真係用到山窮水盡 , 唯有搵人幫拖 , 不過機會好微 . =_= !!

      刪除

歡迎光臨 , 如果時間許可 , 請留番個言丫 ~