2016/08/11

2016北海道雪駕遊D11-9完 帶住遺憾回港篇




Hello !


上回講到 參觀完 天王寺動物園 , 趕緊往下一站 ...


不過仲有DD時間 , 捉緊每一刻時間盡量睇多D野 . 

經過一間鱆魚燒 , 唔講唔知 ~ 大阪 呢邊既鱆魚燒店 , 

比起 北海道 多好多 , 幾乎每條街都有一間 . (咁就誇左D)


又一間 ~ 個招牌夠大未 ? 勁呀 !


右邊係 鱆魚燒 , 左邊果劈係乜野黎呢 ?


兩旁都好多野賣 , 真係有排行架 .


橫街都整番個 愛情鎖 , 咁樣排法又幾特別喎 .


仲有日式象棋 , 不過完全唔明玩法 .


終於都黎到佢樓下 , 再唔入場就浸得唔夠盡興 .

呢度有停車場 , 就算自駕遊黎都有位擺車 .


除左地庫及一樓係停車場之外 , 

其他地方都係溫泉範圍 , 認真誇張到爆 .


上去咯 .


一入去 , 又係俾錢買飛入場果隻 , 入場基本收費 , 大人1200Yen .

交飛俾佢果陣 , 佢會俾兩條手帶你 , 一條要黎內部消費 , 另一條就係Rocker , 

 裡面消費唔駛俾現金 , (自助售賣機除外) 出黎先計數 .

呢排係鞋櫃 , 冇分男女 , 邊個格有位都擺得 .


上到去就唔同 , 除左食堂之外 , 浴池及更衣處都唔可以影相 .


呢度係食堂既其中一間拉麵店 , 一陣會幫襯佢 .


裡面都係食堂範圍 , 好多唔同種類食物供應 .


下面係大堂入口處 , 即係收飛位 .


好多個樓層 , 玩一日都未必玩得晒 .


跟住就去番自己所屬既樓層度浸 , 講過好多次 , 

呢度正式係正到冇朋友 , 係我去過咁多次日本所遇過既至正一間 .

點正法 ? 自己參觀佢網頁啦 .  http://www.spaworld.co.jp/

話時話 ~ 今次真係浸得唔多夠喉 , 回港一星期後再重臨 大阪 , 

果次預足整個下午黎浸 , 報番一箭之仇 . haha ...

呢畢容後再談 , 依家攪掂呢畢先 , 浸到差唔多時候 , 

都要食番D野 , 就去頭先講過果間拉麵店啦 .

坐落第一件事 , 就係拿酒來 , 浸完溫泉飲啤酒 , 確係一絕 .


即刻就飲左半杯咁滯 . Yeah !!


至於拉麵 , 反而變得次要 , 求其一碗就OK .


簡單既 叉燒拉麵 .


撥起件叉燒 , 得果小小麵 , 唔通想用食物黎賺番入場費 ?


食完拉麵休息陣 , 換番衫就要返酒店領回行李出機場 .

由果度行番酒店 , 如果快既話25分鐘左右都OK .

不過 ~ 梗係搭的士方便D啦 , 車費1000Yen .


680Yen 起錶 .


車廂同香港既的士差不多 , 甚至香港既好小小 .

唔知 Uber 有冇進軍 日本 呢 ?


好快就返回酒店 .


拎番件行李向車站方向行 , 唔係呢個站呀 .


係 南海難波駅 .


過埋馬路就係喇 .


南海なんば駅 .


呢個入口 .


時間係 P.M.5:15


氣溫係 13度 , 呢度同 北海道 分別實在太大 , 

呢度T恤加件普通外套都OK , 北海道 就嚴竣好多 .


入到車站 , 搵番飛機標誌既方向 .


上自動樓梯 .


搵到個賣飛位 .


關西空港 17:30


入錢買飛 920Yen .


再睇個水牌 , 9號月台 .


去到月台 , 佢話呢班車係特急 , 即係要補飛 .

補多510Yen , 就係在呢度出事 , 入錢補飛果陣 , 部相機放在篋上 ,

當時部車好似就開就開咁 , 俾佢嚇一嚇 , 拎起個篋就即刻飛奔上車 , 

忘記左部相機放在個篋上面 , 到發現果陣 , 部車已經在行駛中 .

記得果程車連埋果程飛機完全冇晒表情 , 正式係後悔莫及 ,

臨完行程先至唔見相機 , 果種心情 , 直至到依家都仲好
清楚 ,

因為實在太過深刻 , 返到香港後 , 本來已經絕望 , 

不過多得Blog友 Johnson young 再三鼓勵 , 

先至有Heart打電話去日本詢問相機情況 , 否則網誌只能寫到

D7-8 硫黃山果度就完 . 再一次多次呢位 VIP Blog友 . THX

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食住個勢唔好俾佢停 , 聽晚開始寫埋領取相機果三日兩夜既行程 .

Bye Bye !



2 則留言:

  1. 所以預時間一定要充足,太趕會出意外的

    回覆刪除
    回覆
    1. 幾時都係預鬆D好過 , 不過意外既野 , 永遠都係啱啱遇着剛剛 . XD

      刪除

歡迎光臨 , 如果時間許可 , 請留番個言丫 ~