Hello !
上回講到攪掂晒D手續後 , 可以同 "Axio" 一起出發 .
請容許我叉開一陣 , 講講心路歷程先 .
"自駕遊" 呢個話題 , 真係講足三日三夜都講唔完 ,
今次點解會諗到 "自駕遊" 呢 ?
一切就要由上年(2009)9月正式計劃行程果陣講起 , 話說當時選擇路線時 ,
發現 "北海道" 地方委實太大 , 由A點去到B點 , ( 巴士 ~ JR ~ 巴士 ) ,
上屋搬下屋分分鐘唔見成日時間 , 而我今次既行程 , 主打觀光 ,
飲食次要 , Shopping 直情可有可無 . 最後度到條咁樣既行程路線 .
由A至O , 成條 "北海道" 魚尾幾乎行個圈 , 左手邊果度 ,
好小見人去 , 所以冇車既話 , 真係唔知點去 ?
仲有 , 果陣睇完電視 "和味無窮" 及 "日本東北咁過祭" ,
見D主持駕駛部車四圍去 , 認真有型 , 都不知幾咁羨慕佢地 ,
所以自駕遊可以話係不二之選 .
之但係租唔租車 , 又令我腦交戰左好耐 , 皆因我個車牌 ,
晨早就考定 , 對上果次駕車 , 就係考牌果次 ,
至今都有成 6-7個年頭 , 基本上可以話全無路面經驗可言 ,
所以縱然俾部車我 , 都未必夠膽上街行 .
而我亦有諗過 , 好唔好去補鐘呢 ? 不過問過幾間 ,
座底都到要千幾蚊 , 嘩 ~ 食多幾碗拉麵好過啦 ,
最後都係縮沙 , 考天才好過 , 所以話今次係豁去之旅都不為過 .
P.S. : 好彩冇補鐘咋 , 因為由第三日起 , 會有重大突破 , 呢樣容後再談
既然決定租車 , 就要揀幫襯邊間 , 網上都有好幾間租車公司 ,
包括 : ToCoo ~ 樂天 ~ 豐田汽車租賃札幌 ~ 新札幌租車公司等等 ...
我個人比較鍾意 Toyota 既車種系列 , 雖然佢地有好多不利消息 ,
但係對佢始終都有信心 . 再加上出發前睇到 "萬事得" 既不利傳聞 ,
就更加堅定租 Toyota , 而我鍾意直接同佢地接洽 ,
ToCoo 雖然價錢平D , 不過感覺上好似搭上搭 , 所以唔考慮佢咯 ,
"新札幌" 果間明碼實價 , 一於幫襯佢啦 .
另外佢地日文網站裡面既折扣優惠多D , 所以揀日文網站 ,
之後輪到揀乜野車 , 心目中都有幾個決定 .
例如 : Vitz 細細部 , 行出街幾得意 , 通街都見呢款車 .
Ractis 車身比較高 , 後面D坐位可以摺埋 .
bB 四四方方咁 , 外形趣趣怪怪 .
Prius 唔駛多介紹 , 三個字講晒 , 型爆鏡 !
不過最後都係揀 "Axio" , 因為細車始終都擺脫唔到學車時既陰霾 ,
加上幾位Blog友 (piggybread姐 & Matthew) 都租過佢 ,
可以話係夠晒口碑 , 結果果然不負眾望 .
千祈唔好睇佢老老實實咁款 , 都幾辣架 .
經過包裝之後 , 黎過180度大變身 , 當堂唔同睇法 ,
全身充滿辣味 , 參加 Rally大賽都得呀 , Yeah !
(相片借人地既 Thx )
Wow , 掛住講 , 都冇寫到行程添 , 下篇再玩過啦 .
Bye Bye !
