2010北海道10天自駕遊(修訂版)D9-11完(鐵板燒篇)

Hello !

上回講到還車之後 , 向住 "薄野" 方向行 .

沿途經過 "紀伊國屋書店" , 順便入去睇睇 .

呢邊係旅遊書籍 , 北海道呀 .

其實呢度上年都黎過 .

今次舊地重遊 , D書當然唔同晒啦 .

本屋大賞2010第一位 , "天地明察" 講乜野既呢 ?

除書之外 , 隔離仲有DVD . (阿凡達)

天地人 , 同 "東北米澤" 有關 .

北川景子 .

封面有D似 Angelababy 寫真集個樣 .  ^_^ !!

  

有買襯手 , 呢邊俾錢 .

攪掂就繼續行 , 又經過 "道廳" , 上年參觀過 , 唔入去咯 .

一直行到 "鐵塔" , 差唔多到步 .

見到 "摩天輪" , 轉個灣就係 .

就係 "蝦蟹合戰" , 一入去坐低 , 佢就黎招呼 , 

於是乎就叫番上次食果個 3990Yen 長蟹腳任食套餐 ,

點不知佢話一定要兩個人或以上先至得 , 

唔係喎 , 上年都係一個人黎 , 俾下面好喎 .

最後佢都係企硬唔得 , 一個人只可以散叫 ,

好耐未試過俾人咁樣堅拒 , 所謂 : 此地不留人 , 自有留人處 , 

況且我又唔係一定要食蟹 , 咁就一於鬆人 , 去過第二間 .

落到樓下 , 見到呢座野 , 令我諗起Blog友 Shirley姐 , 

好似在呢度食過 "鐵板燒" 喎 .

雖然唔記得邊一間 , 不過相信唔係咁難搵既 .

呢間似模似樣 , 一於入去睇睇 .

  

入去坐低 , 地方黑蚊蚊 , 幾有情調 .  ^^

佢介紹個餐俾我 , OK啦 , 就揀佢 .

之後佢拎舊牛肉出黎俾我睇 , 一場拎到出黎 , 

無謂浪費 , 幾大都影番張相先 .

咁高興 , 一於啤啤佢 .

第一味 , 一粒粒既野出黎煎 .

原來係 "芝士餅" 加沙律 .

之後呢味乜野呢 ? 食完都唔記得添 .  haha ...

Wow ~ 玩火咁激 .

炒小小菜 , 唔駛咁激掛 .

炒芽菜都當一味 ? 唔係嘛 .

主菜到 , 不過可唔可以多DD , 得果幾舊 , 都唔夠攝牙罅 .

食野之前用即影即有相機影相 ,

中途鑲埋落相架度 , 送俾我要黎留念 , 多謝晒喎 .

繼續 , 唔好俾佢停 , "叮噹" 定 "多拉A夢" .

炒碟飯都咁多花臣 , 我鍾意呀 .

中途佢送杯疑似 CHOYA 梅酒俾我飲 , 咦 ~ 幾好飲喎 , 

為左想重拾呢種感覺 , 依家我雪櫃裡面都有樽 CHOYA 梅酒 .

不過要加粒冰溝淡佢先至好飲 , 就咁飲太哽 .

最後再黎多個炒飯 & 湯就完場 .

食飽行番去 "摩天輪" 果邊 .

行過D見到 "東橫Inn" .

行番酒店途中 , 見到 "味之時計台" 拉麵 , 

聽日一於搵佢既 "牛油帶子拉麵" 做午餐 .

接近酒店附近 , 呢間都係租車公司 .

返到酒店 , 今晚冇溫泉浸 , 所以睇完電視就休息 .

Bye Bye !

第九日完 ..

2010北海道10天自駕遊(修訂版)D9-10還車篇

Hello !

上回講到去完果兩個主場參觀 , 

都係時候去埋最後一個景點 , 基本上呢度只係搭單 , 

因為近住還車地點 , 所以順手有照 , 點不知都係失敗收場 .

預計到達時間 P.M.4:40

點解話失敗呢 ? 因為GPS提供上 IC ,

不過行一陣塞一陣 , 每次都 Miss高速公路入口 ,

三幾次之後 , 把幾火唔鬼上高速 , 同佢地玩塞車 .

有二手車賣 .  ^^

磨了一大輪 , 終於都到達 , 擺好部車先 .

呢度叫做 "札幌市下水道科學館" , 

係無意中在網上搵到 , 可能係最後行程 , 所以睇得唔夠詳細 , 

原來呢度話就話 P.M.5:30 收工 , 不過P.M.4:30 就唔俾人入 .

唉 ~ 最後一個景點都要食番碗閉門羹 .

裡面仲有人喎 , 我同佢講 : 千里迢迢黎到呢度 , 

俾個面求其影兩張相當交差好喎 , 咁佢就開門俾我入去 ,

所以真係影得兩張相咁大把 . haha ...

所以好珍貴架 .

算啦 , 人地都熄晒燈 , 無謂強人所難 , 影外面算數 .

最後借佢個停車場黎打點一切 , 

將所有野執得乾乾淨淨 , 千祈唔好有野留低 .

將別秋波 , 同部車影埋最後呢Part相 , 就要到佢講 Bye Bye .

多謝佢呢幾日黎俾我既實習 .

令到我由考完車牌都未掂過車既新手 , 

數日間成為超級高手 . (自己認為咋 . haha ... )

如果有人問我 "北海道自駕遊" 租咩野車好呀 

我會答 :  梗係Axio啦 , Yeah !

影相影全套 , 影埋裡面 .

後排中間位果度 , 有條車軸凸起 , 

如果五個人既話 , 租呢款車就要考慮埋呢點 .

仲有呢份野 , 租車公司話放在車裡面 ,

還車時交番俾佢 , 究竟裡面有D乜 ?

除說明書之外 , 仲有兩張紙 .

呢張係Check車紙 , 圈起有乜花痕 , 夠晒轟真 . 

原來呢部車真正行了 24234公里 .

攪掂晒D手尾 , 可以起程還車 , 首先去入油 .

只需要幾分鐘車程就到 .

見唔見最中心果座 , 就係JR日航酒店 .

只係得番一小格油 , 好彩仲捱得住去油站 , 

9日總共行了 1291.1公里 . (唔知算多定小?)

第三次入油 , 今次最多 5149Yen .

全程總共入過三次油 4119 + 3700 + 5149 = 12968Yen .

講開入油又要叉開一陣 , 有一個辦法可能可以慳番D油 ,

唔知有冇對車有研究既前輩認為如何 ?

在 "北海道" 大部份車程都係一條直路 , 如果行到100km以上 , 

之後鬆油門 , 用佢既衝力行駛 , 等佢降至60-70km 再重新踩油 ,

如此類推既話 , 全程唔知可否慳番些小油呢 ?

不過若然真係想慳油 , 不如租部 Prius仲實際 , 

但係租車價錢又貴番D , 拉上補下咁啦 .

入油中 ...

  

前面就係還車地點 .

駛入去之後 , 交車匙俾個職員 ,

佢都冇乜點 Check部車 , 就入去攪埋D手續 ,

簽個名之後就走得 , 臨行前佢俾張咭片我 ,

話如果日後再租車 , 記得搵番佢喎 , 真係識得做生意 .

放心啦 , 租車呢方面 , 我係 Toyota Fans .

只要有需要 , 一定搵番佢既 .

由於絕大部份既行李都在酒店房度 , 因此可以慢慢行街 , 

唔駛拎住大件行李 , 食埋飯至返去都得 .

做了9日有車階級 , 還車之後 , 知唔知我當時諗緊乜 ?

就係如果下次再黎 , 租邊款車好呢 ? 

咪發夢住呀 , 行程仲未完架 .  ^_^ !!

依家睇睇個地圖 , 去搵有乜好食 ?

Bye Bye !