Hello !
上回講到在 "大湯沼" 果度參觀 , 攪掂後往酒店 .
本來今晚想住 "第一瀧本館" , 但因為佢唔包晚餐而告吹 ,
所以轉投 "登別" 附近果間 , 虎杖浜溫泉ホテルいずみ
由 "登別" 去果度 , 只要短短幾分鐘車程就到達 ,
講開酒店 , 雖然我每間酒店都訂 18:00 到達 ,
不過我都會比原訂時間早半小時到達 , 免得佢地掛心啦 .
呢度就係佢地既正門 , 佢地出面係大塊地 ,
車位不設劃位 , 點泊都得 , 不過當然唔好泊到衰衰咁啦 ,
免得失禮街坊嘛 . 入去 Check in 咯 .
(呢部唔係我架車 , 我部車泊在後面)
拎埋件行李 , 去到櫃檯交張 "樂天" 印出黎既預約紙俾佢 ,
再填張表格 , 裡面係問你叫乜名 ? 住邊度 ? 幾多號電話 ?
大致上係咁啦 . 佢會問你拎本護照黎影印 .
(大吉利是就算你死左 , 佢都可以向你所屬國家查詢 , 啋 ! )
最後問你幾點食晚餐 & 第二朝早餐 , 間間酒店既 Check in 手續都差唔多 ,
我訂果種套餐叫做 "現地決濟" , 即係走果陣先俾錢 ,
攪掂晒手續後 , 佢幫我搬D行李上房 .
今晚住 115號房 .
上篇咪話呢間酒店有驚喜既 , 就係我通常去到D酒店 ,
都會試試開唔開到窗 , (因為開唔到窗會好焗)
唔開就尤自可 , 一開就 ... Wow , 有D正野嚮度 ,
就係佢地 , 聽講有D外國地方既農莊酒店 , 一打開窗有動物 ,
呢間酒店一打開窗就有D貓黎迎賓 , 真係令我喜出望外呀 ,
登時自覺冇訂錯酒店 , 好過 "第一瀧本館" 多多聲呀 .
歡迎 ~ 歡迎 !!
充滿期待既眼神 , 一睇就知想食野啦 .
我都有帶定D乾糧 , 不過唔知貓食唔食餅乾呢 ?
見佢地又想食 , 又唔想食 , 唔多熱衷咁喎 .
早D出聲嘛 , 我就帶定D貓糧黎丫 , haha ...
總數有6隻貓 , 玩到我晚飯都唔想去食 , 呢間酒店真係冇得彈 .
不過飯就始終都要食 , 唯有依依不捨地離開 .
115 號室 , 佢地已經準備好晒 , 等我埋位就食得 .
半隻毛蟹 , 唔錯架 .
起初以為D蝦瓜晒柴 , 原來未死架 , 罪過 .
食飽之後返房 , 佢地已經鋪好張床 , 唔該晒 .
食飽飯冇野做 , 睇陣書先啦 .
之後睇番電視 .
呢間房叫 "和室6疊" , 點睇呀 ?
窗邊有個小露台 .
地下有個小夾萬 .
冇浴缸 , 淨係得個坐廁 .
(不過冇乜所謂 , 浸溫泉果度都會攪掂埋)
夜晚冇乜地方去 , 抖夠之後 , 呢度就係最好既節目 .
浸到甩皮都冇人理你 , 自便啦 .
結果當晚相當盡興 , 之後好快入睡 ,
可能坐完凌晨機 , 實在太疲倦 .
Bye Bye !
第一日完 .
沒有留言:
發佈留言
歡迎光臨 , 如果時間許可 , 請留番個言丫 ~