Hello !
上回講到去到 "有珠山" IC休息站果度 .
而今次呢篇最主要想講駕駛上既心路歷程 , 根據 "錄音筆" 既排列內容 ,
在 "有珠山" 果度 , 我錄過一段說話 , 其中一句係 : "咁樣落去唔係辦法喎" .
其內容大致上係講 , 自從尋日取車之後 , 總算係開得郁部車 ,
但係技術方面就認真麻麻 , 歸納所犯既缺點 , 亦係初學者經常犯既過失 ,
雖則自動波車就好似玩具車咁 , 但若然缺乏路面經驗 , 有時亦難免會慌失失 ,
畢竟都丟低左實在太耐 , 仲要在人生路不熟既情況下 , 更要睇住個GPS ,
尤其係最後者 , 所以有時都會Miss左D入灣路口 .
首先最常見既缺點係 :
1 : 起步慢 , 之後為左追番前車 , 過度踩油 , 點知前面又唔去 ,
結果要勁煞車 , 有好幾次煞到隔離坐位個旅行袋都跌落下面 .
2 : 仲有轉灣大波Out , 同埋轉90度灣時 , 轉到一半 , 部車停嚮度咁滯 ,
又要重新勁踩油 ~ 失敗 !
3 : 行大直路時 , 唔係偏左 , 就係偏右 .
4 : 另外係泊位 , 冇後轆支棍仔 , 真係唔知幾時扭軑 ?
5 : 還有紅綠燈 , 轉燈唔知停唔停 , 結果又係勁煞車 , 不過部車既煞掣 ,
真係好靈敏 , 可以將之前 "豐田" 既不利傳聞 , 全部打破 .
所以去到 "有珠山" PA休息站果度 , 我咁樣同自己講 :
D駕駛技術咁水皮 , 真係鬼肯做乘客咩 ? 寧願走去搭 JR好過啦 .
之後痛定思痛 , 決定黎過 "駕駛技術大改進" .
咁應該點做呢 ? 就係逐樣缺點來針對式訓練 , 反正仲有咁多日 , 唔得試到得為止 .
就係咁 ~ 打後既每一日 , 我既功力都大有進境 ,
何止一日千里 , 直情係以幾何級數黎暴升呀 , haha ...
以下係我練習既心得 , 若然本身係高手 , 可能有D見笑 .
首先第一樣 , 亦都係最重要 , 就係要用個心黎駕駛 ,
為針對勁大油 , 油門方面 , 黎個特訓 , 就係在一段大直路裡 ,
限定自己在一個速度裡面 , 唔可以多 , 亦唔可以小 ,
(暫時唔望個咪錶住 , 隔一陣再望 , 如果接近頭先果個速度 ,
咁樣先叫做有小成 , 若然小小差幅 , 咁樣先至合格)
煞掣都係咁樣 , 練習一種漸進式煞掣 , 絕對唔可以一腳踩死佢 ,
當正自己就係乘客 , 絕對唔可以令自己有一絲坐得唔舒服 ,
到最尾果幾日 , 我對油門 & 煞掣操控既靈敏度 , 可以話得心應手 .
之後呢點都幾重要 , 就係睇遠D , 除非前面係大貨車 ,
否則要留意既車 , 係前面再前面果幾部車 ,
遠處有乜風吹草動 , 都可以即時作出相應行動黎配合 ,
輪到轉90度灣練習 , 入灣時收油 , 側面倒後鏡一到個灣位角 ,
即刻就扭軑 , 入灣大約三份之一 , 就要回軑 , 呢個時候 ,
隻腳要同時踩油 , 否則又會好似停嚮度咁 .
至於行中線 , 我就用個軑盤中間位 , 對住遠處既中間線 ,
咁樣就唔會好似西左出去咁 , 或者行到邊大邊細 .
最後係泊位 , 絕大部份既時候 , 都係左右兩邊都冇車 , 想點泊都得 ,
不過有一個怪現像 , 就係左右兩邊有車既位 , 可能唔想 Hi 到人地部車 ,
所以高度集中 , 一手軑就攪掂 , 而兩邊冇車果D位 ,
反而三五七手軑都泊得唔滿意 , 都咪話唔邪門 .
另外仲有過紅綠燈時 , 設定一個臨界點 , 即係只要過左果度 ,
就算轉燈都要衝埋過去 , 而未到臨界點之前 ,
踩油就留番一手 , 準備隨時停車都唔駛急煞掣 .
仲有小小補充 , 就係爬頭時 , 要預一段絕對肯定冇對頭車既大直路果度進行 ,
首先打燈 ~ 扭軑 , 同佢平排果陣 , 就要踩盡油門 , 過佢之後 ,
打燈入番自己行車線 , 重點係一係唔爬頭 , 一爬就要快 .
到第七日果陣 , 發生一件事 , 令我急如熱鍋上的螞蟻 ,
非要逢車過車不可 , 呢單遲D先講 .
就早幾日搭的士 , 果位司機可能係替工 , 駕駛時煞掣與油門又係唔多配合 ,
坐得我周身唔聚財 , 諗起自己既特訓經歷 , 不禁令我發出會心微笑 .
過左三幾日有小成果陣 , 轉灣果時D學神禁用既反手軑 ,
全部出晒黎 , 將我既反叛性格 , 可以話表露無遺 , 其間仲可以分心聽CD添 ,
第一二日果陣 , 要全神貫注駕駛 , 真係都唔敢拎出黎聽 .
隻CD放嚮呢度 .
倖田來未CD , 暫時係我的至愛 ,
雖然唔算新作 , 不過首首都鍾意聽 . ^_^ !!
CD入口就收埋在GPS後面 .
屬於吸入式設計 , 型呀 !
今次既旅程之所以咁好玩 , 駕駛特訓呢一Part , 都佔好大比重 ,
好彩 "駕駛學院" 收得咁貴 , 如果真係補鐘 ,
咁就未必有今次既痛定思痛特訓 , 傳聞話一經自駕遊之後 ,
好難返番轉頭 , 我依家就係喇 .
仲有D時間可以講其他野 , 果度買既手信 , 好似 : 帶子乾 , 魷魚絲 ,
草餅類 , 白之戀人餅 , 晨早就食晒 , 淨番D朱古力奶 , 由於係私人珍藏 ,
所以能夠捱到依家 , 不過始終都有完既一日 , 呢罐已經係最後一罐 ,
飲埋既話 , 連僅餘既回憶 , 都會冇埋 , 但係點都要飲埋佢 , 就大家一齊分享啦 .
只係飲剩 "啤酒" 一罐 及 "朱古力奶" 一罐咋 .
用呢個 "小樽" 下午茶杯黎飲 , 零舍好味 , 正 !
講番呢個杯 , 真係大有來頭 , 而今次既旅程 , 亦可以稱得上 "復仇之旅" ,
皆因將上次 "北海道" 之行既遺憾 , 全部解決晒 .
包括 : "小樽:" 下午茶 (拎埋隻杯果隻)
"小樽水族館" (上次休館)
"定山溪" 大雪事件 , 仲加遊 "豊平峽" 水庫 ,
好精彩架 , 不過尾段先有得睇 . (預告)
好 ~ 下篇繼續行程 .
Bye Bye !
沒有留言:
發佈留言
歡迎光臨 , 如果時間許可 , 請留番個言丫 ~