2016北海道雪駕遊D3-9 第一單蝦碌事件篇

Hello !

上回講到參觀完 釧路湿原駅 , 正在開車往下一站 ...

而呢篇主要講既係 蝦碌事件 , 唔計最尾果日遺失相機果單 ,

今次全程一共發生過3單蝦碌事件 , 淨係D3呢日都發生左兩單 , 

呢3單野 , 如果處理得好 , 好輕易就擺平 , 但若然處理得唔好 , 

可以好大鑊 , 今程叫做大話夾好彩 , 冇事發生 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

依家先講第一單 , 就要由離開 釧路湿原駅 講起 ...

果陣正要往下一個景點 , 途中突然感到好眼瞓 , 仲係好嚴重果隻 ,

試過開大聲D個 mp3機 , 不過唔多得 , 又試過跟住音樂大聲唱歌 , 

亦都冇乜料到 , 更甚至試過搣大脾 , 通通都冇用 , 仲係好眼瞓喎 .

(依家寫網誌未必感受到當日眼瞓既程度 , 果陣真係好眼瞓架)

於是乎想搵個路壆停一停 , 但係一時之間又冇 , 只係得單程路 , 

後面又有車隊住 , 有時唔駛停就周圍都係路壆 , 就係咁邪 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

捱左一陣終於搵到個路邊凹位 , 於是乎扭埋路邊停一停 , 心諗 : 

係咪真係攰得咁交關呀 , 好丫 ~ 就試下瞌一瞌 , 又睇下係咪真係瞓得著 ?

跟住合理雙眼放鬆 , 哈 ~ 真係瞓得著喎 , 記得當時真係入睡左 , 

只不過係好短時間 , 簡單D講即係中一中果隻 , 就係呢中一中出事 , 

因為剛醒來果一剎那 , 意識仍然以為自己在馬路揸緊車剛醒來 ,

即時話 死 ~ 死 ~ 死 !! 希望重新控制番部車 , 回過神來之後 , 

原來係在馬路邊 , 正式係自己嚇自己 , 全個過程可能只係在一兩秒之間 , 

但已經夠嚇得心膽俱裂 , 跟手檢查下自己有乜唔妥 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

發現除左有小小頭痛之外 , 兩邊鼻孔各塞了二份之一 ,

再加上車窗全關 , 極之有可能係氧氣不足 , 因此而勁眼瞓 .

咁點算好呢 ? 在冇辦法之下 , 唯有食番粒 EVE 頭痛藥啦 .

幸運地 ~ 隔一陣就冇晒頭痛之餘 , 打後仲鬼打都冇咁精神 . 

EVE頭痛丸 , 正式係救命神藥呀 . (唔係賣廣告) haha ...

今次旅程都有買番盒補倉 , 經過多次驗証 , 食完唔攰 , 

唔會構成藥駕 , 放心 !

以上既情況 , 希望字裡行間大家會明白我寫乜啦 ?

我文字表達能力始終有限 .  XD

第一單蝦碌事件就擺平左 , 黃昏時候又發生另一單 , 

追睇落去就會知發生乜野事 . 

Bye Bye !