Hello !
上回講到參觀緊道の駅 "元和台229" 展望台 .
而之前所講印象深刻既插曲 , 亦係由呢度開始 .
話說果度 (228 & 229國道) 絕大部份係單線雙程行車 ,
如果中間橙色線 , 即係不准爬頭 , 好似下圖咁有條橙色線 ,
如果車轆轆上去 , 部車會震 , 因為佢係凹凹凸凸 .
而當時最前有一部小型貨車 , 後面有兩部私家車 ,
我排第四 , 排頭位部小型貨車 , 速度比較慢 ,
結果後面出現小型車龍 , 直至到離開橙色線 , 先至可以爬頭 .
果陣我心諗 : 一有機會 , 前面果兩部車一定會爬頭 ,
結果未到可以爬頭地帶 , 部小型貨車經已到步 ,
前面果兩部車果然好似 "脫韁野馬" 咁 , 有咁盡踩咁盡 ,
登時淨得我一架車排頭位 , 年少輕狂的我 , haha ...
又豈要甘心成為馬路上的負擔 , 加上練習了幾日 ,
對公路上最佳行車線都叫做有D眉目 , 所以一踩油就跟住佢地一齊上 ,
而前車們都非常強駻 , 跟住佢地 , 一D都唔容易 ,
轉灣幾乎要使出 "落坑走法" 先至跟得上 . (頭文字D咩 ?)
果一段路玩得非常高興 , 唔知佢地知唔知道我以佢地為假想敵呢 ?
最後結論係 , 未出發之前 , 我都諗住唔好超速 , 就算超速都只係超小小 ,
但原來超速都要講氣氛 , 一齊超速真係好過癮架 ,
大吉利是就算俾人捉到 , 我有作客優惠 , 應該拆得掂掛 ?
最緊要唔好同佢講日文 , 乜都講英文 , 可能可以大走佢 . ^_^ !!
玩了個零鐘 , 都要搵個地方擺低部車休息陣 , 影影相 .
落車伸一伸對腳都要掛 .
呢度係一個石灘 .
仲有舊 "寂寂無名" 既海邊大石 .
冇乜水既 , 唔通潮退 ?
行前D又一舊石 .
果日有D微雨 , 一落雨部車就好易污糟辣撻 .
一粒粒黑點 , 遲D都要洗洗佢 .
行多陣 , 又一個 "道の駅" . (冇乜車 , 點泊都得)
呢個 "道の駅" , 叫做 : てっくいランド大成
喂 ~ 喂 , 有冇人呀 ?
連收銀機都冇人 , 對呢度既治安咁有把握 ?
好彩冇乜野幫襯 , 出番黎睇睇個地圖先 .
講番之後呢段路 , 離開 "道の駅" 之後 , 冇得沿住海邊行 ,
要行中間山路 , 即係下圖果條紅色線 .
果段山路 , 行好耐都唔見一架車 , 包括埋對頭車 ,
果一刻真係唔知去左乜野鬼地方 , 正式係搵隻鬼黎睇都冇 ,
估唔到連馬路都有得包場 , 真係咁都得 ?
而正因為冇得行沿海路 , 所以連 "北海道最西面"
既 "尾花岬" 都冇機會去 , 激死人呀 .
繼續行 , 又見風車山 , 不過冇落車影相 , 尋日都睇夠啦 . ^^
Bye Bye !
沒有留言:
發佈留言
歡迎光臨 , 如果時間許可 , 請留番個言丫 ~