2010北海道10天自駕遊(修訂版)D7-13完(水明閣晚餐篇)

Hello !

上回講到解決GPS危機之後 , 即刻飛車往酒店 .

到達時間係P.M.6:15 , 今次全程每間酒店 , 我都預約P.M.6:00到達 , 

通常會早小小Check in , 免得佢地心掛掛 , 呢間係最後一間自訂酒店 ,

只係遲到小小 , 已經執番身彩 , 如果唔係識得果招 , 真係晚節不保 , 

所謂 : 在家靠父母 , 出外靠Blog友 , 所以千祈唔好睇小Blog友既力量呀 .

言歸正傳 : 去到酒店 , 泊好部車之後 , 拎齊行李入大堂 ,

都未等我拎張 "樂天" 預約A4紙出黎 , 

佢已經問我係咪預約果位 "劉 さま" 呀 ? ( 咁堅 ? )

我答 : 係呀 ...  之後又係攪D入住手續 , 咁就上房稍事休息 , 

一陣就食飯 . 由於中午都冇乜點食過野 , 只係食餵海鷗麵包 ,

所以好鬼肚餓 , 叫佢有咁快得咁快開飯 .晚餐送到入房 , 擺好個陣之後 , 

當堂嘩一聲 , 駛唔駛咁多呀 ? 呢度簡直就係二人份量 , 

縱然我係肚餓 , 不過咁多 , 究竟食唔食得晒呢 ?

循例都要逐味黎介紹 , 牛肉幾片慢慢煎 .

牡丹蝦刺身一隻 .

普通蝦6隻 .

仲有D立立雜雜 , 唔知乜野 ?  XD

蟹鉗一隻 , 熟蝦一隻 .

壽司五件 .

千祈咪睇每樣得小小咁 , 加埋其實好多 .

仲有白飯一大兜 .

例湯一碗 . haha ...

呢舊食完都唔知乜野黎 ?

飯後甜品 , 正 !

最後黎個俯瞰式大合照 .

結果呢一餐 , 認真唔簡單 , 要開住部電視黎撈飯 ,

磨好耐至食得佢晒 , 食完之後隔一陣 , 突然電話響起 ,

弊 ! 就算面對面 , 我都未必知佢講乜 , 更枉論隔住個電話 ,

咁點呢 ? 不過樓下打得上黎 , 通常得兩個問題 .

第一 : 食完飯未呀 , 食完就上黎收碟 .

第二 : 收碟順便鋪埋張床咯 .

結果拎起個電話 , 佢講乜都答 : " はい "  (應該實冇衰既)

果然之後佢上黎收碟 & 鋪床 , Yeah ! 實在太過聰明 . 

睇一陣電視之後 , 忽發奇想 , 不如落樓下洗車 , 當做運動都唔錯喎 , 

即刻就拎條唔要既毛巾同埋裝幾樽水就落去洗車 ,

原來夜媽媽靠D微弱既燈光黎洗車 , 都幾得意喎 . 

(都唔知洗得乾唔乾淨)  ^_^ !!

唔覺唔覺 , 今次既晚餐同埋溫泉 , 係呢程最後一次 , 

打後果兩晚要食自己咯 , 真係要好好咁珍惜佢 , 

幾大浸番夠本呀 . 就係咁 ~ 攪到夜一夜先休息 .

間房既環境聽日先至介紹 , 差D唔記得講間酒店名 , 

呢度叫做 : 水明閣  315號房 .

出發浸溫泉 , 下篇見 .

Bye Bye !

第七日完 .