2012北海道10天霧地自駕遊(修訂版)序

Hello !

奇怪 ! 真係奇怪 , 出門十日之嘛 , 又唔係未試過 , 

何以感覺上好似離開 "香港" 好耐既呢 ? 又會咁既 .

~~~~~~~~~~~~~~~~~~~~~~~~~~~~~~~~~~~~~~~~~~~  

(點都係西式早餐正D , 日式果D酸羌咸菜 , 又點可以比擬)  ^^

言歸正傳 , 籌備經年既 "北海道" 之旅 , 正式宣佈慘敗收場 .

可以既話 , 就當冇去過 , 大家上黎繼續睇 "私人恩怨" 篇算數 .

不過所謂 : 醜婦終需見家翁 . 所以即使點失敗 , 都會寫埋落去 .

咁究竟點解會失敗呢 ? 之唔係人算不如天算囉 , 

根據民宿老闆既口供稱 : 原來4 - 6月份 , 根室 至 釧路濕原果頭 , 

每年都會非常大霧 , 而根室 與 釧路 , 正正就係今次既重點行程 , 

我最鍾意睇果D "天涯海角" 架嘛 , 結果就乜都睇唔到 . 

(到處矇查查 , 淨係聽到海浪聲)

而大霧又影響車程 , 試過有一個景點 , 大霧到離晒譜 , 

簡直就係危險既程度 , 夾硬去到都冇幸福 , 就算想掉頭走 , 

都驚掉頭時有車隊埋黎 , 可想而知大霧到幾咁得人驚 .

平時就算坐車 , 都未試過遇到大霧啦 , 莫講話自己駕駛 .

另外大霧加大風 , 試過有度影完相上車 , 點解個頭滴水既 ?

原來D霧水吹落個頭度 , 攪到好似洗完頭咁 , 呢樣都可以忍 , 

最難忍就係橫風橫雨 , 又唔係勁大雨 , 只係雨濛濛果隻 , 

一影相就整濕個鏡頭 , 每影一次就要抹一次鏡頭 , 都唔係用乜野專業抹布 , 

只係掀起件T恤黎抹咋 , 好彩四野無人 , 唔係真係失儀 . XD

而由於大霧關係 , 難免影響心情 , 我份人一向情緒化 ,

所以好多細節位都冇影到相 , 長腳架直情拎都冇拎過出黎 , 失敗 .

今次既失策 , 唯一做到既野 , 就係將我今次失敗既經歷寫出黎 ,

俾想呢段時間去果度既Blog友知 , 千祈唔好制呀 . 

真係有D想喊 . >_< !! 

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

下面有段短片係果度大霧既情況 , 見到咁既形勢 , 

乜野旅遊心情都打消 , 而片裡既大霧情況只屬中等 , 

有D勁得多 , 不過要專心駕駛 , 所以冇錄影 .

只得十零廿尺視野 , 淨係掛住小心駕駛 , 有命返黎到偷笑咯 . 

P.S. :寫呢篇網誌果陣 , 都仲未知道遲D會錯誤刪除了部份相片 , 

正式係衰開有條路呀 .  =_= !!