2014北海道11天自駕遊D8-16 富田農場篇B

Hello !

上回講到參觀緊 富田農場 既 香水の舍 , 今晚繼續 .

其實呢Part都已經八八九九 , 差些小就攪掂 , 可以去另一邊 .

呢幾部係香水試味機 , 有四種味道俾你試 .

正如相裡面咁講 , 拎一張右邊既試紙 , 放入中間個窿度 , 

再等佢著燈 , 佢會噴小小落張試紙度 , 之後拎番出黎就OK .  ^^

今次四種都試勻晒 , 每種既味道都好獨特 , 唔錯 !

落番樓下 , 香水の舍 呢Part就大功告成 , 可以參觀另一邊 .

紫色電單車 , 襯晒薰衣草顏色 , 要黎代步就fit到漏油 . Yeah !!

(可惜我唔識得楂電單車 , 係呢 コーさん & t先生 , 你地有冇電單車牌呀 ?)

除左電單車 , 呢味車都係一絕 , 不過就冇咁快 .

行前D見到有間寫真館 , 無料任參觀 , 咁就要入去開下眼界喇 .

牆上擺滿晒攝影師既傑作 , 果然係鮮花盛放 富良野 , 呢D只係前菜 .

之後果D先至歎為觀止 .

有冇攪錯呀 , D相可以影得咁鬼死靚 , 簡直係離譜架 .

唔知有冇用電腦執過黎呢 ? 就算有 , 執相技術都唔簡單 .

雪中的 富良野 , 波浪型既雪地 , 勁 !

講開又講 , 聽聞 美瑛 唔知乜野の木 , 有個江湖規矩 , 

就係落雪時唔俾人進入佢樹下既範圍影相 , 皆因一旦踩花個雪地 , 

就好難復原 , 其他拍友就會多得你唔小 , 唔知大家有冇聽過呢個規矩 ?

寫真館隔離就係佢個 OFFICE .

裡面就係喇 , 不過冇入去參觀 , 費時阻住人做野啦 .  XD

再行前D有個溫室 , 開滿薰衣草 , 叫做小小彌補啦 .

仲有其他花朵 .

出面開滿時 , 唔知係咪就係咁款呢 ?

引得蜜蜂都黎採花蜜 .  ^_^ !!

出水位咁似豬鼻 . haha ...

另一個出水位 , 係飲水定係洗手 ? 有神社咩 ?

上篇咪話D花苗一批批送到既 , 擺低D工人就識得做野 .

跟住黎既流程就係介紹工人們點樣種花 .

首先連埋包裝紙擺好D花苗 , 叫做度好個位置 .

就係咁樣喇 , 未拆開下面既包裝 .

度好位置就正式埋位 , 工人先在個窿放適量水份 . 

跟手拆開包裝膠兜 , 放落個小水氹裡面 , 跟手再質實佢 .

完成就係咁樣 .

係咪好整齊呢 ?  ^^

再每日淋水 ~ 施肥 , 等佢慢慢生長 .

大約兩個月後 , 就會見到靚靚既 富田農場 .

睇完佢種花 , 都係時候整番杯軟雪糕食下 , 拎定300Yen出黎啦 .

好 ~ 今晚講住咁多先 , 仲有篇C 大結局 , 

不過星期六休息 , 一於禮拜日黎解決佢 , 係咁先 .

Bye Bye !