2018四國9天自駕遊D1-2 四國半通宵車篇

Hello !

上回講到到達 關西空港 出關之後 , 跟住去梳洗 ...

攪掂之後就過 T2 , 即係行過條天橋 , 見到日航酒店果邊 , 接駁巴士站隔離 .

見到間 LAWSON , 買番些小補給品 , 叫做今程首次消費 .

LAWSON 隔離就係租車公司 , 出發前搜集過資料 , 

淨係得 Nippon Rental Car 呢間有做24小時營業 , TOYOTA 果邊收晒工 , 

如果等到早上8點先至攞車 , 咁呢幾粒鐘就要在機場等候 , 

依家攞車可以即刻去四國果邊 , 天光就到步 , 慳番唔小時間 .

不過有利必有弊 , 第一樣要俾多1080Yen深夜附加費 , 呢樣好濕碎 .

第二係車款選擇比較小 , 其實今次本來想租 NOTE 果款混能車 , 

之但係誤打誤撞租左部 N-BOX , 反而適合四國地形 , 都算唔錯 .

第三係要通宵駕駛 , 冇番相當既精神狀態 , 千祈唔好試 , 

我就話身經百戰加上有過 知床通宵車 經驗 , 所以先至夠膽死 , 

未經過持久訓練既家庭觀眾 . 一切後果自負 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講完就行得 , 首先係拎張BOOK車A4紙佢睇睇 , 

跟住係護照 , 國際車牌之類 ... 影印中 ...

再跟住係講解交通規則之類 , 例如邊度還車 , 今次唔係機場還車 , 

(要另外俾多1080Yen) 還車前入滿油 , 電油叫做 Regular , 仲有D基本路牌 , 

唔好醉駕 , 藥駕 , 超速 , 違例泊車 , 仲有就係駛唔駛買多份保險 .

最後就係簽咭 , 攪掂埋就可以出外面Check車 .

牆上有好多條車匙 , 大把貨待租 .

Check車呢Part其實都係講個信字 , 因為外面光線不足 , 

就算部車有花痕 , 都唔係咁易發現 , 不過好耐之前講過 , 只要唔係離晒譜既花痕 , 

還車時佢只會係咁咦行個圈就算 , 唔會太過深究 .

上到車佢教埋GPS點用 , 就可以正式出發 . 擺晒D野上車之後 , 

原來已經係03:15 , 去四國方向行 , 只需兩個半鐘頭左右 , 襯仲有時間 , 

不如介紹埋個GPS啦 , 首先按下面 メニュー 果個掣 .

出現呢個畫面 , 電話番號同埋MAPCODE在同一個頁面 , 

所以淨係介紹電話輸入呢Part就OK , MAPCODE都係大同小異 .

按下電話番號 .

輸入所需號碼 .

第一站係鳴門觀潮船果頭 .

睇過OK就按右下角  ここへ行く .

所需時間 2小時23分 , IC料金7210Yen , 其實只係6460Yen .

不過都好貴 , 今次冇租到ETC咭 , 來回都係硬食 , 好貴既呢 .  =_= !!

冇辦法啦 , 都要按下 案內開始 .

預計到達時間係 05:43 , 162km距離 . 掂未 ? 攪掂就開車 .

講番呢程車 , 雖然唔算摸黑黎行 . (過一兩日後會有摸黑行車)

不過一開車就係上高速 , 而且隔左一年冇揸過車 , 

唔慣就在所難免 , 幸好夜媽媽行車 , 附近冇乜車 , 唔會影響到人 , 

(呢樣亦係我預計之內) 所以唔駛太耐就搵番駕駛節奏感 .

儘管如此 , 在高速果陣 , 我都係最慢果架車 , 俾人逢車過車 .

搵番條片擺上黎都好喎 .  ^_^ !!  一陣啦 ~ 俾D時間我 .

行行重行行 , 去到一個叫 垂水 既PA , 都要落車休息下 .

(由於開得慢 , 到達時間又推後左 , 預計係06:13

呢個PA好冷清 , 都幾得人驚 .

去完洗手間 , 影兩張就上車 , 繼續行程 , 部車遲D先至詳細介紹 .

再經過一輪苦戰 , 終點在望 , 果陣係06:18 , 仲未天光 .

06:28 終於到達目的地 , 正式係天黑揸到天光 .

前面果間就係鳴門觀潮船公司 , 最早果班船係 08:00

咁就參觀左D唔受時間限制既景點先 , 呢一帶有好幾個景點參觀 , 

有兩樣不得不提 , 第一樣係天氣 , 唔好睇呢張相好似好正常 , 

實在呢度D風大到呢 , 起初以為臨天光先刮起大風 , 過一陣會正常番 ,

(呢樣在 知床 果陣見識過) 點知唔係架 , 之後都好大風 , 冇乜點停過 .

另外係呢個車位 , 依家就好正常 , 晏D時候呢度泊滿車 , 堆堆質咁 , 

最前果部都唔知點走 , 所以遲D會兜去收費停車場果邊 .

前面果間叫做 嗚門海月旅館 .

叫得做鳴門 , 當然不乏海景啦 , 基本上今程海景多的是 , 有排睇 , 放心 !

呢篇講住咁多先 .

Bye Bye !