2010北海道10天自駕遊(修訂版)D10-1味之時計台篇

Hello !

上回講到食完個 "鐵板燒" 之後行番酒店 , 

睇多陣電視就休息 .

一宿無話又到朝早 , 基本上所有行程都攪掂晒 , 

所以今日可以晏小小起身 , 攪掂之後落樓下食早餐 .

食完上房執拾好細軟之後落大堂 Check out , 

埋單俾1000Yen停車場費就OK .

跟手交低D行李俾佢托管 , 就可以出街行 ,

上兩篇 "還車篇" 咪話當時已經諗定下次租邊種車既 ,

於是出去租車部既車位 , 參觀佢地既車款 .

咦 , 呢款唔錯喎 , 個樣夠晒辣 . 

PRIUS 當然辣啦 , 租價亦都好辣 .  ^^

部車有型之外 , 仲係混能車 , 果陣對混能車都仲好陌生 .

轉睇隔離既 RACTIS , 簡簡單單 , 正 .

細細部咁 , 一個人啱晒 .

再睇埋旁邊既 bB , 外形趣怪 .  (不過我比較鍾意白色車)

呢款車係Blog友 : Nerissa 推介 , 唔錯架 .

TOYOTA 既租車部在 "京王酒店" 地庫 B1 , 記住呀 .

(側邊有樓梯落去 , 唔駛經酒店大堂)

唔記得講埋 , 托管行李既牌仔 . No.55

之後向JR駅方向行 , 途中見到一堆人 , 攪乜鬼呢 ?

原來係美化街道 , 有意思呀 . (我都想幫手 , haha ... )

Hotel Gracery 相信下次黎 "札幌" 好大機會入住 .

或者翻兜 JR日航酒店都唔錯 . Yeah !

一場黎到 , 順便參觀埋個巴士總站 .

有10幾條路線 , 去邊度都得 .

上次去 "定山溪" 溫泉套票 , 就係呢度買 .

加價100Yen . (通貨膨脹 , 冇辦法啦)

其他路線巴士時間表 .

咪走呀 , 等埋 .  ^^

攪掂就去搭地鐵 .

呢度買車票 .

搭一個站200Yen .

剛剛走了部車 , 好彩唔係趕時間 , 相反係大把時間 .

好快就到 "狸小路" , 雖然今次行程 , 以觀光為主 , 

不過一場黎到 "札幌" , 點都要行一行 "狸小路" , 叫做Shopping一番啦 .

"企鵝王國" 好多野賣 , 好好行架 .

千祈唔好睇小佢 , 分店遍佈全國 .

話咁快就行到中午 , 就去呢間禮品店入貨 , 

上次都係呢間入貨 , 有九折架 .

係咁咦買小小啦 .

又到午餐既時候 , 行番去酒店之前 , 食埋午餐先 , 

早幾篇咪話黎呢度食既 , 一於入去 .

上次又係黎呢間食 , 我份人真係念舊 . haha ...

地方一D都冇變 .

好彩有其他顧客 , 唔駛鋪鋪都包場咁陰公豬 .

無車一身輕 , 幾大都啤一啤佢 .

主菜到 , "牛油帶子拉麵" . Yeah !

咁高興 , 又點小得餃子 .

黎個大合照 , 唔知既話 , 仲以為拎番上次張相出黎 .

埋單丫 , 唔該 .  2250Yen .

都幾貴喎 , 不過物有所值既 .

Bye Bye !.