Hello !
上回講到在 "洞爺湖觀光船" 欣賞湖景 , 呢篇繼續 .
大約45分鐘既船程 , 話咁快就過 , 上岸後往停車場取車 ,
連隨上 "有珠山" 參觀 .
由於呢度都幾熟路 , 所以連GPS都唔駛Set ,
就咁睇路牌都上得到去 , 幾分鐘車程左右就到 .
各位觀眾 : 昭和新山 .
向 "熊牧場" 方向行 , 唔記得講埋 ,
山下面既停車場係 "無料" , 呢度既停車場 , 只要擺低部車 ,
即刻就有D大叔同你收停車費 .
410Yen 可以擺足一日都得 .
上次黎只係過門不入 , 因為參觀左 "登別" 果個 .
所以今次專誠黎參觀 , 不過呢個場規模比 "登別" 細好多 .
熊牧場入場券 , 大人800Yen .
門口 "受付" 有蘋果 & 餅仔賣 ,
我買左兩包蘋果及一包餅仔黎玩番兩手 . ^^
同 "登別" 熊牧場一樣 ,
D熊識得拜神咁既手黎問你要蘋果 , 好趣緻架 .
係就係冇自由架喇 , 不過點都好過落入 "內地" 既熊牧場 ,
日日俾人抽膽汁 , D友仲要話抽得佢好舒服 , 正人渣黎架 !
Bye Bye !
P.S. : 講開 "熊牧場" 呢度 , 在我到達當地時 , 新聞報導熱播 ,
話 "秋田縣" 發生走熊事件 , 返到黎 "香港" 之後 , 搵番D舊報紙 ,
果然搵到呢段新聞 , 報導話 "秋田縣" 鹿角市八幡平熊牧場 ,
有走熊事件發生 , 仲殺死左兩名職員 , 當局派出獵人追捕 ,
最小擊斃6隻熊 , 當時都仲未知走甩幾多隻熊 ?
同埋佢地用乜野方法逃走既呢 ?
當日新聞都有報導 , 4月22日 .
(為尊重死者 , 所以遮住佢地個樣)
而且已經查出佢地用乜野方法逃走 , 原來係靠牆邊D積雪 ,
質到佢實一實 , 做成一道斜台 , 順利地爬過高高既圍牆 .
認真係蠱惑的熊 , 可憐該兩名職員 , 無辜枉死在熊掌之下 .
可惜 ! (默哀一分鐘 ... )
希望佢地可以研究 , 點樣先可以防止同類事件再發生 .
皆因每年都會落雪 , 如果充滿遊客時候走熊 ,
咁就真係 "虎入羊群" 咯 , 罪過 , 罪過 .
(頭先睇 "維基百科" , 話佢在6月1日已經關門大吉)
再 Bye Bye !
沒有留言:
發佈留言
歡迎光臨 , 如果時間許可 , 請留番個言丫 ~