2012北海道10天霧地自駕遊(修訂版)D9-1登別伊達時代村篇

Hello !

上回講到睇完煙花 , 浸埋溫泉就休息 , 呢篇繼續 .

一覺醒來就係第九日 , 今日既景點 , 集中在 "登別" .

不過食完早餐先講 , 今次唔係在房食 , 係落樓下食 .

仲係 "日式" 早餐 , 一份Set好晒 , 唔駛自己慢慢揀 .

講開早餐又要叉開一陣 , 日式果D早餐 , 有一味勁難食既野 ,

(之前唔記得有冇講過) 叫做 "納豆" , 有一兜放左嚮度 ,

正式係食又唔係 , 唔食又唔係 , 好難頂既呢 .  ^^ 

另外咖啡呢樣野 , 又係值得一提 , 平時在 "茶餐廳" 食早餐 , 

甚小飲咖啡 , (多數都係凍奶茶) 不過出黎旅行又唔同 , 

食完早餐多數都整番杯 , 若然係自己倒果隻 , 再加奶加糖 , 

咁樣未必好飲 , 有D酒店有埋部咖啡機 , 咁就爭好遠咯 , 

只要擺個杯再按掣 , 就有咖啡出 , 甚至連泡沫咖啡都有 , 

果次試過飲一杯 , 咦 ~ 正喎 , 再黎N歌 , 

唔錯 ~ 唔錯 , 飲到唔捨得走咁滯 .

食完返上房執齊野 Check out , 同佢拎番條車匙 , 

佢話部車泊在轉灣停車場 , 咁就照佢指示既方向黎行 , 轉左個灣 , 

Wow ~ 有D正野嚮度 , 原來有隻大肥貓在附近 , 本來有隻貓都唔算奇 ,

奇就奇在隻貓任摸任摷 , 甚至成隻秤起都得 .

(香港果D未埋到身邊5呎 , 都已經走夾唔抖)

真係想將佢打包空運返香港呀 . haha ...

結果同佢玩左好耐先至捨得走 , 依家諗起又想嘔血 , 

因為同佢拍左好多短片及相片 , 依家報銷左 , 真係嘔足成擔血呀 .

呢隻貓只係參考圖片 , 並唔係呢一隻 .

幾唔捨得都要出發 , 第一站就係 "登別伊達時代村" ,

第一次黎 "登別" 時Miss左 , 依家補番數 .

上車行IC , 由 "洞爺湖" 往 "登別" , 車程比想像中耐喎 ,

終於去到佢停車場 , 交低500Yen泊車費 , 泊好部車就入去買飛 ,

如果單買一個景點 , 就算出埋優惠券 , 都要2仟幾Yen ,

不如買果味遊客專用券 , 2個景點3300Yen , 叫做抵小小啦 .

結果買左張兩個景點既 NOBORIBETSU 券 ,

其中一截換左呢張 "通行手形" .

呢度既案內圖 , 正面 .

裡面 .

入口有兩位大叔扮鬼扮馬 , 好過癮架 .

藍框D相係班番黎 , 冇咁多人 , 記得當日係星期日 ,

再加上接近5.1長假 , 真係好多人 , 同以前比真係差好遠 .

當日四圍行及影相 , 好多忍者用具 , 貓鬼屋 .

斜台屋 , 總之好有趣啦 .

到時間仲參觀左兩個劇場 , 

呢個係攪笑版 , 即係有隻狗果個劇場 .

雖然唔知佢講乜 , 不過都好攪笑 , 

有時從個井爬出黎 . haha ...

之後睇多個劇場 , 係忍者動作劇 , 打到刀光劍影 , 

好精彩既呢 , 完場時仲有忍者合照 , 觀眾同忍者打成一片 , 

非常之親民 , 仲不另收費 , 所以我都同佢地合照左幾張呀 .

我覺得呢個 "忍者村" , 如果未黎過既話 , 都值得一睇 .

Bye Bye !