2016北海道雪駕遊D4-2 入油&洗車篇

Hello !

上回講到食完早餐執齊野 , 再度埋部車就走得 ...

之前講過 ~ 第一個景點就係 ENEOS油站 , 

而油站就在旅館附近 , 一齊去入油咯 .  ^_^ !!

駛到入油站 , 拎張入油紙俾佢睇 , 

張紙寫住 : Regular ~ 入滿 ~ 俾現錢之類 , 睇完佢就醒水 .

入油時抹玻璃 , 必修課程黎架啦 . haha ...

襯佢入緊油 , 出黎影番幾張相 , 順便鬆鬆腳 .

(鬆腳 ? 剛剛先上車開左兩分鐘咋 . )  XD

講過好多次 , D電油味道好哽 , 點煙既話就一鑊熟 .  =_= !!

差唔多喇 , 可以上車俾錢 .

今次係呢程第一次入油 , 用左四份三格 , 6441Yen 埋單 .

下次入油將會係 摩周湖 果頭 , 入完油仲未走得 , 仲有個餘慶節目 , 

就係洗車 , 洗車位就在前面 , 一陣駛過去就得 .

睇睇個價目表 , 就幫襯最平果味 , 4號水洗 . 

拎 200Yen入落部機度準備 .

D水不留咁流 , 又係以防結冰果一著 . (請打橫睇)

開始之前 , 先確保車門&車窗完全關閉 , 否則後果自負 . haha ...

另外仲要將條水喉拆出黎 , 預佢可以繞場一周既長度 , 

因為一經開始就冇得停 , 攪掂未 ? 掂就按開始掣 .

由於我得一個人 , 冇得邊影邊洗 , 所以只能影個完成圖 .

唔知之前有冇講過 ? 噴水位回彈力好強 , 要用雙手先捉得住佢 . 

雖然冇正式計時 , 不過估佢都有兩分鐘時間 ,

今次部車淨係污糟 , 車轆位附近冇結冰 , 所以有充足既時間 , 

可以洗得乾乾淨淨 , 但係好快就污糟番晒 , 

所以全程只係洗過一次車 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 洗完乾淨晒 , 黎番個繞場一周咁影 .

Wow ~ 洗到部車出晒煙 , 勁得咁交關 ?

另外講埋 , 今日氣溫唔算太凍 , 就算兜水噴落擋風玻璃度 , 

都唔會結冰 , 唔似得上次 , 差D攪到我雞毛鴨血 .  XD

車尾部份 , 立立令 , 新車一樣 , 正 !!

還記得在報平安篇度寫過 , 洗車好好玩呀 . 

真係好好玩架 , 呢個節目 200Yen 抵玩呀 .

倒後鏡都唔放過 , Yeah !!

車呔寫住 : DUNLOP WINTERMAXX .

車呔我唔多熟 , 出唔出名架 ? 好似 米芝蓮 個朵行D .

洗完車再介紹 , 係咪好過第一次既介紹篇呢 ?

呢款應該唔係最新型號既 Elgrand , 

見過有D鬼面罩 , 長到落車牌個位置 , 好似好勁咁 .

影住咁多先 , 費時阻住佢做生意 .

呢篇講住咁多先 , 下篇正式出發 .

Bye Bye !