2010北海道10天自駕遊(修訂版)D1-8甘露の森評價篇

Hello !

未正式開始之前 , 又叉開小小 ,

話說早幾日收到二世古 "甘露之森" 酒店 , (佢係我第6晚住既酒店) 

透過 "樂天" 既 E-mail , 邀請我幫佢寫番篇入住後既感受 , 

再放在 "樂天" 網站果度 . 

首先多謝佢咁睇得起我先 , 不過呢樣野真係幫佢唔到 ,

若然我 D日文係夠班寫果篇 "住後感受" 就好世界咯 ,  

我都好想 , 可惜心有餘力不足呀 . 

所以唯有用另類方法幫佢寫感受篇啦 , 就係在呢度寫番篇 , 

如果有人上黎睇到推介而幫襯佢 , 我都算出番分力 , 

況且我都係衷心直說 , 唔算幫佢賣廣告 , 今次就優先處理呢個項目啦 .

果間酒店在 "二世古" 果度 , 入住過之後 , 有幾樣野留俾我既印象相當唔錯 , 

第一係佢地接待員既英文都唔差 , 幫我拎行李上房沿途都用英文黎介紹 ,

反而我用日文回應 , 場面都幾怪雞 .  ^_^ !!

第二樣係派俾我間房係洋式 , 住了幾日 "榻榻米", 黎間洋式彈弓床 , 真係及時雨 .

仲有夜晚果餐非常豐富 , 個甜品一流 , 早餐有日式&西式 , 

食了幾日 "日式" 早餐 , 呢餐又係及時雨 .

晚餐餐牌 .

西式早餐 .

之後輪到個溫泉 , 男女地方隔日交換 , 因此可以兩邊都試勻 ,

呢樣又係抵讚之作 , 最後係佢地有部電腦放在大堂任你上網 .

(如果有 wifi 既話 , 呢樣已經唔再係賣點)

至於其他既地方 , 都有唔錯既表現 , 佢地雖然貴D ,

不過物有所值 ,  "二世古" 其他酒店我未住過 , 

但若然有機會再黎 , 我都會揀番佢地 .

呢D就係我既 "住後感受" , 擺唔到上 "樂天" 果度 , 

希望有人隨緣上黎睇到啦 , 幫到呢度都算係咁 .

Bye Bye !