2024/12/26

生日快樂2024

 



Hello !


大家好 ! 今日係12月26日 , 係生日既正日 .  ^_^ !!

一如以往 , 攪番個生日會 , 連同聖誕節一齊慶祝 , 賀一賀佢 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今年唔切生日蛋糕 , 改用斬件蛋糕黎代替 , 多D款式 , 

大家鍾意邊款自己黎 , 唔駛客氣 .


我鍾意白色面果隻 .


順便黎個壽司拼盤 .


甜蝦刺身 .


三文魚刺身 .


帶子刺身 .


最後係 Pizza .

以上食物只係一部份 , 其他果D不能盡錄 ...  haha !!

食完野之後 , 輪到講生日願望 , 基本上年年都係果幾味 , 包括世界和平 , 

身體健康 , 搵多D錢 . 開開心心 , 去日本順順利利之餘此類既老土野 ...

不過今年開始有D例外 , 就係去日本果一項 , 可以刪除 , 其他照舊 .

簡單D講就係暫時唔會再踏足日本 . 自從佢地開始倒核污水落海之後 , 

對佢地既印象急轉直下 , 點會咁自私架 ? 大把方法唔用 , 係要用最差既方法 .

D核污水污染海洋生物之後 , 經陽光照射蒸發上雲層 , 然後落雨 , 

核輻射雨水灑在大地 , 包括水塘及草地 , 人類飲用水時 , 難免中招 , 

又或者牛食草後中招 , 人類又食牛 , 咁樣內循環法 , 命都短幾年 .  >_< !!

在網上Check過 , 銫137半衰期 , 大約30年左右 , 諗起都得人驚 .

仲有日本迷失30年 , 多間企業做假事件 , 再講就變吐槽大會 .

所以講住咁多先 , 正常既情況下 , 明年生日會再見 .

Bye Bye !


2023/12/25

生日快樂2023

 


Hello !


今日係12月25日聖誕節 , 順便攪埋個生日派對 .   ^_^ !!


上次果篇網誌 , 正係上年既生日 , 即係話足足一年先至寫一篇 , 

真係開口中呀 , 不過冇辦法啦 , 依家好多媒體都好吸引 , 寫網誌都Out左 ,

就好似睇Youtube咁 , 我一日都花好多時間 , 相信過左呢篇之後 , 

又要明年見 , 至於日本果方面 , 由於佢多次排放核污染水落海 , 

所以都唔知仲有冇機會再去 , 就算真係去 , 都未必會寫網誌 , 

玩完就算 , 一切在心中 , 夠晒慳水慳力 . haha  ... 

(未必既 , 如果真係有機會出門 , 相信都會做個網誌黎記錄 , 

不過呢日唔知係猴年馬月)

輪到生日願望 , 今次大願D , 希望世界和平 , 唔好再有戰爭 , 歌都有得唱啦 : 

無助與冰凍的眼睛 , 流淚看天際帶悲憤 , 是控訴戰爭到最後傷痛是兒童 ...

另外最重要既係身體健康 , 開開心心 , 咁就夠架喇 .

Bye Bye !



2022/12/26

生日快樂2022

 


Hello !


一年容易 , 唔覺唔覺 , 又到左12月尾 , 今日26號  ,

正係生日既正日 , 係咁咦攪番個生日會啦 , 什果蛋糕一個 , 

年年都係咁上下 , 求其啦 ~ 叫做圍內人聚一聚 .  ^_^ !!


例牌切件最大既俾自己 .


食先喇 ~ 唔好客氣 , 請自便 .


睇番上次果篇網誌 , 在2月10日 , 即係成10個月都冇更新 , 

好話唔好聽 , 差D遺忘左呢度 , 下次更新有可能係2023年既生日篇 ...

唉 ~ 認真無奈 , 個心已經唔在呢度 , 除非重新去日本玩番趟 , 

咁就會好積極地寫遊歷俾大家參考參考 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番今年 , 真係發生左好多事 , 由年頭既不斷檢測 , 

至係依家連安心出行都冇埋 . 新冠既毒性 , 亦由十步殺一人 , 

降到只係普通感冒既級數 , 呢樣真係意料之外 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番正題 , 日本都叫做開番關 , 我幾時會再出發呢 ?

答案係短期內都唔會咯 , 點解呢 ? 原因有兩個 , 一 : 雖然佢開晒關 , 

但都好似好多人中招喎 , 如果依家就去玩 , 有D送羊入虎口Feel囉 .

二 : 就係日本當地 , 都係百廢待興 , 未必接受到突而其來既大量遊客 , 

倒不如等多一排 , 等佢穩定D先至去 , 咁就玩得開心D , 

而且聽講D機票都好貴下 , 又係再等佢慢慢回落先 , 

即係話唔等都等左咁耐 , 唔爭在等多佢一年半載先至做野 .

Bye Bye !

咦 ~ 好似冇講生日願望喎 , 都係果D開開心心 , 健健康康之類 , 

依家年紀大右 , 唔似得後生果陣乜都想要 , 平淡是福 !!

再一次 Bye Bye !