2015/06/26

別了 ~ 站長 ...




Hello !


急病離世 , 終年16歲 , 永別了 , 小玉貓站長 !


簡單既標題 , 已經寫出了本篇網誌內容 .  =_= !!

一直深受愛戴既貓站長 , 於本周一已經離開了我們 , 一路好走 ...

就在上個月 , 呢度仲寫左篇 站長 ~ 生日快樂 , 

估唔到相隔冇耐就傳出呢個消息 , 真係有D心up .  >_< !!

睇黎除左珍惜眼前人之外 , 仲要珍惜埋眼前貓 , 如果有養開貓既Blog友 , 

記得對佢地好D , 因為唔知幾時佢會離開 , 認真化學 . 

講開呢隻貓就夠晒傳奇 , 雖然講過好多次 , 不過今次都要講埋 , 

自從 阿玉 成為站長之後 , 令到呢條 貴志川線 電鐵起死回生 , 

將該站成為人氣景點 , 以佢為名既各式各樣精品一律大賣 ,

由本來蝕到空虛轉眼變成賺到開晒巷 ,  如果冇佢既話 , 

相信呢條線都經已摺埋左 , 正式係救世神貓呀 .  ^_^ !!

就連我都想慕名而來 , 一睹佢既風采 , 可惜太遲 ...   

唯有一切在心中啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今後領導該線既重任 , 交由副手 二玉 接替 , 

希望佢可以令到 阿玉 精神 , 繼續發揚光大 , 

好好咁守護住呢條 貴志川線 . 

Bye Bye ! 

2015/06/21

羅漢果煲山渣




Hello !


近排夏日炎炎 , 乜野活動都冇晒心機 , 

就算今日落左雨 , 都唔降溫得幾多 , 唯一節目就係在家煲劇 .

不過都要搵D野黎寫下既 , 就介紹個特飲俾大家啦 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

做法非常簡單 , 連我都識整都唔駛慌有咩野難度 .  XD

先介紹材料 , 當然有主角 ~ 羅漢果 ~

市面上有平有貴 , 貴至10蚊一個 , 平至10蚊4個 , 

通常都係揀D中價 , 大約4-5蚊一個都OK .


跟住輪到 山渣 , 10蚊一大包 , 只需要用10粒左右就夠 .


將兩味材料洗淨 , 羅漢果拆到有咁散得咁散 , 比較容易出味 .


倒落個煲加水 , 其實都唔知落幾多水架 , 求其一滿煲咁啦 .


先用猛火將水煲滾 , 話都冇咁快 , 幾分鐘就滾 .


掀開小小煲蓋 , 煲多10-15分鐘 .


夠鐘就熄火 , 再焗佢10分鐘左右 .


倒出黎攤凍 , 暖暖地飲就OK , 有剩沖起佢放雪櫃 .

飲勝佢 ~ Yeah !!


係咪冇介紹錯呢 , 酸得黎又有D羅漢果味 , 好過飲啤酒 & 汽水 .

最適宜夏天冇乜胃口飲用 , 不過最好都係熱飲 , 

始終飲得多凍野都唔係咁好 .  ^_^ !!

Bye Bye !

最後 ~ 黎番個免責條款 , 呢D話晒勉強都叫做藥材 . 

可能有人體質唔係咁夾 , 飲用前最好都係請教家庭醫生 . haha ...




2015/06/17

體育運動政治化




Hello !


呢篇網誌本來尋晚出街 , 不過要睇果場球賽所以攪晏左 .

今晚得閒一於解決埋佢啦 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果有留意開新聞 , 應該知道講緊果場波 , 就係世界盃外圍賽 ,

香港 vs 馬爾代夫 . 

自從英超聯賽煞科之後 , 好耐都冇正式咁睇過一場波 .

雖然技術方面有極大既距離 , 不過加入左本土情意結之後 , 

覺得都幾好睇喎 . (再加上香港隊贏波 , 所以更覺好睇)  XD

而一切就要由呢張海報說起 ...


由於香港隊與中國隊編排在同一組別 , 互相對賽在所難免 , 

中國隊出既宣傳海報話香港隊球員有層次 , 可能係咁 ~ 

所以逼出香港隊十成功力 , 首兩戰連下兩城 , 

分別擊敗不丹 & 馬爾代夫 , 之後仲有好戲連場 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住輪到講番D開場花絮 , 第一場 香港 vs 不丹 , 

開賽前播國歌被噓爆 , 由於果陣場波唔多起眼 , 所以冇乜留意 .

今次呢場 香港 vs 馬爾代夫 , 特登在電視留意點樣噓法 , 

可惜只能夠睇廣告 , 被 J2 Cut左 , 好彩在網上可以睇番 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

我個人認為 , 就算同中國有乜野私人恩怨 , 噓國歌始終都唔係咁好 ,

香港人 (講土生土長果隻) 受慣英式教育 , 對國家觀念唔係咁重 , 

但唔排除內地有D忠黨愛國既死硬派 . 而呢場球賽有可能全世界轉播 , 

遠至山卡啦國家 , 近至北京 , 佢地見到自己國歌咁樣俾人糟質 , 唔慶過辣雞至奇 .

乜野恩怨都可以用其他方法拆解 , 攪人國歌就唔多好 , 

點講好呢 ~ 就好似你擺結婚酒果陣 , 有班平時冇乜兩句既親戚問你倆幾時離婚呀 ?

就算你忍得住唔即時打窒佢 , 內心對佢都會有條刺 , 不除不快 . 

所以下次去人地主場時 , 最好就唔好玩呢味野 , 

否則有乜冬瓜豆腐 , 唔好話我冇單聲 .  =_= !!

Bye Bye ! 

最後 ~ 請大家食個鐵板餐 . Yeah !!



2015/06/10

食完飯繼續煲劇




Hello !


上篇咪話大家樂賠左100分既 , 

襯今晚得閒一於駛咁D , 每次只能夠扣5或10分 , 10餐左右就扣晒 , 

唔係幾襟玩架咋 , 唔知佢幾時再次資料外洩呢 ? haha ...

海南雞飯 + 楊枝甘露冰 . (今期我的最愛)


順便黎個電視送飯 , 尋晚果集新福爾摩斯 .


點解唔尋晚睇埋呢 ? 因為用左果段時間黎煲其他劇 , 

就係綠箭俠喇 , 呢套劇暫時做左三季 , 第一季早排明珠台都有做過 , 

不過Miss左 , 依家預算一鋪過煲晒佢三季 .

綠箭俠 ~ 肌肉如鐵 , 好有型架 . ^^


煲完綠箭俠 , 跟住輪到 行屍 5 & 6 季 , 放工後得果DD時間 , 

又要睇TVB基本劇集 , 所以真係好忙架 , 就連Blog友

Fung Mandy 推介既 最強名醫 都要排住隊先 . XD

睇完潮拜武當之後就即刻趕下場 , 武則天都要焗住放棄 , 

講開呢套劇 , 如果唔係TVB驚死 , 夾硬整個封胸版 , 我一定會睇埋佢 , 

依家整到不倫不類 , 可觀性大減 , 正式係畫蛇添足 .  >_< !!

Bye Bye !

P.S. : 今晚明珠台做 血變 , 幾忙都要追睇 , 緊張 !!


2015/06/08

大家樂 ~ 為你賠足100分




Hello !


尋晚去大家樂果度食晚餐 , 俾錢後除左攞餐收據之外 , 

仲搭多一張寫住Club100既紙 ?

就係呢張喇 ~ 


打開之後 , 見到寫住呢D字 ...


跟手再Check下張收據 , 真係多左100分 .

(有效日期至到 2016-01-16 , 有足夠既時間俾你用)


原來係為左上次資料失竊事件作出補償 , 

其實香港人一向善忘 , 雖然呢單新聞都叫做有聽過 , 

不過都冇乜點樣上心 , 好話唔好聽 , 

就連當日入會時俾過乜野資料佢都唔記得 ? 所以即使佢當冇事發生過 , 

依然會繼續幫襯佢 , 依家既然有多一舊水面額既樂賞錢 , 

咁就真係多謝夾盛惠 .   ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

仲有 ~ 繼續幫襯佢亦都係為勢所逼 , 自從領匯上場之後 , 

小店買小見小 , 剩低落黎既食肆 , 唔係大酒樓就係 大家樂 ~ 

大快活 ~ 麥當勞 ~ 肯德基 ~ 美心快餐(呢間好小分店)

自己一個人又冇理由上酒樓 , 其他果D小本經營食肆一律俾佢排除異己 ,

剩低既選擇根本所餘無幾 , 正式係啊超著褲 ~ 焗住 .  >_< !!

就好似星期日晏小小落大家樂買早餐 , 買飛排十幾人 , 

攞野食又排十幾人 , 好似唔駛錢咁 , 唯有轉戰麥記 , 只需排3幾個人 .

餐餐係咁認真唔健康 , 除左身體唔健康 , 社會更加唔健康 . 

講完 !!

Bye Bye ! 

2015/06/07

北海道六月飛霜




Hello !


今日頭條 : 北海道六月飛雪 ...


呢單料係尋日 太陽報 既報導 , 淨係睇個標題都夠晒搶 , 

左下角仲要整番個貓樣 , 認真攪野 . XD

睇完呢單料 , 心諗 : 係咪咁勁呀 , 家陣都成六月過咯喎 , 仲有雪落 ?

莫非正如古人所講 : 六月飛霜 , 必有冤情 ? haha ...

於是上北海道即時監察網站度睇下點 , 情況都唔係報導咁嚴重 .


起碼都唔見地面鋪滿雪既畫面 , 可能只係局部地區性落雪唶 . 

記得好耐之前在函館 , 果陣係5月中 , 正午時份曬到爆咁滯 , 

部車泊得耐 , 裡面勁熱 , 要即刻開冷氣 , 幾分鐘之後先至回復正常 .

另外某D山區 , 即使5-6月 , 地上都仲有積雪 , 呢樣都唔出奇 .

其實如果六月份遇到大雪 , 都咪話唔危險 , 因為該段日子租車 , 

通常都唔會叫佢俾雪軑 , 在冇雪軑既情況下雪地駕駛 , 

我就未試過 , 唔知有冇Blog友試過呢 ? 

駛慢D得唔得呢 ? 真係要搵各位前輩解答喇 .

Bye Bye ! 

2015/06/04

北海道大遷徙




Hello !


今日最熱爆既新聞 , 對於我黎講 , 都算係呢單 .

3400華客掃光北海道土產 , 勁呀 !!


繼早排唔知乜野公司包團遊法國之後 , 今次又黎料 , 目的地係北海道 .

話說日前逾三仟多名大陸遊客乘坐郵輪經室蘭港著陸 , 

到達後大肆搜略 , 將糕點類土產搶購一空 , 空前之盛況 , 

令到當地人都為之嚇窒 , 形容為中國人既大遷徙 .  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講開室蘭市 , 我曾於2010年首次自駕遊有幸一到 , 

最值得遊覽既 , 莫過於室蘭八景 , 地球岬係其中一景 . 


另外仲有測量山 ~ 室蘭水族館 ~ 白鳥大橋 , 全部都唔錯架 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番室蘭市 , 上次我去果陣都好清靜 , 

(基本上除左札幌 ~ 函館等大城市 , 其他地方都係好清靜)

霎時間成村人湧入去觀光購物 , 唔嚇親當地人至奇 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後 ~ 睇到呢類 (強國人攻陷北海道) 新聞 , 心情都幾複雜 , 

一方面諗北海道人人都去得 , 就算係自己 , 頂多都係一年去一次 .

另一方面諗世上既樂土已經買小見小 , 連北海道都淪陷埋 , 

心情就好似一個蛇王既好地方俾人踼爆晒 , 攪到無人不識 .  >_< !!

Bye Bye !

P.S. : 

~ 地鐵報既報導 ~ 




2015/06/03

迷上TV




Hello !


自從買左部新電視之後 , 睇電視既時間比以往更長 , 

攪到好耐都冇更新呢度 , 襯今日得閒 , 整番篇頂下檔先 .

不過未開始之前 , 食左晚餐先 , 順便啤一啤佢 , 各位 : 飲勝 !! 

爭鮮壽司  $3.00/件 , 抵食呀 .  ^^


不過呢篇都冇乜野講 , 只係講下煲緊乜野劇 .

除左 TVB 基本劇集之外 , 明珠台夜晚零時仲有 行屍 第四季 , 

今晚係最後一集 , 其實呢套劇都幾好睇丫 , 點解要擺到咁夜喎 ?

仲要冇配音得個字幕版本 , 若然在P.M.10:30再配埋廣東話咁就正喇 .

而講開行屍 , 做完今晚果集 , 網上仲有第五季 , 

睇開條癮相信都會繼續追埋落去 , 因為實在太好睇 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外仲有 血變 , 又係好鬼死緊張刺激 , 今晚星期三又黎料 , 

睇完 武則天 即刻轉台趕下場 , 好忙既呢 ~ 

忙到連上大家果度都冇時間 , 請見諒 !!

遲D有時間再上各位果度參觀遊記啦 .  XD

Bye Bye !